2 Kiinoo 30 - Kafa Linguistics Project

Hiziqiyaasi Beshee Baaroon Baariya Qannoo

¹ Israꞌeelee Nuggishoo Doono Yeerich Beshee Baaroon baaroyich, Yerusaalem beeti, Doono Yeerichi yaafee kexooch boonoshi woyemmoyich, Hiziqiyaasi Israꞌeelee asho bullinaa Yihudee asho bullinoyich wochoon daachiihe. Efreemi yoodeenaꞌonaa Minaasi yoodeenaꞌonoyichoo koorichoon kooriye.

² Taatoo, iraasheenaꞌonaa Yerusaalem beeti iitoo bullina Beshee Baaroon guttinnee agenooch baaroyich boyeeheete.

³ Ebiyoo boonoshi qelloon xalliiti qeesheenaꞌochi haddoo qaaweetoommon tuno bi qayaa, asheenaꞌo Yerusaalem kiceyoo boonoshi qajjitoyich, baaroo bi goorooba baareyaano bi tunetoyichiye.

⁴ Ebi mooyo taatoonaa asheenaꞌo bullina aafoochaa gaaweto tuneꞌi bekkehe.

⁵ Kooreetoommon meeti asho kiceetaa baaree ariyaano bi tunetoyich, Beshee Baaroon Israꞌeelee Nuggishoo Doono Yeerich baariya asheenaꞌo Yerusaalem woyemmoyich, Beershaabee Daan beddaahaa awaajjo getteyemmoyich, maacciyeete.

⁶ Taatoochi getoommon, wocheyechinaꞌo taatoonaa iraasheenaꞌonochi koorichoon yechiꞌi, Israꞌeelee showoo bullinaa Yihudee showoo bullinooch hammiyeete. Koorichoo ishichii beetone: “Israꞌeeleenaꞌote, Asooree taateenaꞌo kishoochee muriccii echeti curo ittoshi waan bi wottemmoyich, Abrahami, Yisaaqinaa Israꞌeelinochi Nuggishoo Doono Yeer waan wottebote.

⁷ Boonoshi qaabbechinaꞌochi Nuggishoo Doono Yeerich gibeneyoo qajjiti ittoshi qaabbechinaꞌonaa ittoshi maneenaꞌonochoommon tuneyaahote. Ebi ittoshi beeggii beetoommon, biyoo boonoshin aalliitone.

⁸ Ittoshi qaabbechinaꞌo tunetoommon, babberoo tuneyaahote. Ittoshi qelloon Doono Yeerich hajjiibote; bulli yemeenoon bi yaafiti yaafee kexooch wobote; kupphe bi kaaro ittoshi waanee bi wottemmoyich, ittoshi Nuggishoo Doono Yeerich goyinnebote.

⁹ Ittoshi Nuggishoo Doono Yeeri shoodechonaa maarechona bi tunetoyich, bi waan ittoshi wottegaata, bi aafoon ittoshi waanee bara wochaachemmo bi tunetoyich, Doono Yeer waan ittoshi wottegaata, ittoshi maneenaꞌonaa ittoshi bushiisheenaꞌonon keccitinaꞌo boonoshich ariqqeree, hini showooch boonoshi wottemmoyich tuniyemminaꞌone” ii beetone.

¹⁰ Wocheyechinaꞌo Efreemee showoonaa Minaasee showoonooch beeti ikke katemoochee bare katemooch guuddiꞌi Zebuloonee showooch beddaahaa hammiyeete. Tunetaa asheenaꞌo boonoshin hoxeꞌi miiceheete; cooqqiriinoo iyeete.

¹¹ Tunebaani Aseeri, Minaasinaa Zebulooninochi asheenaꞌoochee ikkikkeenaꞌo boonoshi qelloon giishiiꞌi, Yerusaalem waaheete.

¹² Wottoo Doono Yeerichi qaaroommon, taatoonaa iraasheenaꞌona boonoshich gettiton boonoshi tuniyemmoyich, ikke mulloon boonoshich imona, Doono Yeeri Yihudee asheenaꞌo daggooch shuunee beehe.

Beshee Baaroo Baareyoo

¹³ Guttinnee agenooch Shittoo Giyaani Kochi Baaroon baaroyich dofee asheenaꞌo Yerusaalem kiceeheete.

¹⁴ Boonoshiyoo Yerusaalem beeti deejjee gudeenaꞌonaa ixaano shookkeebeeti gudeenaꞌo bullinon happiꞌi, Qedirooni bambooch daammii duppiyeete.

¹⁵ Guttinnee agenee aaraa awuddinnee qemooba, Beshee Baaree bagoon guuriyeete. Qeesheenaꞌonaa Leweenaꞌona yeelleꞌi, boonoshi qelloon yaafiyeete; Doono Yeerichi yaafee kexoochoo micciibeeti deejjoon deebiyeete.

¹⁶ Yeer asho Muusichi Sheerooch qoceetoommon, boonoshi xaaꞌoon yechiyeete. Qeesheenaꞌo Leweenaꞌo kishoochee boonoshi deqqiti damoon wuciyeete.

¹⁷ Iitee daggooch yaafeyaani dofee asheenaꞌo beetoyich, Beshee Baaree bagoon guuroo boonoshich daaggeyaanoone. Ebich Leweenaꞌo boonoshi qoodoon bageenaꞌon guuriꞌi Doono Yeerich giddiiheete.

^18-19 Efreemi yoodoochee, Minaasi yoodoochee, Yisakoori yoodoonaa Zebulooni yoodoonoochee waati meeti asheenaꞌo boonoshi qelloon xalliyaaneenaꞌone; tunebaani kooreeti getoon dabbaanoon Beshee Baaree maayoon maaheete. Hiziqiyaasi boonoshich ishichiꞌi corootiye: “Deꞌo tuneti Doono Yeero, hini asheenaꞌo yaafee kechi doyoommon yaafeyoo boonoshi qajjitaanona, boonoshi mulloochee tiijjiꞌi boonoshi qaabbechinaꞌochi Nuggishoo Doono Yeeri neech goyinnee beetinaꞌone; ebich boonoshi bullin maaribe” iye.

²⁰ Doono Yeeriyoo Hiziqiyaasichi corootoon waayehe; asheenaꞌonoo naxeyoochee wodiihe.

²¹ Yerusaalem daneti Israꞌeeleenaꞌo, Shittoo Giyaani Kochi Baaroon oogeti emiroona shabaatte qemon baariyeete. Leweenaꞌonaa qeesheenaꞌona shoddee qiicoona Doono Yeerich shoddeebee, qemi qemona Doono Yeerin galletee beeheete.

²² Hiziqiyaasiyoo Doono Yeerich maddoona shalligechinaꞌo tuneti Leweenaꞌo bullin bi yibbaatoona kupphiihe. Asheenaꞌo ikkittinee deejjoonoo deejjiibee, boonoshi qaabbechinaꞌochi Nuggishoo Doono Yeerin galleteebee, baaree maayoon shabaatte qemon maaheete.

²³ Iitoo bulliyoo bare shabaatte qemon wochinnoon baaroon baaroyich kuxxiyeete. Ebich baaroon wochinnoon shabaatte qemon daakkiꞌi, oogeti emiroona baariyeete.

²⁴ Yihudee taatoo Hiziqiyaasi hume wuronaa shabaatte hume bagoonon iitoyich immiye. Iraasheenaꞌoo ebiyoommon hume wuronaa aashire hume bagoonon immiyeete; meeti qeesheenaꞌo boonoshi qelloon yaafiyeete.

²⁵ Ebina Yihudee asheenaꞌo bulli, qeesheenaꞌo, Leweenaꞌo, Israꞌeelee showoochee waati asheenaꞌo bullinaa Israꞌeelee showoonaa Yihudee showoonooch koteti shiqqeenaꞌona emiriyeete.

²⁶ Israꞌeelee taatoo, Daawiti bushoo Solomooni yemeenoyee hach, Yerusaalem ebiyoommi baaroo baaree ariyaano bi tunetoyich, Yerusaalemaa oogeti emiroo tunehe.

²⁷ Aroochee qeesheenaꞌonaa Leweenaꞌona tiyiꞌi, asheenaꞌon diiriyeete. Doono Yeeriyoo waayehe. Boonoshi corooto shimaayooch, Doono Yeeri beeyi xaaꞌooch shaggiye.