2 Kiinoo 3 - Kafa Linguistics Project

¹ Yerusaalem, Doono Yeeri bi nihoo Daawitina daneti Mooriyi guudooch, Yebusee asho Orinaanichi maayi buchi xaaꞌooch, Daawiti qanniiti xaaꞌooch Doono Yeerichi yaafee kexon Solomooni wonniye.

² Bi taateti awuddinnee natooba, guttinnee ageneexi guttinnee qemooba shuunoo wonneehe.

³ Solomooni yaafee kexon hakkiyoyich bi hecciiti heco wonnee qeelloona bi gidoo shiche hiroo, bi maaco hiye hiroone.

⁴ Kelli waan beeti gaaddaafee gidoo kechi maacichoommon hiye hiroo, bi neexo hiye hiroone. Bi maacoonoo gaawe aachoona dikkiihe.

⁵ Yaafee kechi kellin ciidee mixona tajjiihe; gaawe aachoonoo dikkiihe. Yeebbee michi shaahiyoonaa sansalatee shaahiyoononoo shuuniihe.

⁶ Kexonoo aaxxe xaqqoonaa Fariwayimee waati aachoona macecikkaa bi shuuneyemmon tuniihe.

⁷ Daabbeenaꞌon, kashiyeenaꞌon, kellee shaaqqeenaꞌonaa qoomeenaꞌonon aachoona dikkiihe. Daabbeenaꞌoochoo kiruubeenaꞌon shuuniihe.

⁸ Yaafe Xaaꞌeexi Yaafoonoo shuuniihe. Bi neexo yaafee kechi maacoochoommon hiye hiroo, bi maacoo hiye hiroone. Bi daabbeenaꞌonoo hiye hume kiilo giraam bede aachoona dikkiihe.

⁹ Aachee misimaareenaꞌoo aache sheqeel bedeenaꞌone. Kechi toommeexi kechi daabbeenaꞌonoo aachoona dikkiihe.

¹⁰ Yaafe Xaaꞌeexi Yaafooch gutte kiruuboon mixona shuuniihe. Eboshinoo aachoona dikkiihe.

¹¹ Kiruubeenaꞌochi qosheenaꞌo hiye hiroon yaggeetinaꞌone. Uuche hiroo tuneti ikke kiruuboochi ikke qoshoo kechi daabbooch tuggetone. Andoo uuche hiroo tuneti ebi kiruuboochi bare qoshoo bare kiruuboochi qoshoona danetone.

¹² Uuche hiroo tuneti guttinnee kiruuboochi qoshoo kechi daabbooch tuggetone. Wotta uuche hiroo tuneti bare bi qoshoo bare kiruubee qoshoona danetone.

¹³ Ebi kiruubeenaꞌochi qosheenaꞌo hiye hiroon yaggeetinaꞌone. Boonoshi aafoon kelli waan wochiꞌi, boonoshi baatoona neexetinaꞌone.

¹⁴ Shimaayito, dameroonaa ceelloona tuneti woshiqoona, wotta muttee tuppoochee ciciitaa yokkeeti woshiqoona shippeti qoreddoochee maccillaatoon shuuniihe. Ebi qoreddee toommooch kiruubo shuuneetone.

Gooshoochee Shuuneeti Gutte Giimbeenaꞌo

¹⁵ Boonoshi ikkikkoona boonoshi neexo shaashaa uuche hiroo tuneti gutte giimbeenaꞌon shuuniiꞌi, yaafee kechi aafooch neechiihe. Boonoshi toommi toommooch uuche hira bede muume mooyinaꞌo beetinaꞌone.

¹⁶ Giimbeenaꞌochi cillooch dabboommi sansalatee misileenaꞌonaa balle romaanee michi aafeenaꞌochi misileenaꞌona shuuneetinaꞌone.

¹⁷ Ebi giimbeenaꞌonoo yaafee kechi ciinooch, ikkoon deshi-waan, ikkoon wotta dambi-waan neechiihe. Deshi-waani giimboon Yakiini, wotta dambi-waani giimboon Boꞌaazi iꞌi shigiihe.