2 Kiinoo 29 - Kafa Linguistics Project

Yaafee Kexo Wochinnoon Yaafeyoo

¹ Hiziqiyaasi bi taatehooba, bi eeno hiyaa uuche natone. Yerusaalem beechii hiyaa yiixiye naton qeejjiye. Bi indee Abiyi getteehan; biyoo Zakaariyaasi busheene.

² Hiziqiyaasi bi qaabbechi Daawiti tuniitoommon, Doono Yeeri aafooch kaame mooyon tuniihe.

³ Hiziqiyaasi taateti, batti batti natooba, batti batti agenooch, Doono Yeerichi yaafee kechi kelloon qechiye; andiriinoo iye.

⁴ Qeesheenaꞌonaa Leweenaꞌonon deebiꞌi, aabi-keyo waan beeti addibaabooch kiciichii,

⁵ ishichiye: “Leweenaꞌote, hach ellebote; yaafeebote; ittoshi qaabbechinaꞌochi Nuggishoo Doono Yeerichi yaafee kexon yaafibote; eeꞌe mooyo bullinoo yaafee kexoochee kichibote.

⁶ No qaabbechinaꞌo gibeneyoo qajjitinaꞌone; Doono Yeeri aafoochaa gonde mooyon tuniitinaꞌone; biin qajjitinaꞌone; boonoshi aafoon Doono Yeerichi qemi xaaꞌoochee badd wochitinaꞌone; gubboonoo bi waan wochitinaꞌone.

⁷ Yaafee kechi kelleenaꞌon hiccitinaꞌone; ceecheenaꞌonoo takkitinaꞌone; yaafee kexoochaa Israꞌeelee Nuggishoyich ixaanoon shoohaaneenaꞌone; micciibeeti deejjoonoo deejjaaneenaꞌone.

⁸ Ebich Doono Yeeri kaaro Yihudee showoonaa Yerusaaleminooch kindiye. Ittoshi aafoona ittoshi beeggii beetoommon keqqooch, wuche getteyoonaa cooqqireyoonooch boonoshin beshiiꞌi immiye.

⁹ Ebichi naboona no qaabbechinaꞌo goraadoona dihiyeete; no anaami bushiisheenaꞌo, no maache bushiisheenaꞌonaa no mecheenaꞌona kecceheete.

¹⁰ Andoo bi kaaree shiixxoo no waanee bi wottemmoyich, Israꞌeelee Nuggishoo Doono Yeerina tookki wogoon gimoyich ta mulloona gabito taane.

¹¹ Ta bushiisheenaꞌote, bi aafooch neexeree ittoshi maddemmoyich, bi maddecho ittoshi tunemmonaa ixaanoon ittoshi shookkemmonoyich, Doono Yeeri ittoshin bi kaaccitoyich beeneyaahote” iye.

¹² Ebich Leweenaꞌo shuunoyich tiyiyeete; eboshiyoo: Qohaati yaroochee, Amasayi bushoo Mahaatinaa Azariyaasi bushoo Yoꞌeelina; Meraari yaroochee, Abidi bushoo Qiishinaa Yehaleleeli bushoo Azariyaasina; Gerishooni yaroochee, Zimaahi bushoo Yoꞌaahinaa Yoꞌaahi bushoo Edenina;

¹³ Elitsafaani yaroochee Shimiirinaa Yeꞌeelina; Asaafi yaroochee, Zakaariyaasinaa Mataniyina;

¹⁴ Hemaani yaroochee, Yehiꞌeelinaa Shimeꞌina; Yedutuuni yaroochee, Shemayaahinaa Uzeelinane.

¹⁵ Eboshiyoo boonoshi maneenaꞌon kiciꞌi, yaafeeheete. Doono Yeerichi qaaroona taatoo boonoshich gettitoommon, Doono Yeerichi yaafee kexon yaafiya giyiyeete.

¹⁶ Qeesheenaꞌo yaafoyich yaafee kechi maac giyiyeete. Doono Yeerichi yaafee kexoochee boonoshi daneti eeꞌe mooyo bullin Doono Yeerichi yaafee kechi addibaabooch kichiyeete. Leweenaꞌoo ebin shaaggii daammiꞌi, Qedirooni bambooch duppiyeete.

¹⁷ Boonoshiyoo batti batti agenee ikkinnee qemooba ebi yaafee shuunoon wonniyeete. Are agenee shimittinnee qemooba, Doono Yeerichi yaafee kechi kellooch beddaahaa shaggiyeete. Shimitte qemon Doono Yeerichi yaafee kexon yaafiyeete. Batti batti agenee aaraa shirittinnee qemooba, shuunoon ciichiyeete.

¹⁸ Aroochee Leweenaꞌo taatoo Hiziqiyaas waan waaꞌi, “Doono Yeerichi yaafee kexon, micciibeeti deejjoo giddeebeeti deejjee gudoonaa bi qiico bullinon, yaaree kosho koteebeeti madelloonaa bi qiico bullinon yaafito noone.

¹⁹ Taatoo Akaazi taateꞌi beebee, Yeerich gibeneyee qayona bi daammiti qiico bullin deebaꞌa yaafito noone. Ebi qiico Doono Yeerichi deejjee gudee aafooch beetone” iyeete.

²⁰ Taatoo Hiziqiyaasi maaddoona tiyii katemee iraasheenaꞌon kiciꞌi, Doono Yeerichi yaafee kexooch hammiye.

²¹ Boonoshiyoo taatoochi kechi asheenaꞌonaa Yihudee asheenaꞌonochi axaaxee deejjoyich, wotta yaafee kexon yaafoyich shabaatte wuron, shabaatte ogooge bagee baaddoon, shabaatte gishiishi bagee baaddoonaa shabaatte emmishee baaddoonon deebiyeete. Taatoo qeesheenaꞌo tuneti Harooni bushiisheenaꞌon deejjee gudoochaa Doono Yeerich boonoshi deejjemmoyich gettiye.

²² Boonoshiyoo wurinaꞌon guuriyeete; qeesheenaꞌo damoon daammiꞌi, deejjee gudee toommooch wuciyeete; aroochee ogooge bagee baaddeenaꞌon guuriꞌi damoon deejjee gudee toommooch wuciyeete; wotta gishiishi bagee baaddeenaꞌon guuriꞌi damoon deejjee gudee toommooch wuciyeete.

²³ Aroochee axaaxee deejjoyich tunemmi emmishee baaddeenaꞌon taatoonaa iiteenaꞌonochi aafooch giddiiheete. Boonoshiyoo boonoshi kishoon emmisheenaꞌo toommooch kotiiheete.

²⁴ Taatoo, micciibeeti deejjoonaa axaaxee deejjoona Israꞌeeleenaꞌo bullich bi giddemmoyich bi gettitoyich, qeesheenaꞌo emmisheenaꞌon guuriꞌi, Israꞌeeleenaꞌo bullichi axaaxoon bi maariyemmoyich, axaaxee deejjoon tuniiꞌi, damoon deejjee gudee toommooch giddiiheete.

²⁵ Taatoo Hiziqiyaasi, Daawitichi qociyoommon, yaaꞌechi Gaadinaa keemechi Naataaninochi qociyoommonoo, Leweenaꞌoyich qaaxilloon, ooge ximboonaa giishi ximboonon yechiiꞌi, Doono Yeerichi yaafee kexooch neechiye. Ebiyoo keemechinaꞌona Doono Yeer waanee icheti getoone.

²⁶ Leweenaꞌoo Daawitichi shoddee qiiceenaꞌon, qeesheenaꞌo boonoshi tiri tiroon yechiꞌi, qannii neexeheete.

²⁷ Ebiyee gubb, Hiziqiyaasi micciibeeti deejjoo deejjee gudee toommoochaa bi deejjeyemmoyich gettiye. Micciibeeti deejjoo giddemmona, asheenaꞌo Doono Yeerich shoddoon shoddeheete; tiroo hukkehe; Israꞌeelee taatoo Daawitichi shoddee qiicoo yexxeehe.

²⁸ Iitoo bulliyoo goyinnehe. Deejjoo miccii ciiremmi wottoon shoddechinaꞌoo shoddeheete; tiroon huggechinaꞌoo huggiyeete.

²⁹ Deejjoo giddee ciiremmona, taatoonaa biinna tookkii beeto bullina yittiꞌi, goyinneheete.

³⁰ Taatoo Hiziqiyaasinaa bi iraasheenaꞌona Leweenaꞌona kooreeti, Daawitinaa yaaꞌechi Asaafina kichiti galletee shoddeenaꞌon shoddoona Doono Yeerin boonoshi galletemmoyich, gettiyeete. Boonoshiyoo emiroona shoddee galleteheete; yittiꞌinoo goyinneheete.

³¹ Aroochee Hiziqiyaasi “And Doono Yeerich ittoshi qelloon yaafito ittoshine. Ebich gidderee, galletoon bechoyich deejjoonaa buuroonon Doono Yeerichi yaafee kexooch deebote” iye. Iiteenaꞌoo taatoo gettitoommon tuniiheete. Boonoshi mullo daaggitinaꞌo bulli micciibeeti deejjoyich gijjoon deebiyeete.

³² Iiteenaꞌo deebiti, micciibeeti deejjoo, shabe wuro, balle ogooge bagee baaddoonaa gutte balle gishiishi bagee baaddoonane. Ebi bulli Doono Yeerich micciibeeti deejjoone.

³³ Wotta deejjoyich, shiritte balle wuronaa keejje hume bagoonon giddiiheete.

³⁴ Qeesheenaꞌo micciibeeti deejjoon gaxxoyich giishecheenaꞌo boonoshi tunetoyich, shuunoo ciiremmi wottoon, wotta bare qeesheenaꞌo boonoshi qelloon yaafimmi wottoon, boonoshi maneenaꞌo tuneti Leweenaꞌo boonoshin gaacheheete. Ebiyoo Leweenaꞌo boonoshi qelloon xalliyoona qeesheenaꞌoyee boonoshi beshitoyichiye.

³⁵ Woddoo tuneti micciibeeti deejjoyee baroo ikkittinee deejjee awuyonaa micciibeeti deejjoona tookkii giddeebeeti uyee deejjoona, giddee beetone. Ebiyoommon Doono Yeerichi yaafee kechi maddoo wottee yeshehe.

³⁶ Hiziqiyaasinaa asheenaꞌo bullina, mooyo bulli ebiyoommon kaateree bi qannemmoyich Doono Yeeri boonoshin bi gaachetoyich emiriyeete.