2 Kiinoo 28 - Kafa Linguistics Project

Yihudee Taatoo Akaazi Mooyo

¹ Akaazi bi taatehooba, bi eeno hiye natone. Yerusaalem beechii aaraa shiritte naton qeejjiye. Biyoo bi qaabbechi Daawitichoommon Doono Yeeri aafooch kaame mooyon tuniyaanoone.

² Israꞌeelee taateenaꞌochi gommon dabbiye. Baꞌaaloyich shahalleenaꞌon shuunehe.

³ Hinoomi bushoo bamboochaa ixaanoon shookkiye. Doono Yeeri Israꞌeeleenaꞌo aafoochee yookkii kichiti aageteenaꞌochi ciigiiti doyoon dabboona bi anaami bushiisheenaꞌon qaaqqooch goggiꞌi deejjiye.

⁴ Guudi toommeexi goyinnee xaaꞌeenaꞌoochaa, geppeenaꞌonaa waajjechi michi baatoo bullinoochaa deejjoon deejjiye; ixaanoonoo shookkiye.

Sooriyeenaꞌonaa Israꞌeeleenaꞌona Yihudee Asheenaꞌon Koyo

⁵ Ebich bi Nuggishoo Doono Yeeri Sooriyee taatoo kishooch biin beshiiꞌi immiye. Sooriyeenaꞌoo boonoshin kochii wochiꞌi, meeti asheenaꞌon keccii Damaasiqa daammiyeete. Wotta Doono Yeeri boonoshin Israꞌeelee taatoo kishooch beshiiꞌi immiye. Biyoo gonde yexon boonoshin yexxiye.

⁶ Yihudee asheenaꞌo boonoshi qaabbechinaꞌochi Nuggishoo Doono Yeerin boonoshi qajjitoyich, Remaliyi bushoo Feqaahi ikke qemooch Yihudee asheenaꞌoochee balli hiye hume ginee naayinaꞌon wuxiye; eboshi bulli ginee anaaminaꞌone.

⁷ Zikiri getteebeeti ikke giidechi Efreemee ginee naayo taatoochi bushoo Maseyaahin, taatee kechi iraashoo Aziriqaaminaa taatoochi hilleexi iraashoo tuneti Eliqaaninon wuxiye.

⁸ Yihudee asheenaꞌo boonoshich meechi xibeenaꞌo boonoshi tunetaanoona Israꞌeeleenaꞌo gutte balle hume genneenaꞌon, anaami bushiisheenaꞌonaa maache bushiisheenaꞌonon kecciyeete. Ebiyoommon wodde kecoonoo yechiꞌi, Shamaara wotteheete.

Keemechi Odeedi Mooyo

⁹ Are Shamaara Odeedi getteebeeti Doono Yeerichi keemecho beehe. Shamaara waabeeti ginee naayinaꞌona daneya hammiꞌi, boonoshich ishichiye: “Ittoshi qaabbechinaꞌochi Nuggishoo Doono Yeeri Yihudee asheenaꞌon bi kaaretoyich, ittoshi kishooch boonoshin beshiiꞌi immiye. Ittoshiyoo ariqqaalloon boonoshin wuxiyote.

¹⁰ Andoo ittoshi, Yihudee showoonaa Yerusaaleminooch beeti anaaminaꞌonaa maacheenaꞌonon guuno tunii hajjiya gabiibeeto ittoshine; ebin tuniyoona, ittoshiyoo wotta ittoshi Nuggishoo Doono Yeerin xuqqii toone ittoshi beeto?

¹¹ Illa waayebote. Doono Yeerichi kaaree shiixxoo ittoshi toommooch bi aaxxetoyich, kecciꞌi ittoshi deebiti ittoshi xibeenaꞌon wochibote” iye.

¹² Wotta Efreemee iraasheenaꞌoochee ikkikkeenaꞌo, eboshiyoo Yehohanaani bushoo Azariyaasi, Meshilemooti bushoo Beraakiyi, Shaluumi bushoo Yehiziqiyasinaa Hadilaayi bushoo Amaasina koyoochee wottee beetinaꞌon kaareꞌi,

¹³ “Ebi keceenaꞌon no waan deebaahote; axaaxoon shuunaꞌa Doono Yeerin no xuꞌona, bi kaaree shiixxoo no toommooch bi kindemmoyich tuniito noone. Andoo xuꞌoon daakki no shuunemmoyich qaawii beetote?” iyeete.

¹⁴ Ginee naayinaꞌoo kecceti asheenaꞌonaa qiicoonon iraasheenaꞌonaa iitoo bullina aafoochaa gawukkiyeete.

¹⁵ Ebi boonoshi shigo kooreeti asheenaꞌo kecceti asheenaꞌo kishoon deqqiꞌi, boonoshi daggoochee shokkaacheenaꞌoyich, kecceti qiicoochee tajjiyeete; caammoon boonoshi baatooch geddiyeete; maayoonaa uyoonon immiyeete; boonoshi mayochoo zayitoon huuttiyeete; baatoona hamon mawiitinaꞌon kureenaꞌooch yebbiiheete. Yeebbee mixo beeti Yaariki katemooch, boonoshi xibeenaꞌo waan wochii daammiyeete. Aroochee Shamaara wotteheete.

Asooree Taatoochi Gaachoon Akaazi Echo

^16-17 Edoomee asheenaꞌo wochinnoon Yihudee showoon kochiꞌi asheenaꞌon keccii boonoshi daammitoyich, ebiyooba taatoo Akaazi gaachoon qaawiꞌi, Asooree taatoo waan wochoon daachiihe.

¹⁸ Filsixeemeenaꞌo wotta Shefeeli worebe showoonaa Negeebi barahoonooch beeti Yihudee showoon kochiyeete; Beet Shemeeshi, Ayalooninaa Gederootina getteebeeti katemeenaꞌon, wotta Sokoohinaa bi guudoona beeti gafeenaꞌonon, Timinaahinaa bi guudoona beeti gafeenaꞌonon, Gimizinaa bi guudoona beeti gafeenaꞌonon kochii yechiꞌi arooch koteheete.

¹⁹ Yihudee taatoo Akaazi gonde mooyon Yihudee showooch bi ceechoona Doono Yeerich gibeneyoon bi qajjitoyich, Doono Yeeri Yihudee showoon giishiihe.

²⁰ Asooree taatoo Tigilaat Fileseeri bi waan waaꞌi biin xuuxiihalli, biin gaacheyaanoone.

²¹ Akaazi Doono Yeerichi yaafee kexoochee, taatee kexonaa bi iraasheenaꞌo kexonoochee aaxxe mooyon daammiꞌi Asooree taatoyich immiye; tunebaani ebiyoo biich gaacaanoone.

Akaazi Axaaxoon Shuuno

²² Taatoo Akaazi bi xuuxehooba, aafichoyee beshoon Doono Yeerich gibeneyoon qajjiye.

²³ Biyoo “Sooriyee taateenaꞌochi nuggisheenaꞌo Sooriyeenaꞌon boonoshi gaachetoyich, boonoshich deejjoon ta deejjigaata, taanoo gaachemminaꞌone” iꞌi biin kochii wochiti Sooriyee nuggisheenaꞌoyich deejjoon deejjiye. Tunebaani ebi, biinnaa Israꞌeelee showoonoyich aalloon deebiye.

²⁴ Akaazi Yeerichi yaafee kechi qiico bullin kiciꞌi daammii tiichiye. Doono Yeerichi yaafee kechi kelloonoo hicciye. Yerusaalem, xaaꞌoo bulliich deejjee gudoon shuunehe.

²⁵ Yihudee katemoo bulliich bare nuggisheenaꞌoyich ixaano shookkeyemmi geppeexi goyinnee xaaꞌeenaꞌon shuunehe. Ebina bi qaabbechinaꞌochi Nuggishoo Doono Yeerin ippiihe.

²⁶ Akaazi shuuneti eche shuunoonaa bi tuniiti mooyo bullina batti battichoochee tiijjii ciireexooch beddaahaa, Yihudee taateenaꞌonaa Israꞌeelee taateenaꞌonochi kiinee macaafooch kooreetone.

²⁷ Akaazi qitiꞌi bi qaabbechinaꞌo waan xaꞌeehe; Yerusaalem duukkehe. Tunebaani taatee maashooch duukkeyaanoone. Bi bushoo Hiziqiyaasi bi xaaꞌooch kereeꞌi taatehe.