2 Kiinoo 27 - Kafa Linguistics Project

Yihudee Taatoo Yotaami Mooyo

¹ Yotaami bi taatehooba, bi eeno hiyaa uuche natone. Yerusaalem beechii aaraa shiritte naton qeejjiye; bi indee Yeruushi getteehan; biyoo Sadooqi busheene.

² Yotaami bi nihoo Uziyaahi tuniitoommon, Doono Yeeri aafooch kaame mooyon tuniihe. Biyoo bi nihoochoommon, Doono Yeerichi yaafee kexooch giyaanoone. Tunetaa asheenaꞌo andoo gondoon shuunee toommoochiye boonoshi beeto.

³ Yotaami Doono Yeerichi yaafee kechi dambee kelloon shuunehe. Ofeeli geppeexi uxerooch wodde shuunoon shuunehe.

⁴ Geppechi Yihudee showooch katemeenaꞌon shuunehe. Kubbechi xaaꞌeenaꞌoochoo mishigeenaꞌonaa dilaaleenaꞌonon shuunehe.

⁵ Biyoo Amoonee taatoonaa bi ginee naayinaꞌona koyeꞌi boonoshin kochii wochiye. Aroobee natooch, Amoonee asheenaꞌo keejje humaa awudde balle kiilo giraamee xure birewoon, aashire hume xaanee teepphoonaa aashire hume xaanee sheqoonon biich immiyeete. Amoonee asheenaꞌo ebiyoommon guttinnee natonaa keejjinnee natonooch tuniiheete.

⁶ Yotaami bi Nuggishoo Doono Yeeri aafooch gibeneyoona kechii giyii bi itoyich, giidechi taatoon tunehe.

⁷ Yotaami shuuneti eche shuunoo, bi koyeti koyo bullinaa bi tuniiti mooyona Israꞌeelee taateenaꞌonaa Yihudee taateenaꞌonochi kiinee macaafooch kooreetone.

⁸ Bi taatehooba, bi eeno hiyaa uuche natone. Yerusaalem beechii aaraa shiritte naton qeejjiye.

⁹ Yotaami qitii bi qaabbechinaꞌo waan xaꞌeeꞌi, Daawiti Katemooch duukkehe. Bi bushoo Akaazi bi xaaꞌooch kereeꞌi taatehe.