2 Kiinoo 26 - Kafa Linguistics Project

Yihudee Taatoo Uziyaahi Mooyo

¹ Yihudee asho bulli bi eeno aaraa shiritte nato tuneti Uziyaahin daammiꞌi, bi nihoo Amasiyaasi keroon taatiihe.

² Uziyaahi Elaati katemoon kochii yechii, wochinnoon shuuneꞌi, Yihudee showooch bi wochito, bi nihoo taatoo Amasiyaasi qitiꞌi, bi qaabbechinaꞌo waan bi xaꞌeetoyee gubbiye.

³ Uziyaahi bi taatehooba, bi eeno aaraa shiritte natone. Yerusaalem beechii aachaa gutte naton qeejjiye. Bi indee Yekoliyi getteehan; biyoo Yerusaalemi asheene.

⁴ Uziyaahi bi nihoo Amasiyaasi tuniitoommon, Doono Yeeri aafooch kaame mooyon tuniihe.

⁵ Yeerin shaton biich dojjiti Zakaariyaasi kashoona beeti yemeenooch Yeerich gibeneeton tunehe. Doono Yeerich gibeneeton bi tunetooba, Yeeri mooyon biich mashaamiihe.

⁶ Uziyaahi hammiꞌi, Filsixeemeenaꞌona koyehe. Gaati uxeroon, Yabineehi uxeroonaa Ashidoodi uxeroonon happiye. Ashidoodi gaꞌooch beeti showoonaa Filsixeemee showoonoochoo katemeenaꞌon shuunehe.

⁷ Doono Yeeriyoo Filsixeemeenaꞌon Guribaꞌaali beeti Arabeenaꞌonaa Meꞌuneenaꞌonon bi kochemmoyich biin gaachehe.

⁸ Amoonee asheenaꞌoo Uziyaahich gibiroon qocciyeete. Uziyaahi oogichii bi kupphetoyich bi mooyo Gibitsee showee danooch beddaahaa waayeehe.

⁹ Uziyaahi Yerusaalemi Uxeree Daneexi Kellooch, Bambee Uxeree Kelloonaa uxeree danoonochi gaꞌooch dilaaloon shuuneꞌi katemoon manjiihe.

¹⁰ Meeti gijjeenaꞌo biich beetoyich, barahooch, Shefeeli worebe showoonaa angeshoonooch dilaaloon shuunehe. Meeti aachi oppoonoo iijjiye. Goyoon shunnii bi beetoyich, geppe xaaꞌoonaa qeemi showoonooch gochechinaꞌonaa bechechinaꞌona biich beetinaꞌone.

¹¹ Uziyaahich koyoyich qanniti ginee naayinaꞌo beetinaꞌone. Taatoo iraashiiti iraashoo Hanaaniyichi getoona, ukkiroo Maseyaahinaa koorechi Yeꞌeelichi kishoona boonoshi haddeetoommon koyooch boonoshi haddi haddoona kechii beeheete.

¹² Ginee naayinaꞌo toommooch ukkireti yaree iraasheenaꞌo gutte humaa shiritte balleenaꞌone.

¹³ Boonoshi kishooch keejje ballaa shabaatte humaa uuche balle ginee naayinaꞌo beetinaꞌone; eboshiyoo taatoon bi etteenaꞌo waanee quyoyich oogeti giidechi, bedditi asheenaꞌone.

¹⁴ Uziyaahi, ginee naayo bullich gaachoon, ginoon, xuuree ukoon, ginee qiicoon, maꞌoonaa xeppellee xaqqoonon qanniihe.

¹⁵ Shuuna ariyechinaꞌo, Yerusaalemaa, dilaaloonaa katemee uxeree goconochi toommoochaa shangoonaa ogooge xaqqoonon dufoyich gaacciibeeti mooyinaꞌon boonoshi shuunemmoyich tuniihe. Doono Yeeri biin gaachetoyich, kupphehe. Bi mooyo bulli xaaꞌooch waayeehe.

Uziyaahi Bi Geecee Naboona Naxeyoo

¹⁶ Tunebaani Uziyaahi kupphe taatoo bi tunetoyee gubb, geeciye. Ebi bi geecoo bi dihoyich naboo tunehe. Biyoo bi Nuggishoo Doono Yeerin xuqqiye. Ixaanee deejjee gudoochaa ixaanoon shookka Doono Yeerichi yaafee kexooch giyiye.

¹⁷ Qeeshoo Azariyaasi maaci kuxe shinne Doono Yeerichi qeesheenaꞌona tookkii dabbii yaafee kexooch giyiye.

¹⁸ Boonoshiyoo, “Uziyaaho, ixaanee shooho yaafeeti, Haroonichi shiijjereenaꞌo tuneti qeesheenaꞌochoani, Doono Yeerich ixaanoon shooho neech qaawiyaache. Xuqqeto neene. Yaafee kexoochee keye. Ne Nuggishoo Doono Yeer waanee oogoon daneyaachemmo neene” iyeete.

¹⁹ Ixaanoon shookka, ixaano shookkeebeeti qiicoon yechiꞌi neexeti Uziyaahi qeesheenaꞌo toommooch oogichii kaarehe. Qeesheenaꞌon bi kaaremmona, qeesheenaꞌo aafooch Doono Yeerichi yaafee kechi ixaanee deejjee gudee gaꞌooch neexeꞌi bi beetaa, bi barooch qeddee shaddee biiyo kechiye.

²⁰ Qeeshee guudo Azariyaasinaa qeesheenaꞌo bullina bi barooch beeti qeddee shaddee biiyoon beeggiꞌi, kaateree aroochee bi kechemmon tuniiheete; biyoo wotta Doono Yeeri biin naxeto bi tunoon ariiꞌi, kecha afaafinehe.

²¹ Uziyaahi bi qitimmi wottoon, qeddee shaddee biiyechon tuneꞌi beehe. Qeddee shaddee biiyecho bi tunetoyich, Doono Yeerichi kexoochee bi wokkemmoyich tuniitaa, bariti kexooch beehe. Bi bushoo Yotaami taatee kexooch beechi showoon qeejjii beehe.

²² Uziyaahi shuuneti eche shuunoon batti battichoochee tiijjii ciireexooch beddaahaa, Amootsi bushoo keemechi Isiyaasi kooritone.

²³ Uziyaahi qitiꞌi bi qaabbechinaꞌo waan xaꞌeehe. “Qeddee shaddee biiyechone” iꞌi taateenaꞌochi oppee maashee gaꞌooch beeti xaaꞌooch biin duukkiyeete. Bi bushoo Yotaami bi xaaꞌooch kereeꞌi taatehe.