2 Kiinoo 25 - Kafa Linguistics Project

Yihudee Taatoo Amasiyaasi Mooyo

¹ Amasiyaasi bi taatehooba, bi eeno hiyaa uuche natone. Yerusaalem beechii hiyaa yiixiye naton qeejjiye. Bi indee Yehoꞌadiini getteehan; biyoo Yerusaalemi asheene.

² Amasiyaasi Doono Yeeri aafooch kaame mooyon tuniihe; tunebaani bi ceeni mulloona toonoone.

³ Amasiyaasi taatittino bi kishooch manjitoyee gubb, taatoo bi nihoon wuxiti iraasheenaꞌon wuxiye.

⁴ Tunebaani Doono Yeeri Muusichi Sheeree Macaafoochaa “Niheenaꞌo boonoshi bushiisheenaꞌo shuuneti gonde mooyoyich qitaayeete; bushiisheenaꞌoo boonoshi niheenaꞌo shuuneti gonde mooyoyich qitaayeete. Asho bi qelli qelloona bi shuuneti axaaxoyich qitibe” iꞌi bi gettitoommon, boonoshi bushiisheenaꞌon wuxaanoone.

Edoomeenaꞌona Tookkii Koyeeti Koyo

⁵ Aroochee Amasiyaasi Yihudee asheenaꞌon ikkooch kiciye. Yihudee asho bullinaa Biiniyaamee asho bullinon boonoshi yari yaroona humee iraasheenaꞌonaa ballee iraasheenaꞌonochi kishooch qoodiye. Hiye natonaa ebiyee damboona tuneti Yihudee asheenaꞌonaa Biiniyaamee asheenaꞌonon haddiye. Koyoyich qanniti, gaachoonaa ginoonon yeshon hakkiti keejje balle hume aricheti asheenaꞌon danehe.

⁶ Biyoo daakkiꞌi, keejje humaa awudde balle kiilo giraamee birewoona ginee anaaminaꞌo tuneti, ikke balle hume Israꞌeelee ginee naayinaꞌon kiraayiye.

⁷ Tunebaani ikke Yeer asho bi waan waaꞌi biich ishichiye: “Taatoocho, Doono Yeeri Israꞌeeleenaꞌonaa Efreemeenaꞌona tookkii tuno bi qajjitoyich, Israꞌeelee ginee naayinaꞌo neenna tookki hammaayeete.

⁸ Tunebaani, ‘Koyoochaa taan kupphiyemminaꞌone’ iyaa gabaꞌa ne hamigaata, gaachee wodiyoyich woyee kochii dichoyich hakkoo beeto Doono Yeerich bi tunetoyich, Doono Yeeri ne etteenaꞌo aafooch neen dichemmone” iye.

⁹ Amasiyaasiyoo Yeer ashoyich, “Israꞌeelee ginee naayinaꞌoyich ta immeti ebi shaahe gijjochi aabicheeba?” iye. Yeer ashoo, “Doono Yeeri ebiyee beshoon neech imon hakkiye” iꞌi wochiye.

¹⁰ Aroochee Amasiyaasi, kiraayee waati ginee naayinaꞌon boonoshi showooch wotteree boonoshi hammemmoyich tuniihe. Boonoshiyoo Yihudee asheenaꞌo toommooch oogeton ippeꞌi, kaaroona boonoshi showooch wottee hammiyeete.

¹¹ Amasiyaasiyoo kuppheꞌi, bi ginee naayinaꞌon yechiꞌi, Kiikki bambooch hammiye. Aroochaanoo aashire hume Edoomee ginee naayinaꞌon wuxiyeete.

¹² Yihudee ginee naayinaꞌo aashire hume asheenaꞌon kecciyeete. Qaaꞌee toommooch daammiꞌi, aroochee dugilla awureheete. Asheenaꞌo bulliyoo xaqqooch kindii ceqqee qitiyeete.

¹³ Tunebaani Amasiyaasi koyooch biinna tookki boonoshi hamaachemmoyich, bi bajjiti ginee naayinaꞌo Shamaaree tiijjii Beet Horoon beddaahaa beeti Yihudee katemeenaꞌon kochiyeete. Ebi katemeenaꞌoochee keejje hume asheenaꞌon wuxii, meeti mooyon keccii daammiyeete.

¹⁴ Amasiyaasi Edoomeenaꞌon wuxiꞌi bi wottehooba boonoshi shahalleenaꞌon deebiye; deebii neechiꞌi bi nuggisheenaꞌon tuniihe; boonoshichoo goyinnee maddehe; ixaanoonoo shookkiye.

¹⁵ Ebich Doono Yeeri kaaro Amasiyaasi toommooch aaxxehe. Biyoo Amasiyaas waan keemechon deejjiye; keemechoo waaꞌi, “Boonoshi asheenaꞌon ne kishoochee wodiyoon hakkaani aageteenaꞌochi nuggisheenaꞌoyich ne goyinneto amoyichiye?” iye.

¹⁶ Tunebaani getooch bi beetaa taatoo, “Neen taatoochi mikkirecho tuniyaꞌa ukkiriito noone? Cikkibe; qitiya ne qaawaabeeto amoyichiye?” iye. Keemechoo cikkiye; aroochee, “Ebin ne tuniitoyich, ta ciicoonoo waayo ne qajjetoyich, Doono Yeeri neen aalliiya bi maacon and ariite” iye.

Israꞌeeleenaꞌo Yihudee Asheenaꞌon Kochii Wochoo

¹⁷ Aroochee Yihudee taatoo Amasiyaasi bi mikkirechinaꞌona koceeꞌi, “Eke wobe danebone” iꞌi koyoon tiijjoyich, Yehi bushoo Yoꞌakaazi bushoo Israꞌeelee taatoo Yehoꞌash waan wochoon daachiihe.

¹⁸ Tunebaani Israꞌeelee taatoo Yehoꞌashi Yihudee taatoo Amasiyaasich ishichiꞌi wochiye: “ ‘Libanoosi guudinaꞌooch beeti tusho, “Ne busheen ta bushoo shaaggemmoyich imbe” iꞌi, Libanoosi guudinaꞌooch beeti yigoyich wochoon daachiihe. Aroochee Libanoosi guudinaꞌooch beeti kubbi cooxo aroona besheebee, tushoon neexxii wuxiye’ wone.

¹⁹ ‘Edoomin kocheto taane’ iyaꞌa ne mulloona geecito neene. Illa and ne kexooch kasheree kotebe. Neennaa Yihudee asheenaꞌona iritooch dihemmoyich ne qaawaabeeto, amoyichiye?” iye.

²⁰ Tunebaani Amasiyaasi ebin deꞌa iꞌi waayeyaanoone; ebiyoo Edoomeenaꞌochi nuggisheenaꞌo waan boonoshi wottetoyich, boonoshi etteenaꞌo kishooch beshiiꞌi boonoshin imoyich Doono Yeerichi daaggoo bi tunetoyichiye.

²¹ Ebina Israꞌeelee taatoo Yehoꞌashi Yihudee taatoo Amasiyaasina koyeya kechiye; boonoshiyoo Yihudee showooch beeti Beet Shemeeshaa daneꞌi koyeheete.

²² Israꞌeeleenaꞌo Yihudee asheenaꞌon koyaa, asho bi ikkikkoona bi kexi kexooch woccii aallehe.

²³ Aroochee Israꞌeelee taatoo Yehoꞌashi, Akaziyaasi bushoo Yoꞌaashi bushoo Yihudee taatoo, Amasiyaasin Beet Shemeeshee keccii, Yerusaalem deebiye. Yerusaalemi xaqqee uxeroonoo Efreemi Kelloochee tiijjii Uxeree Daneexi Kellooch beddaahaa, awudde balle hira bedoon happiye.

²⁴ Aachoonaa birewoo bullinon, Obeed Edoomichi yareenaꞌo quyeebeeti Doono Yeerichi yaafee kechi qiiceenaꞌon, ebiyoommon wotta taatee kechi qiicee kexinaꞌonooch beeti aaxxe qiico bullin, yechiyoo tuniyoyich bi kecciti asheenaꞌonoo yechiꞌi Shamaara wottehe.

²⁵ Israꞌeelee taatoo, Yoꞌakaazi bushoo Yehoꞌashi qititoyee gubb, Yoꞌaashi bushoo Yihudee taatoo Amasiyaasi aaraa uuche naton beehe.

²⁶ Amasiyaasi shuuneti eche shuunoo batti battichoochee tiijjii ciireexooch beddaahaa, Yihudee taateenaꞌonaa Israꞌeelee taateenaꞌonochi kiinee macaafooch kooreetone.

²⁷ Amasiyaasi Doono Yeerichi gommon bi qajjiti aaboochee tiijjiꞌi, asheenaꞌo biin wuxoyich Yerusaalemaa koceeheete. Aroochee Amasiyaasi Lakish muriccii hammiye. Tunebaani boonoshi bi hillooch ashoon daachiiꞌi, aroochaa biin wuxiiheete.

²⁸ Bi dubenoon haresheenaꞌona Yerusaalem deebiyeete. Daawiti Katemooch beeti bi qaabbechinaꞌo maashooch duukkehe.