2 Kiinoo 24 - Kafa Linguistics Project

Yihudee Taatoo Yoꞌaashi Mooyo

¹ Yoꞌaashi bi taatehooba, bi eeno shabaatte natone. Biyoo Yerusaalem beechii aabbe naton qeejjiye. Bi indee Tsibiyi getteehan. Biyoo Beershaabee asheene.

² Yoꞌaashi qeeshoo Yoyaadi kashoona beeti yemeeno bulliich Doono Yeeri aafooch kaame mooyon tuniihe.

³ Yoyaadiyoo gutte mecheen bi shaaggemmoyich tuniihe; biyoo maache bushiishoonaa anaami bushiishoonon shiyihe.

⁴ Ebiyee gubb, Yoꞌaashi Doono Yeerichi yaafee kexon andiriiya gabiye.

⁵ Qeesheenaꞌonaa Leweenaꞌonon kiciꞌi, “Yihudee katemeenaꞌooch hamiree, no Nuggishoochi yaafee kexon nati natona andiriyee gijjoon Israꞌeeleenaꞌo bulli waanee kichiibote; ebinoo and tuniibote” iye. Tunebaani Leweenaꞌo nibbeheete.

⁶ Ebich taatoo boonoshi wulloo Yoyaadin ceeggiꞌi, “Israꞌeelee iiteenaꞌo miixee duukkaanoyich boonoshi qoccemmi, Doono Yeerichi guuno Muusi gettiti gibiroon, Yihudee asheenaꞌonaa Yerusaalemi asheenaꞌona waanee boonoshi kichiyemmoyich Leweenaꞌon kupphiyoo ne qajjeto amoyichiye?” iye.

⁷ Ebiyooba gonde ure Ataaliyi bushiisheenaꞌo, Doono Yeerichi yaafee kexon boonoshi tiichitoyichiye; Doono Yeerichi yaafee kechi yaafe qiiceenaꞌonoo Baꞌaaleenaꞌochi maddooch boonoshi heechemmoyich tuniitinaꞌone.

⁸ Taatoochi getoona saaxenoon shuuneꞌi, Doono Yeerichi yaafee kechi kellee maach kotiiheete.

⁹ Doono Yeerichi guuno Muusi Israꞌeeleenaꞌo qoccemmoyich barahoochaa bi gettiti gijjoon Doono Yeerich boonoshi deebemmoyich Yihudee showoonaa Yerusaaleminooch awaajjoon gettiyeete.

¹⁰ Asheenaꞌo bullinaa boonoshi ukkireenaꞌona emiroona boonoshi gibiroon deebiꞌi saaxenooch ceechiyeete.

¹¹ Saaxeno Leweenaꞌo kishoona taatoochi iraasheenaꞌo waan waataa, arooch gijjoo ceenon boonoshi beeggiyooba, taatoochi koorechonaa qeeshee guudoochi aafee bushoona waaꞌi birewoon saaxenoochee kichii beeheete. Saaxenoonoo bi xaaꞌooch wochii beeheete. Ebiyoommon qemi qemona tuniiꞌi, wodde gijjoon kiciyeete.

¹² Taatoonaa Yoyaadina Doono Yeerichi yaafee kexon boonoshi shuuniyemmoyich kaacheti asheenaꞌoyich ebi gijjoon immiyeete. Boonoshiyoo Doono Yeerichi yaafee kechi shuunoyich xaqqoon xarii beetinaꞌonaa anaaxeenaꞌonon, ebiyoommon wotta Doono Yeerichi yaafee kexon shuunoyich gooshoonaa xuuroonon ukkiibeeti shuunechinaꞌon kiraayiyeete.

¹³ Shuunee toommooch beeti shuunechinaꞌo kupphe shuunechinaꞌo boonoshi tunetoyich, shuunoo boonoshi kishoona qanniye. Doono Yeerichi yaafee kexonoo wochinnoon shuuneꞌi, wonnee bi goorooch wochiyeete; manje kexon tuniiheete.

¹⁴ Shuunoon boonoshi ciichitoyee gubb, eche gijjoon taatoonaa Yoyaadina waan deebiyeete. Boonoshiyoo ebi aachoonaa birewoona Doono Yeerichi yaafee kechi qiicoyich, maddoonaa micciibeeti deejjoonoyich heechiibeeti saaneenaꞌonaa baribare qiiceenaꞌonoyich tuniiheete. Yoyaadi kashoona beeti yemeeno bulliich Doono Yeerichi yaafee kexooch micciibeeti deejjoo giddee beehe.

¹⁵ Yoyaadi geenee baayeꞌi qitiye. Bi qitiyooba, bi eeno balli shaashe natone.

¹⁶ Biyoo Israꞌeeleenaꞌoyich, Yeerinaa bi yaafee kexonoyich gaawe mooyon bi shuunetoyich, biin Daawiti Katemooch beeti taateenaꞌochi maashooch duukkiyeete.

Yoꞌaashi Shuuneti Gonde Shuunoo

¹⁷ Yoyaadi qititoyee gubb, Yihudee iraasheenaꞌo waa taatoyich oogoon immiꞌi, taatoo boonoshi ciicoon bi waayemmoyich tuniiheete.

¹⁸ Aroochee boonoshi qaabbechinaꞌochi Nuggishoo Doono Yeerichi yaafee kexon qajjiichii, Asheeri misileenaꞌonaa shahalleenaꞌoyich goyinnee maddooch giyiyeete. Ebi boonoshi xuꞌee naboona Yihudee showoonaa Yerusaaleminooch kaaro kindiye.

¹⁹ Bi waan boonoshin wochoyich Doono Yeerichi keemechinaꞌon boonoshi waan deejjii beehe. Keemechinaꞌoo boonoshich miixeheete. Tunebaani waayemmon qajjiyeete.

²⁰ Doono Yeerichi Ayaano qeeshoo Yoyaadi bushoo Zakaariyaasi toommooch waahe. Biyoo bekke xaaꞌooch neexeechii, “Yeeri ishichiye: ‘Doono Yeeri ta getoon ittoshi shaaddeebeeto amoyichiye? Illa and ittoshich kaameyaachemmone. Doono Yeeri taan ittoshi qajjitoyich, tawoo ittoshin qajjeto taane’ itone” iye.

²¹ Tunebaani boonoshi bi toommooch koceeheete; taatoochi getoona Doono Yeerichi yaafee kechi addibaaboochaa xaqqoona yexxiꞌi biin wuxiyeete.

²² Taatoo Yoꞌaashi, Zakaariyaasi nihoo Yoyaadi biich deeti deꞌoon batteꞌi, Zakaariyaasin wuxiihe. Zakaariyaasiyoo bi qitiyooba, “Doono Yeeri ebin ciiniree, ne toommooch nallibe” iye.

Yoꞌaashichi Taatee Yemeenee Ciiro

²³ Nati ciirooba Sooriyee ginee naayinaꞌo Yoꞌaashin kocha waaheete. Yihudee showoonaa Yerusaaleminooch waaꞌi, asheenaꞌo daggoochee ukkireenaꞌo bullin wuxii aalliiheete. Meeti mooyon kecciꞌi taatoyich, Damaasiqa daammiyeete.

²⁴ Sooriyee ginee naayinaꞌo giishecheenaꞌo boonoshi tunetaanoona, Doono Yeeri dofee ginee naayinaꞌon boonoshi kishooch beshiiꞌi immiye. Ebi tuneto, boonoshi qaabbechinaꞌochi Nuggishoo Doono Yeerin boonoshi qajjitoyichiye. Ebina Yoꞌaashi toommooch tate nalloo nalleehe.

²⁵ Boonoshiyoo Yoꞌaashin qaakkii kochiꞌi mayiitinaꞌone. Sooriyee ginee naayinaꞌo aroochee boonoshi wotteechaa, bi naayinaꞌo bi toommooch koceeꞌi, bi qeenooch bi beetaa, biin wuxiyeete. Ebiyoo qeeshoo Yoyaadi bushoon bi wuxitoyichiye. Ebina biyoo qitiye. Biinoo Daawiti Katemooch duukkiyeete; tunebaani taateenaꞌochi maashooch duukkeyaanoone.

²⁶ Bi toommooch koceetinaꞌoo Amoonechee Shimaati bushoo Zabaadinaa Moꞌabechee Shimiriiti bushoo Yehozabaadinane.

²⁷ Yoꞌaashi bushiisheenaꞌo mooyo, bi toommooch keemmeti keemoonaa Doono Yeerichi yaafee kexon wochinnoon bi shuuniimona taateenaꞌochi macaafooch kooreetone. Bi bushoo Amasiyaasi bi xaaꞌooch kereeꞌi taatehe.