2 Kiinoo 23 - Kafa Linguistics Project

Ataaliyi Toommooch Tuneti Mooyo

¹ Shabaattinnee natooba Yoyaadi aafoon kupphehe. Biyoo balle ginee iraasheenaꞌo tuneti, Yerohaami bushoo Azariyaasi, Yehohanaani bushoo Ishmaꞌeeli, Obeedi bushoo Azariyaasi, Adaayi bushoo Maseyaahinaa Zikiri bushoo Elishafaaxina tookkii wogoon giyiye.

² Boonoshiyoo Yihudee showooch beeti katemoo bulliich hammii Leweenaꞌonaa Israꞌeelee yaree ukkireenaꞌonon ceeggiꞌi, Yerusaalem deebiyeete.

³ Boonoshi bulliyoo Yeerichi yaafee kexoochaa taatoona tookkii wogoon giyiyeete. Yoyaadiyoo boonoshich ishichiye: “Taatoochi bushoo ebiyoche, Doono Yeeri Daawitichi shiijjereenaꞌochon bi gettitoommon, taatemmo biine.

⁴ Ittoshi tuniyemmo ebiniye: Shambetooba kelloon quyooch giyiibeeti qeesheenaꞌonaa Leweenaꞌoochee, keejje beereexi ikkoo uxeree kelloon quyebe;

⁵ ikke beeroo taatee kexon quyebe; echeti ikke beeroo Dechi Heci Kello getteebeeti kelloon quyebe. Asheenaꞌo bulliyoo Doono Yeerichi yaafee kechi addibaabooch kiceebeete.

⁶ Tunebaani qeesheenaꞌonaa maddeebeeti Leweenaꞌonoyee besh, koniyoona Doono Yeerichi yaafee kexooch giyaaye. Yaafeetinaꞌo boonoshi tunetoyich, boonoshi gibeete. Asheenaꞌo bulli Doono Yeerichi sheeroon quyebeete.

⁷ Leweenaꞌoo boonoshi ginee qiicoon boonoshi kishooch yeshiree, taatoochi guudoona neexebeete; taatoo giyii beegaatinaa kechii beegaatina, biinna tookki tunebeete. Yaafee kexooch giyimmo koniyoona qitibe” iye.

⁸ Leweenaꞌonaa Yihudee asheenaꞌo bullina qeeshoo Yoyaadi gettito bullin tuniiheete. Qeeshoo Yoyaadi shambetooba boonoshi kaalloochee kechitinaꞌon batt gawukkaano bi tunetoyich, ginee iraasheenaꞌo boonoshi ikkikkoona kellee quyooch giyii beetinaꞌonaa kellee quyoochee kechii beetinaꞌona tuneti boonoshi ginee naayinaꞌon daammiyeete.

⁹ Qeeshoo Yoyaadi Yeerichi yaafee kexooch beeti Daawitichi gineenaꞌon, ogooge gaacheenaꞌonaa gishiishi gaacheenaꞌonon ballee iraasheenaꞌoyich immiye.

¹⁰ Asheenaꞌo boonoshi ikkikkoona ginee qiicoon yeshiree, yaafee kexoochaa deshi-waanee dambi-waan beddaahaa, deejjee gudoonaa yaafee kexonochi guudoonooch neexeree taatoon boonoshi quyemmoyich tuniihe.

¹¹ Aroochee Yoyaadi taatoochi bushoon kichiꞌi, gubbichoon ukiihe; wogee macaafoonoo biich immiye; taatoo bi tunoon awaajjiyeete; Yoyaadinaa bi bushiisheenaꞌona biin huuttiꞌi taatiiheete. Boonoshiyoo, “Taatoo hume naton taatebe” iibee cookiyeete.

¹² Ataaliyiyoo okki hach woceebee taatoon moogeebeeti asheenaꞌochi cookoon waayaꞌa, asheenaꞌo beetooch, Doono Yeerichi yaafee kexooch hammahan.

¹³ Biyoo taatoo kelleexi giimbee gaꞌooch neexeꞌi beemon, bi gaꞌoochoo iraasheenaꞌonaa tiree huggechinaꞌona neexeꞌi beemon beeggahan; asheenaꞌo bulliyoo emirii, tiroonoo huggii beeheete. Shoddechinaꞌoo shoddee qiicoon yechiꞌi, shoddoon yaggii beeheete. Ataaliyi bi tahoon keexxaꞌa, “Hukkoone, hukkoone!” iyaꞌa cookiyan.

¹⁴ Qeeshoo Yoyaadi Ataaliyi Doono Yeerichi yaafee kexoochaa bi qitemmoyich qaawaano bi tunetoyich, ginee naayinaꞌo toommooch iraasheti ballee iraasheenaꞌon ceeggiꞌi boonoshich ishichiye: “Ginee naayinaꞌochi gutte daggoona biin kichi deebote; biin dabbimmo koninolla goraadoona wuxibote” iye.

¹⁵ Ebich biin yechii daammiꞌi, taatee kexooch daammiibeeti Hareshee Kelloochaa wuxiyeete.

Yoyaadi Gaawichiti Mooyo

¹⁶ Aroochee Yoyaadi bi qelloona, taatoonaa asheenaꞌo bullina Doono Yeerichi asheenaꞌo boonoshi tunee wogoon boonoshi giyemmoyich tuniihe.

¹⁷ Asheenaꞌo bulliyoo Baꞌaalee yaafee kexooch hammiꞌi, kexon happiyeete. Bi deejjee gudeenaꞌonaa misileenaꞌonon tiichii aalliiheete; Baꞌaalee qeeshoo Mataaninoo deejjee gudee aafoochaa wuxiyeete.

¹⁸ Yoyaadi qeesheenaꞌonaa Leweenaꞌonon Doono Yeerichi maddooch ukkiriihe; boonoshi shuunoo Daawiti gettiti mooyinaꞌon tuniyoonaa Muusichi Sheerooch bi kooreetoommon micciibeeti deejjoon Doono Yeerich giddiyoonane. Ebiyoommon wotta Daawiti gettitoommon, emiroonaa shoddoona baaroon baaroone.

¹⁹ Yoyaadi amee mooyonona eeꞌeti asho Doono Yeerichi yaafee kexooch bi giyaachemmoyich, kechi kellooch kellechinaꞌon neechiye.

²⁰ Biyoo ballee iraasheenaꞌon, showee iraasheenaꞌon, maccee iraasheenaꞌonaa asho bullinon kiciye; boonoshiyoo taatoon Doono Yeerichi yaafee kexoochee deennii dugilla daammii, damba qachi kelloona beshiiꞌi, taatee kexooch shakkiiheete; taatoonoo bi taatee qeenooch kotiiheete.

²¹ Ebich asheenaꞌo bulli emiriyeete; Ataaliyi goraadoona bi qititoyee gubb, katemoo shashewimiye.