2 Kiinoo 22 - Kafa Linguistics Project

Yihudee Taatoo Akaziyaasi Mooyo

¹ Arabeenaꞌona tookkii boonoshi kaambooch waati bokkeenaꞌo bi qaabbe bushiisheenaꞌo bullin boonoshi wuxitoyich, Yerusaalem beeti asheenaꞌo Yehoraamichi guuche ciire bushoo Akaziyaasin bi xaaꞌooch keriꞌi taatiiheete. Ebina Yihudee taatoo Yehoraami bushoo Akaziyaasi taatehe.

² Akaziyaasi bi taatehooba, bi eeno hiyaa gutte natone. Yerusaalem beechii ikke naton qeejjiye. Bi indee Ataaliyi getteehan; biyoo Omiri bushoochi busheene.

³ Bi indee gondoon bi tuniyemmoyich biin bi boyetoyich, biyoo wotta Akaabi shiijjereenaꞌochi gonde gommon dabbiye.

⁴ Bi nihoo qititoyee gubb, Akaabi kechi asheenaꞌo boyeꞌi aallooch biin boonoshi yaabitoyich, Akaabichi shiijjereenaꞌo tuniitoommon, Doono Yeeri aafooch gonde mooyon tuniihe.

⁵ Boonoshi ciicoon waayeꞌi, Israꞌeelee taatoo Akaabi bushoo Yoraamina tookkii, Sooriyee taatoo Hazaheelin kocha Gilaadee showooch beeti Ramoot hammiye. Sooriyeenaꞌo Yoraamin kochii mayiiheete.

⁶ Aroochee Sooriyee taatoo Hazaheelina tookkii bi koyehooba, Ramooti katemoochaa bi kocheti mayochee wodoyich Yezireel wottehe. Yehoraami bushoo Yihudee taatoo Akaziyaasi ebi biiyeti, Akaabi bushoo Yoraamin cacheya Yezireel hammiye.

⁷ Akaziyaasi Yoraamin cacheyooch bi hammito, Yeeri ebin naboo tuniiree biin aalliiya bi daaggitoyichiye. Biyoo arooch beechii Nimishi bushoo Yehina daneya Yoraamina tookkii kechiye. Yehi Akaabichi yareenaꞌon aalliyoyich Doono Yeeri huuttiti ashoone.

⁸ Yehiyoo Yeerichi nalloon Akaabichi yareenaꞌo toommooch ceechiibee, Akaziyaasin deennii waati, Yihudee woraaferasheenaꞌonaa bi maneenaꞌochi bushiisheenaꞌonon daneꞌi wuxiye.

⁹ Asheenaꞌo Akaziyaasin qaawiꞌi, Shamaara aasheꞌi bi beetoochee daneheete. Yehi waan deebiꞌinoo wuxiyeete. Tunebaani bi ceeni mulloona Doono Yeer waan wotteti bi nihinihoo Yoshafaaxicha iꞌi, bi dubenoon duukkiyeete. Akaziyaasi yaroochee taatittinoon yesho hakkito, koniyoona aalloone.

Yihudee Taatee Ataaliyi Mooyo

¹⁰ Akaziyaasi indee Ataaliyi bi bushoo qitoon ariyaꞌa, tiyaa Yihudee taatee yaroo bullin aalliihan.

¹¹ Tunebaani taatoo Yehoraami bushee Yehoshaabi, wuxeebeeti, taatoochi bushiisheenaꞌo daggoochee Akaziyaasi bushoo Yoꞌaashin gaajjaꞌa daammahan; biinnaa bi dichindeenon yaafee kechi gatooch aachiyan. Taatoo Yehoraami bushee, Akaziyaasi manee, qeeshoo Yoyaadi mechee Yehoshaabi, ebiyoommi gommona bushoon aachaꞌa Ataaliyi kishoochee wodiihan.

¹² Ataaliyi showoon qeejjaa bi beehooba, Yoꞌaashi Yeerichi yaafee kexooch aasheꞌi boonoshina tookkii shiritte naton kotehe.