2 Kiinoo 21 - Kafa Linguistics Project

¹ Yoshafaaxi qitiꞌi bi qaabbechinaꞌo waan xaꞌeehe. Boonoshi duukketi, Daawiti Katemooch duukkehe. Bi bushoo Yehoraami bi xaaꞌooch kereeꞌi taatehe.

Yihudee Taatoo Yehoraami Mooyo

² Yoshafaaxi bushoo Yehoraamich, Azariyaasi, Yehiꞌeeli, Zakaariyaasi, Ezariyasi, Mikaꞌeelinaa Shefaxiyina getteebeeti maneenaꞌo beetinaꞌone. Eboshi bulli Yihudee taatoo Yoshafaaxi bushiisheenaꞌone.

³ Boonoshi nihoo wodde aachoon, birewoonaa aaxxe qiicoonon, mishigechi Yihudee katemeenaꞌonoo boonoshich wojjiye; tunebaani bi gutenee bushoo bi tunetoyich, taatittinoon Yehoraamich immiye.

⁴ Yehoraami bi nihoo taatee qeenooch koteꞌi bi taatittinoon bi manjiitoyee gubb, bi maneenaꞌo bullinaa ikkikke Yihudee iraasheenaꞌonon goraadoona wuxiye.

⁵ Yehoraami bi taatehooba, bi eeno shaashaa gutte natone. Yerusaalem beechii shimitte naton qeejjiye.

⁶ Akaabi busheen bi shaaggitoyich, Akaabichi yareenaꞌo tuniitoommon tuniyoona Israꞌeelee taateenaꞌochi gommon dabbiye; Doono Yeeri aafoochoo gonde mooyon tuniihe.

⁷ Tunebaani Doono Yeeri Daawitina tookkii bi giyiti wogoyich, bi yareenaꞌon aalliyoon qaawaanoone; Daawitinaa bi yareenaꞌonoyich bulli yemeenoon beeyemmi ceechoon yeshiyoyich gibenikkitone.

⁸ Yehoraami taatee yemeenooch Edoomeenaꞌo Yihudee asheenaꞌo toommooch hukkoon tiijjiꞌi, boonoshi qellee taatoon taatiiheete.

⁹ Aroochee Yehoraaminaa bi ginee iraasheenaꞌona gaarinaꞌo bullin yechiꞌi arooch kimmiyeete. Edoomee asheenaꞌo biinnaa bi ginee iraasheenaꞌonon giichiyeete. Tunebaani biinnaa gaarinaꞌochi ukkireenaꞌona xumoona tiyiꞌi boonoshin yexxiyeete.

¹⁰ Ebina Edoomeenaꞌo Yihudee asheenaꞌo toommooch hanaach beddaahaa hukkeꞌiniye boonoshi beeto. Yehoraami bi qaabbechinaꞌochi Nuggishoo Doono Yeerin bi qajjitoyich, Libini katemee asheenaꞌo ebiyooba bi toommooch hukkoon tiijjiyeete.

¹¹ Wottoo Yihudee showeexi geppeenaꞌooch goyinnee xaaꞌeenaꞌon shuuneꞌi, Yerusaalemi asheenaꞌo Doono Yeerich boonoshi gibeneyaachemmoyich, Yihudee asheenaꞌoo muriccemmoyichoo tuniihe.

¹² Ebiyooba keemechi Eliyaas waanee ishichiibeeti koorichoo biich waahe: “Ne qaabbechi Daawitichi Nuggishoo Doono Yeeri ishichiye: ‘Ne nihoo Yoshafaaxichi gommon, woyee Yihudee taatoo Aasi gommon dabbaano neene;

¹³ tunebaani Israꞌeelee taateenaꞌochi gommon dabbito neene; Akaabichi shiijjereenaꞌo Israꞌeeleenaꞌo Yeerich boonoshi gibeneyaachemmon boonoshi tuniyoommon Yihudee asheenaꞌonaa Yerusaalemi asheenaꞌona gibeneyaachemmon tuniihine; neyee beshe gaaweti, ne nihoochi kechi asho tuneti ne maneenaꞌon wuxihine;

¹⁴ ebich Doono Yeeri ne asheenaꞌon, ne bushiisheenaꞌon, ne mecheenaꞌonaa ne hajjito bullinon oogeti naxoona yexxemmone.

¹⁵ Newoo biiyee kupphoochee tiyitona, ne maacee giindoo kechimmi wottoon, qemi qemona qaakkebee, maacee giindee biiyoona biiyemmo neene’ itone” iye.

¹⁶ Doono Yeeri Yehoraamin boonoshi kochemmoyich, Filsixeemeenaꞌonaa Topphiyeenaꞌochi gaꞌooch beeti Arabeenaꞌonon bi toommooch tiijjiye.

¹⁷ Boonoshiyoo waaꞌi Yihudee showoon kochiyeete; taatee kexooch beeti qiico bullin, bi anaami bushiishoonaa bi mecheenaꞌonon keccii daammiyeete. Guuche ciire bi bushoo Akaziyaasiyee besh bushoo biich echeyaanoone.

¹⁸ Ebi bulliyee gubb Doono Yeeri wodaani maacee giindee biiyoona biin naxehe.

¹⁹ Ebi biiyo gutte nati wottoon kupphee kupphee hammiꞌi, bi maacee giindoo keyaa, oogeton qaakkeꞌi qitiye. Asheenaꞌoo bi qaabbechinaꞌo duukkehooba boonoshi tunii beetoommon, bi duukkehooba mixon gutii qaaqqoon shoohaaneenaꞌone.

²⁰ Yehoraami bi taatehooba, bi eeno shaashaa gutte natone. Yerusaalem beechii shimitte naton qeejjiye. Bi qitiyooba, koniyoona biich ayinaanoone. Biinoo Daawiti Katemooch duukkiyeete; tunebaani taateenaꞌochi maashooch duukkeyaanoone.