2 Kiinoo 20 - Kafa Linguistics Project

Yoshafaaxi Moꞌabeenaꞌonaa Amooneenaꞌonon Koyo

¹ Ebiyee gubb, Moꞌabeenaꞌo, Amooneenaꞌonaa boonoshina tookkii ikkotteti Meꞌuneenaꞌona Yoshafaaxin kocha waaheete.

² Asheenaꞌo waaꞌi, “Baharoyee bekkee, Sooriyee showoochee neen kocha meeti ginee naayinaꞌo waatinaꞌone. Ebiyoche, Hatsatsoon Tamaari katemoon yechitinaꞌone” iꞌi Yoshafaaxich gettiyeete. (Hatsatsoon Tamaari En Geedi ceekkeebeeti bare shigoone.)

³ Yoshafaaxiyoo oogichii shattiye. Doono Yeeri biin gaachemmoyich qaawiꞌi, bi waan corootiye; Yihudee showoo bulliich coomoon awaajjiye.

⁴ Yihudee katemoo bulliichee asheenaꞌo Doono Yeeri boonoshin bi gaachemmoyich corootiya, ikkooch kiceeheete.

⁵ Yoshafaaxiyoo yaafee kechi andire addibaabooch kiceeti Yihudee asheenaꞌonaa Yerusaalemi asheenaꞌonochi aafooch neexeechii,

⁶ ishichiye: “No qaabbechinaꞌochi Nuggishoo Doono Yeero, shimaayooch beechaa aagetee taatittino bullin qeejjaabeeti Nuggishoo neene. Giidoonaa hakkoona ne kishoochiye. Neen wochoon hakkemmo, koniyoona aalloone.

⁷ No Nuggishoocho, hini showee asheenaꞌon ne asheenaꞌo tuneti Israꞌeeleenaꞌo aafoochee yookkaa kichaachaa, ne shunecho tuneti Abrahami shiijjereenaꞌoyich, bulli yemeenoon boonoshicho bi tunemmoyich showoon immeto, neene.

⁸ Boonoshiyoo arooch koteheete. Ne shigoyichoo yaafee kexon haggiyeete; ebin boonoshi tuniito,

⁹ ‘Gonde mooyo, ebiyoo, gino, woyee naxo, woyee biiyo, woyee shaacoo no toommooch bi waagaata, ne shigo beeti hini yaafee kechi ciinoochaa ne aafooch neexeechi, no iritee daggoochaa ne waan cookemmo noone; newoo no qolloon waayemmo neene; noonoo wodiyemmo neene’ iꞌiniye.

¹⁰ “Andoo ebiyoche, Amooneenaꞌo, Moꞌabeenaꞌonaa Seyiri guudi toommeexi asheenaꞌona, noon kochii beetinaꞌone. No qaabbechinaꞌo Gibitsee boonoshi keyiyooba, ebi asheenaꞌon boonoshi kochemmoyich daaggaano neene; boonoshiyoo ebi asheenaꞌon beshee hammiyeetani aalliyaaneenaꞌone.

¹¹ Ebiyoche and, nooch ne immeti showoochee noon yoohi kichiya womona, no deꞌoyich gondoon gaaccii beetinaꞌone.

¹² No Nuggishoocho, noon kochiibeeti ebi dofee ginee naayon kochii wochoon hakkaano no tunetoyich, ne boonoshi toommooch nallibe; no tuniyemmonoo tuushito noone. Tunebaani noon ne gaachemmoyich neen ciinaabeeto noone” iye.

¹³ Yihudee asheenaꞌo bulli boonoshi mecheenaꞌona, boonoshi bushiisheenaꞌonaa gaggereenaꞌona tookkii Doono Yeeri aafooch neexee beeheete.

¹⁴ Ebiyooba Doono Yeerichi Ayaano iitee daggooch beeti, Asaafichi yaroo tuneti Lewoo, Mataniyi bushoo, Yeꞌeeli bushoo, Banayi bushoo, Zakaariyaasi bushoo Yahazeli toommooch waahe.

¹⁵ Biyoo ishichiye: “Taatoo Yoshafaaxo, Yihudee showoonaa Yerusaaleminooch beetinaꞌote, bull waayebote. Doono Yeeri ittoshich ishichii beetone: ‘Hini dofee ginee naayinaꞌon shati keqqiyaahote. Koyo Yeeri taachoani ittoshicho toonoone.

¹⁶ Yaach boonoshi waan kindibote; boonoshiyoo Tsiitsi deshee damboon woyemminaꞌone. Bambee gocoochaa, Yeruꞌeeli barahoochaa aabi-keyo waanaa boonoshina danemmo ittoshine.

¹⁷ Hini koyoon koyemmo ittoshi toonoone; ittoshi xaaꞌi xaaꞌoon yeshiree baach neexebote; manji neexebote. Doono Yeeri ta, wudoon ittoshich ta daniyoon beeggemmo ittoshine. Yihudee asheenaꞌonaa Yerusaalemi asheenaꞌonote, shati keqqiyaahote; yaach hamiree boonoshina koyebote. Doono Yeeri tawoo ittoshina tookki tunemmo taane’ itone” iye.

¹⁸ Yoshafaaxiyoo baroona showooch guufehe. Biinna tookkii beeti, Yihudee asheenaꞌonaa Yerusaalemi asheenaꞌona guufeꞌi Doono Yeerich goyinneheete.

¹⁹ Qohaatichi yareenaꞌonaa Qoraahichi yareenaꞌona tuneti Leweenaꞌo tiyii neexeechii, boonoshi qaaroon oogichiꞌi Israꞌeelee Nuggishoo Doono Yeerin galleteheete.

²⁰ Asheenaꞌo maaddoona tiyiꞌi, Teqoꞌi barahooch qaxiriyeete. Boonoshi hammiibeeta, Yoshafaaxi boonoshich, “Yihudee asheenaꞌonaa Yerusaalemi asheenaꞌonote, ellebote; ittoshi Nuggishoo Doono Yeerin gibenebote; kupphemmo ittoshine. Bi keemechinaꞌon gibenebote; mooyo ittoshich kaamemmone” iye.

²¹ Biyoo asheenaꞌona tookkii echeeꞌi, yaafeeti tahoon taheꞌi Doono Yeeri aafooch shoddeebeeti shoddechinaꞌon, “Bulli yemeenoon shoodecho bi tunetoyich, Doono Yeerin galletebote” getibee, bi ginee naayinaꞌo aafooch boonoshi hammemmoyich gettiye.

²² Leweenaꞌo galletoonaa shoddoonon boonoshi wonnimmona, Doono Yeeri ebi boonoshin kocha waati ginee naayinaꞌon keqqichiye.

²³ Amoonee asheenaꞌonaa Moꞌabee asheenaꞌona Seyiri guudi toommeexi asheenaꞌo toommooch tiyiꞌi, wuxii aalliiheete. Seyiri guudi toommeexi asheenaꞌon wuxii ciichiichii, boonoshinaa boonoshina ciireheete.

²⁴ Yihudee asheenaꞌo aroochaa barahoo bekkeebeeti xoobooch waa asheenaꞌon ciinniꞌi, dubeno showee toommooch yacheeꞌi beeton beeggiyeete; ikkolla muricaanoone.

²⁵ Yoshafaaxinaa asheenaꞌona kecee kecooch waaꞌi, meeti miimon, baribare qiicoon, tahoonaa aaxxe mooyonon daneheete. Kecee woddee naboona keejje qemi wottoon qacciyeete. Bullin qaccii ciichoon hakkaaneenaꞌone.

²⁶ Awuddinnee qemooba Baraaki bambooch kiceeheete; aroochaanoo Doono Yeerin galleteheete. Ebich are xaaꞌoo hanaach beddaahaa Baraaki Bamboo getaa ceekkehe.

²⁷ Aroochee Yihudee asheenaꞌo bullinaa Yerusaalemi asheenaꞌo bullina Yoshafaaxin shiichiiꞌi, Doono Yeeri boonoshi etteenaꞌon koyi boonoshi wochemmoyich bi tuniitoyich, emiroona wotteꞌi Yerusaalem hammiyeete.

²⁸ Ooge ximboona, giishi ximboona, tiroona Yerusaalem beeti, Doono Yeerichi yaafee kexooch qaxiriyeete.

²⁹ Doono Yeeri Israꞌeeleenaꞌochi etteenaꞌon bi koyon waayeti, aageteenaꞌochi taateenaꞌo bulli Yeerin shattiyeete.

³⁰ Bi Nuggishoo bi guudoona beetinaꞌo waanee biin bi kashiitoyich, Yoshafaaxichi taatittino diggehe.

Yoshafaaxi Taatee Yemeenee Ciiro

³¹ Yoshafaaxi Yihudee showooch bi taatehooba, bi eeno shaashaa uuche natone. Yerusaalem beechii hiyaa uuche naton qeejjiye. Bi indee Azuubi getteehan; biyoo Shilihi busheene.

³² Yoshafaaxi bi nihoo Aasichi gommon dabbiye; aroochee okk hach getaanoone. Doono Yeeri aafooch kaame mooyon tuniihe.

³³ Tunebaani guudi toommeexi goyinnee xaaꞌeenaꞌon aalliyaanoone. Asheenaꞌoo boonoshi qaabbechinaꞌochi Nuggishoo Yeer waan wottoyich boonoshi mulloon qanniyaaneenaꞌone.

³⁴ Yoshafaaxi shuuneti eche shuunoo batti battichoochee tiijjii ciireexooch beddaahaa, Israꞌeelee taateenaꞌochi macaafooch beeti, Hanaani bushoo Yehichi kiinooch kooreetone.

³⁵ Ebiyee gubb, Yihudee taatoo Yoshafaaxi, bi shuunoo gondo tuneti, Israꞌeelee taatoo Akaziyaasina tookkii guuphiye.

³⁶ Tarisheshee showooch hammemmi markabeenaꞌon shuuniyoyich ikkotteheete. Markabeenaꞌonoo baharee gashooch beeti Etsiyoon Geberi katemoochaa shuuniiheete.

³⁷ Aroochee Mareshi katemeexi asho, Dodabaahi bushoo Elezeeri “Akaziyaasina tookkii ne guuphitoyich, Doono Yeeri ne shuuneto bullin aalliyemmone” iꞌi Yoshafaaxich keemoon keemmiye. Markabeenaꞌoo tiisheheete; Tarisheshee showooch hamon hakkaaneenaꞌone.