2 Kiinoo 2 - Kafa Linguistics Project

Yaafee Kexon Hagoyich Qannoo

¹ Solomooni Doono Yeerichi shigoyich yaafee kexon, wotta bi qellich taatee kexon hagga tiyiye.

² Biyoo qiicoon qaccemmi shabe hume asheenaꞌon, geppoochaa xaqqoon xaremmi shinne hume asheenaꞌon, wotta shuunoon ciini shuuniyemmi keejje humaa shiritte balle asheenaꞌon shuunooch neechiye.

³ Xiroosi taatoo Kiraamichoo ishichiꞌi wochoon daachiihe: “Ta nihoo Daawiti, bi beeyemmi taatee kexon bi hagiyooba yigee mixon biich ne deejjoommon, taachoo ebiyoommon deejjibe.

⁴ Israꞌeeleenaꞌo, bulli yemeenoon boonoshi tuniyemmoyich getteetoommon, Doono Yeerich gaawe cinnechi ixaanoon shoohoyich, kuxaanoon yaaree koshon giddiyoyich, micciibeeti deejjoon maaddoona, womikkoona, shambetoona, agenee keyi baaroobinaa maacheti baari baaree aaboobina giddiyoyich, ta Nuggishoo Doono Yeerichi shigoyich kexon hagiree biich yaafiya iyaabeeto taane.

⁵ “No Nuggishoo nuggisheenaꞌo bulliyee beshe oogoo bi tunetoyich, ebi ta hagga ii beeti kexo ooge kexone.

⁶ Tunebaani shimaayoonaa shimaayeexi shimaayoonolla biich bedaache; ishigaata, biich kexon hagon hakkemmo, konine? Bi aafooch ixaano shookkeyemmi xaaꞌoon shuunoyee besh, biich kexon hagoyich, ta koni taane?

⁷ “Aachoon, birewoonaa gooshoonon ukkiibeeti, xuuroonoo qicciibeeti, damero, ceelloonaa shimaayitoona tuneti tahoon shippiibeeti, qecaaqecee kichoon ariibeeti, ashoon taach deejjibe. Biyoo ta nihoo Daawiti kaacaa, Yihudee showoonaa Yerusaaleminooch taanna tookkii beeti shuuna ariyechi asheenaꞌona tookki shuunebe.

⁸ “Ne asheenaꞌo Libanoosi guudoochee mixon kuxona arichetinaꞌo boonoshi tunoon ariyaabeeto taane. Ebich Libanoosi guudoochee yigee mixon, ciidee mixonaa naddee mixonon taach deejjibe; ta asheenaꞌoo arooch hamiree boonoshin gaachemminaꞌone.

⁹ Ebiyoo ta hagga iyaabeeti yaafee kexo oogetonaa worganeetona bi tunetoyich, wodde mixon taach boonoshi qanniyemmoyichiye.

¹⁰ Shuunoon shuuneebeeti ne asheenaꞌoyich hiye hume xaanee teepphoon, hiye hume xaanee sheqoon, awudde balle hume neetiree woyinee uyoonaa awudde balle hume neetiree zayitoonon immemmo taane” iye.

¹¹ Aroochee Xiroosi taatoo Kiraami koorichoon kooriꞌi Solomoonich ishichiꞌi daachiihe: “Doono Yeeri bi asheenaꞌon bi shunnitoyich, boonoshi toommooch neen taatiitone” iye.

¹² Kiraami daakkiꞌi ishichiye: “Doono Yeerich yaafee kexon, wotta bi qellich taatee kexon bi shuunemmoyich mullechi, ariyechi, shalligechi bushoon taatoo Daawitich immiti, showoonaa shimaayoonon halliti, Israꞌeelee Nuggishoo Doono Yeeri diireeton tunebe.

¹³ Shuunee ariyechonaa shalligechona tuneti asho Huraam Abbin neech daachiito taane.

¹⁴ Bi indeyoo Daani yoodeexine. Bi nihoo Xiroosee ashoone. Huraamich, aachoochee, birewoochee, gooshoochee, xuuroochee, xaqqoonaa mixonoochee baribare mooyon shuunee ariyoo beetone. Ebiyoommon wotta, shimaayito, dameroonaa ceelloona tuneti woshiqoona, wotta muttee tuppoochee ciciitaa yokkeeti woshiqoona qoreddoon shippi ariyoo biich beetone. Baribare qecaaqecee kichoonaa asho biich bekkiiti mooyon dabbii shuunoon shuunoonoyich ariyoo biich beetone. Ebich biin, shuunee ariyechi ne asheenaꞌonaa ne aabbi, ta doono Daawitichi asheenaꞌona tookki bi shuunemmoyich tuniibe.

¹⁵ “Andoo ta doono ne, ne gettetoommon teepphoon, sheqoon, woyinee uyoonaa zayitoonon ne guuno nooch deejjibe.

¹⁶ Nowoo ne qaawimmi wottoon mixon Libanoosi guudoochee kuxi cuyiree, baharee toommona deebi, Yoopphi katemooch beddaahaa bi shaggemmoyich tuniyemmo noone. Ebina newoo Yerusaalem bi hammemmoyich tuniyemmo neene” iye.

Yaafee Kechi Shuunoo Wonneyoo

¹⁷ Solomooni bi nihoo Daawitichoommon Israꞌeelee showooch beeti shiqqeenaꞌon haddiye. Boonoshiyoo balli aachaa keejje humaa shiritte balleenaꞌone.

¹⁸ Boonoshi daggoochee shabe humeenaꞌon shaagee shaaggechinaꞌon, shinne humeenaꞌon guudi toommoochaa xaqqee xarechinaꞌon tuniihe. Shuunoon ciini shuuniyemmi keejje humaa shiritte balle asheenaꞌon boonoshi toommooch ukkiriihe.