2 Kiinoo 19 - Kafa Linguistics Project

Yehi Yoshafaaxin Kaaro

¹ Yihudee taatoo Yoshafaaxi Yerusaalem beeti bi kexooch diggoona wottehe.

² Hanaani bushoo yaaꞌechi Yehi biinna daneya hammiꞌi, taatoo Yoshafaaxich ishichiye: “Gonde ashoon gaachenne? Doono Yeerin shixxii beeton shunnenne? Ebich Doono Yeeri kaaro ne toommooch waatone.

³ Tunebaani gaawe mooyo ne waanee danetone. Ebiyoo nuggishee Asheeri misileenaꞌon showoochee ne aalliyoonaa Yeerich gibeneeto ne tunoonane” iye.

Yoshafaaxi Woraaferasheenaꞌon Ukkiriyoo

⁴ Yoshafaaxi Yerusaalem kotehe. Beershaabee tiijjii geppechi Efreemee showooch beddaahaa beeti asheenaꞌo waan hammiibee, asheenaꞌo boonoshi qaabbechinaꞌochi Nuggishoo Doono Yeer waan boonoshi wottemmoyich tunii beehe.

⁵ Mishigechi Yihudee katemoo bulliich woraaferasheenaꞌon ukkiriihe.

⁶ Boonoshichoo ishichiye: “Ittoshi nallii beegaata Doono Yeeri ittoshina tookkii bi tunoon shalligoona ittoshi qelloon ariibote; ittoshi nalliibeeto, Doono Yeerichani ashich toonoone.

⁷ Andoo Doono Yeerin shatote; no Nuggishoo Doono Yeer waan dayinnetoon dabiyoo, ashi aafoon ciinniꞌi heppoonaa xuccoon mamona aallo bi tunetoyich, bulli mooyon ittoshi qelloon ariyoona tuniibote” iye.

⁸ Aroochee Yoshafaaxi Leweenaꞌoochee, qeesheenaꞌoochee, Israꞌeelee yaree ukkireenaꞌoochee asheenaꞌon ukkiriiꞌi, Doono Yeerichi sheeroo quyeyemmoyich boonoshi tuniyemmonaa asheenaꞌochi taggoon boonoshi nallemmonoyich Yerusaalem kotiihe. Boonoshiyoo Yerusaalem koteheete.

⁹ Boonoshichoo ishichiꞌi gettiye: “Doono Yeerin shatona, kaamoona, ittoshi ceeni mulloona maddebote.

¹⁰ Katemi katemooch beeti ittoshi maneenaꞌo waanee ittoshi waan waabeeti amee mooyolla, ebiyoo, damee ukkoo, sheeroon, getoon, qociyoonaa doyoonon shaaddo bi tunegaata, Doono Yeerin boonoshi xuꞌaachemmoyich, bi kaaro ittoshinaa ittoshi maneenaꞌonochi toommooch bi waataachemmoyich kupphii getote. Ebin ittoshi tuniigaata xuꞌecho tuneyaachemmo ittoshine.

¹¹ “Doono Yeericho tuneti mooyo bullich qeeshee guudo Amariyi, wotta taatoocho tuneti mooyo bullich Ishmaꞌeeli bushoo Yihudi yoodee iraashoo Zebaadiyi ittoshi toommooch iraashetinaꞌone. Leweenaꞌoo ittoshi aafooch ukkireree maddebeete; kuppheree shuunebote. Doono Yeeriyoo gaawe mooyon tunii beetinaꞌona tookki tunebe” iye.