2 Kiinoo 18 - Kafa Linguistics Project

Akaabi Toommooch Mikiyaasi Keemmiti Keemo

¹ Yoshafaaxi wodde gaannoonaa oogoonon bi danehooba, Akaabina tookkii naachee xibehe.

² Giisheche natoyee gubb, Akaab waan Shamaara hammiye. Akaabiyoo meeti bageenaꞌonaa gatteenaꞌonon bashiꞌi Yoshafaaxinaa biinna tookkii beeti asheenaꞌonoyich gifiroon geddiye. Aroochee Gilaadee showooch beeti Ramooti katemoon koyoyich biinna tookki bi hammemmoyich dachiye.

³ Israꞌeelee taatoo Akaabi Yihudee taatoo Yoshafaaxin, “Gilaadee showooch beeti Ramootin no kochemmoyich, taanna tookki hammenne?” iꞌi echehe. Yoshafaaxiyoo Israꞌeelee taatoyich, “Tawoo neenoommo taane; ta ashoo ne ashoommone; koyooch neenna tookki hammemmo noone” iye.

⁴ Yoshafaaxi daakkiꞌi, Israꞌeelee taatoyich “Shiichiree Doono Yeerichi daaggoon echebe” iye.

⁵ Aroochee Israꞌeelee taatoo keemechi awudde balle asheenaꞌon ikkooch kiciꞌi, “Gilaadee showooch beeti Ramootin koyoyich hambotee, qayote?” iꞌi boonoshin echehe. Boonoshiyoo “Hambe; Yeeri ne kishooch beshiiree immemmone” iyeete.

⁶ Tunebaani Yoshafaaxi, “Biin no echemmi Doono Yeerichi keemecho baroo hiniich aalle?” iꞌi echehe.

⁷ Yoshafaaxich Israꞌeelee taatoo, “Biinna Doono Yeerin no echaabeeti ikke uro beetone; biyoo Imilaahi bushoo Mikiyaasine. Tunebaani bulli aaboon taach bi keemmiibeeto gondoonani, deꞌoon tuno bi qajjitoyich, biin shixxoye” iye. Yoshafaaxiyoo, “Taatoo ishichaaye” iye.

⁸ Israꞌeelee taatoo ikke bi naayon ceeggiꞌi, “Imilaahi bushoo Mikiyaasin kaate ceegi deebe” iye.

⁹ Israꞌeelee taatoonaa Yihudee taatoo Yoshafaaxina taatee tahoon taheꞌi, Shamaari uxeree kellee gaꞌooch beeti maayi buchi xaaꞌooch boonoshi taatee qeeni qeenooch kotee beeheete. Keemechinaꞌo bulliyoo boonoshi aafoochaa keemoon keemmii beeheete.

¹⁰ Kenanaahi bushoo Sedeqiyaasi qaroommi mooyon xuuroochee shuuneꞌi, “Doono Yeeri ishichiye: ‘Sooriyeenaꞌon boonoshi aallemmi wottoon eboshina kochemmo neene’ itone” iye.

¹¹ Keemechinaꞌo bulli “Gilaadee showooch beeti Ramootin hamiree koyi yeshe. Doono Yeeri taatoo kishooch beshiiree immemmone” iibee biichoommon keemmii beeheete.

¹² Mikiyaasin ceegga hammiti wocheyecho biich, “Keemechinaꞌo bulli qaaroon ikkochiꞌi, taatoyich gaaweton keemmii beetinaꞌone. Ne qaaroo boonoshi qaaroona tookki ikkoo bi tunemmoyich, gaaweton ne gettemmoyich, neen qollehoye” iye.

¹³ Tunebaani Mikiyaasi “Beeyechi Doono Yeeri beege! Ta Nuggishoo taach gettimmon baach gettemmo taane” iye.

¹⁴ Israꞌeelee taatoo waan bi waammona, taatoo biich, “Mikiyaaso, Gilaadee showooch beeti Ramootin koyooch hambonaa, qayona?” iye. Biyoo “Hami koyi yeshe; ne kishooch beshiitaa ichemminaꞌone” iꞌi wochiye.

¹⁵ Tunebaani taatoo biich, “Iberoyee besh Doono Yeerichi shigoona koote mooyon taach ne getaachemmoyich, ambiche wottooniye neen ta wogii beeyemmo?” iye.

¹⁶ Mikiyaasiyoo, “Israꞌeelee asheenaꞌo bulli qiddaalli bagoochoommon guudinaꞌo toommooch boonoshi shacee beetaa beeggoye. Doono Yeeriyoo, ‘Eboshich qiddoo aalloone. Diggoona boonoshi kexi kexooch wottebeete’ itone” iye.

¹⁷ Yoshafaaxich Israꞌeelee taatoo, “Gondoonani, deꞌe mooyon taach kemaachemmo bi tunoon getaano taane?” iye.

¹⁸ Aroochee Mikiyaasi ishichiye: “And illa Doono Yeerichi qaaroon waayebe. Doono Yeeri bi qeenooch koteꞌi, shimaajji maraakoo bulliyoo bi qanninaa bi yoochinooch neexeꞌi beeton beeggoye.

¹⁹ Doono Yeeriyoo, ‘Koni Gilaadee showooch beeti Ramoot hamiree, Akaabin bi qitemmoyich muriciiba?’ iye. “Ikke maraakoo ikke mooyon, wotta bare maraakoo bare mooyon gettiye.

²⁰ Aroochee ikke ayaano kechiꞌi, Doono Yeeri aafooch neexeechii, ‘Ta biin muriciyemmo taane’ iye. “Aroochee Doono Yeeri biich, ‘Aabichireeshiye ne muriciyemmo?’ iye.

²¹ “Biyoo, ‘Hamiree, bi keemechinaꞌo bulli kootoon keemmemmoyich tuniyemmo taane’ iye. “Doono Yeeriyoo, ‘Muriciyemmo neene; neechoo kaamemmone; hamiree, ebin tuniibe’ iye.

²² “Andoo ebiyoche, Doono Yeeri ebi ne keemechinaꞌo noonooch koote ayaanoon kotiitone. Doono Yeeri ne toommooch gondoon tuniyemmo bi tunoon gettitone” iye.

²³ Aroochee Kenanaahi bushoo Sedeqiyaasi Mikiyaas waan giddeꞌi, bi gaakkooch tappeechii, “Doono Yeerichi Ayaano neen bi yibbaatiito, ta waanee aabina besheꞌiniye?” iye.

²⁴ Mikiyaasiyoo, “Ebiyoche, aasheya gatooch ne giyemmi aabooba, beeggemmo neene” iye.

²⁵ Aroochee Israꞌeelee taatoo ishichiye: “Mikiyaasin yeshote; katemee iraashoo Amooninaa taatoochi bushoo Yoꞌaashina waan daambote.

²⁶ Aroochee, ‘Taatoo “Diggoona ta wottemmi wottoon, ebi uroon cuyee kexooch gedote; dapphe koshonaa aaconoyee besh amoonolla biich immaahote” itone’ getote” iye.

²⁷ Mikiyaasiyoo “Diggoona ne wottegaata, Doono Yeeri taanna getaanoone” iye. Aroochee “Asheenaꞌote, ittoshi bulliyoo ebin waayebote” iye.

Akaabi Qitoo

²⁸ Ebina Israꞌeelee taatoonaa Yihudee taatoo Yoshafaaxina Gilaadee showooch beeti Ramootin kocha hammiyeete.

²⁹ Yoshafaaxich Israꞌeelee taatoo, “Ta aricheyaachemmoyich, ta tahoon shaddireeshiye koyooch ta giyemmo. Tunebaani ne, ne taatee tahoon tahebe” iye. Israꞌeelee taatoo taatee tahoon shaddiye; koyoochoo giyiyeete.

³⁰ Sooriyee taatoo, gaarinaꞌochi ukkireenaꞌoyich “Israꞌeelee taatoyee besh, giisho tuneba oogoo koninolla tookki koyeyaahote” iꞌi gettitone.

³¹ Gaarinaꞌochi ukkireenaꞌoo Yoshafaaxin beeggiꞌi, “Hini Israꞌeelee taatoone” iꞌi gabiyeete. Ebich biin kocha bi waan guuddiyeete. Yoshafaaxiyoo cookiye. Doono Yeeriyoo biin gaachehe. Yeeri bi waanee boonoshin wochiye.

³² Gaarinaꞌochi ukkireenaꞌo Israꞌeelee taatoo tunee bi qayon beeggiꞌi, biin yoohoochee wotteheete.

³³ Tunebaani ikke uro diqqoona bi maꞌoona shangoon awureꞌi, Israꞌeelee taatoon bi getee ginee tahee danoochaa kochiye. Aroochee taatoo bi gaarin gashee beetoyich, “Kochaa mayeto taane; gubb wochi gasheree koyee daggoochee taan kichibe” iye.

³⁴ Ebiyooba koyo qeeccii hammiye; Israꞌeelee taatoo womikki wottoon Sooriyeenaꞌo waan bi aafoon wochii, bi gaari toommooch teeqqeꞌi beehe. Biyoo aabee gimooch qitiye.