2 Kiinoo 17 - Kafa Linguistics Project

Yihudee Taatoo Yoshafaaxi Mooyo

¹ Yoshafaaxi bi nihoo Aasi xaaꞌooch kereeꞌi taatehe. Israꞌeeleenaꞌo toommooch bi giidoon kupphiihe.

² Yihudee showeexi mishigechi katemeenaꞌonaa Yihudee showoo bullinooch, bi nihoo kochii yechiti Efreemee katemeenaꞌoochoo ginee iraasheenaꞌon kotiihe.

³ Bi qaabbechi Daawitichi batti batti gommon bi dabbitoyich, Baꞌaaloonoo dabbaano bi tunetoyich, Doono Yeeri biinna tookkii tunehe.

⁴ Bi qaabbechinaꞌochi Nuggishoyich gibeneeto tunehe; bi getoonoo hammiye. Israꞌeelee taateenaꞌo tuniibee echeti mooyon tuniyaanoone.

⁵ Doono Yeeriyoo taatittinoon bi kishooch manjiihe. Yihudee ashoo bulliyoo wojjoon Yoshafaaxich deebiye. Ebina wodde oogoonaa gaannoonon danehe.

⁶ Bi mulloo Doono Yeerichi gommona kupphehe. Guudi toommeexi goyinnee xaaꞌeenaꞌonaa Asheeri misileenaꞌonon Yihudee showoochee aalliihe.

⁷ Bi taateti keejjinnee natooba, asheenaꞌon boonoshi dojjemmoyich, Been Hayili, Abidiyi, Zakaariyaasi, Netaanelinaa Mikiyaasina getteebeeti iraasheenaꞌon Yihudee katemeenaꞌooch daachiihe.

⁸ Boonoshina tookkiinoo yiixiye Leweenaꞌonaa gutte qeesheenaꞌonon daachiihe. Leweenaꞌo Shemayaahi, Netaani, Zebaadiyi, Asaheeli, Shemiramooti, Yehonaataani, Adoniyaasi, Xobbiyaahinaa Tobadoniyina getteeheete. Wotta qeesheenaꞌo Elishaminaa Yehoraamina getteeheete.

⁹ Boonoshiyoo Doono Yeerichi Sheeree Macaafoon yechiꞌi, Yihudee katemoo bulliich hammiꞌi, asheenaꞌon dojjii beeheete.

Yoshafaaxichi Oogo

¹⁰ Yihudee showee guudoona beeti taateenaꞌo bulli biin boonoshi shattemmoyich Doono Yeeri tuniitoyich, Yoshafaaxina koyeyaaneenaꞌone.

¹¹ Filsixeemeenaꞌoochee ikkikkeenaꞌo boonoshi wojjoon deebii beeheete; xure birewee gibiroonoo qoccii beeheete. Arabee asheenaꞌoo shabaatte humaa shabaatte balle bagee baaddoonaa shabaatte humaa shabaatte balle emmishee baaddoonon deebiyeete.

¹² Yoshafaaxiyoo beshii beshii qeyiye. Yihudee showoochoo mishigeenaꞌonaa maayoonaa baribare mooyona kiceyemmi katemeenaꞌonon shuuniihe.

¹³ Yihudee katemeenaꞌooch wodde maayoonaa ginee qiicoonon kicitone. Wotta ginee anaaminaꞌo tuneti, meeti ginee naayinaꞌonoo Yerusaalem kotiihe.

¹⁴ Boonoshi qaabbechinaꞌochi yari yaroona boonoshi haddoo ebine: Yihudi yoodoochee ginee iraashoo Adinahine; biinna tookkiinoo ginee anaaminaꞌo tuneti, keejje balle hume ginee naayinaꞌo beetinaꞌone.

¹⁵ Bi hilloo Yehohanaanine; biinna tookkiinoo gutte ballaa shinne hume ginee naayinaꞌo beetinaꞌone.

¹⁶ Yehohanaanichi hilloo bi daaggoona bi qelloon Doono Yeerich kichiti, Zikiri bushoo Amasiyaasine; biinna tookkiinoo ginee anaaminaꞌo tuneti, gutte balle hume asheenaꞌo beetinaꞌone.

¹⁷ Biiniyaami yoodoochee ginee iraashoo, ginee anaamo tuneti Eliyaadine; biinna tookkiinoo gaachoonaa maꞌoonon yechiibeeti gutte balle hume ginee naayinaꞌo beetinaꞌone.

¹⁸ Bi hilloo Yehozabaadine; biinna tookkiinoo koyoyich qanniti balli shinne hume ginee naayinaꞌo beetinaꞌone.

¹⁹ Eboshi Yerusaalemaa taatoyich maddee beeheete. Taatoo eboshiyee bareenaꞌon Yihudee showooch beeti mishigechi katemoo bulliich kotiitone.