2 Kiinoo 16 - Kafa Linguistics Project

Yihudee Asheenaꞌonaa Israꞌeeleenaꞌona Koyo

¹ Aasi taateti shaashaa shirittinnee natooba, Israꞌeelee taatoo Baꞌaashi hammiꞌi Yihudee showoon kochiye; Yihudee taatoo Aasi showoochee koniyoona maach bi keyaachemmonaa maac bi giyaachemmonoyich bayoyich, Raami katemooch mishigoon shuunehe.

² Aasiyoo Doono Yeerichi kechi ginjabeetoonaa taatee kechi ginjabeetoonoochee birewoonaa aachoonon tiijjii, Damaasiqa koteti, Sooriyee taatoo Been Hadaadich ishichiꞌi daachiihe:

³ “Ne nihoonaa ta nihoonochi daggooch wogo beemoommon, neennaa taanna daggoochoo beebe. Ebiyoche, aachoonaa birewoonon neech daachiito taane. Israꞌeelee taatoo Baꞌaashi ta waanee bi wokkemmoyich, biinna tookkaa ne giyeti wogoon happibe” iye.

⁴ Been Hadaadiyoo taatoo Aasi gettiton deꞌa iꞌi waayehe. Bi ginee iraasheenaꞌon Israꞌeelee katemeenaꞌooch daachiihe; boonoshiyoo hammiꞌi, Iyoonin, Daaninaa Abeel Mayiminon, wotta Nifitaalee showooch beeti, maayoonaa baribare mooyona kiceebeeti katemoo bullinoo kochii yechiyeete.

⁵ Baꞌaashi ebin waayeꞌi, Raama mishigoon shuunoon qajjiye; bi shuunoo neexehe.

⁶ Taatoo Aasi Yihudee asheenaꞌo bullin kiciye. Asheenaꞌoo Baꞌaashi mishigoon shuunoyich Raama kiciti xaqqoonaa mixonon qacciyeete. Biyoo eboshina Mitsiphi katemoonaa Geebi katemoonooch mishigoon shuunehe.

Yaaꞌechi Hanaani Aasin Ittibato

⁷ Ebiyooba yaaꞌechi Hanaani Yihudee taatoo waan waaꞌi, “Ne Nuggishoo Doono Yeerin gibeneyaanoon Sooriyee taatoon ne gibenetoyich Sooriyee taatoochi ginee naayinaꞌo ne kishoochee muriccitinaꞌone.

⁸ Topphiyee asheenaꞌonaa Liibiyee asheenaꞌoyich dofee haresheenaꞌonaa gaarinaꞌonon yechiti meeti ginee naayinaꞌo beetinaꞌo toone? Tunetaanoona Doono Yeerin ne gibenetoyich, ne kishooch beshiiꞌi immiye.

⁹ Doono Yeeri boonoshi ceeni mulloona biin gibenee beetinaꞌon kupphiyoyich, bi aafoo showee toommo bulliich ciinnii beetone. Tun bedaani mooyon ne tuniitoyich, ebiyee bekk koyo ne waanee kuxeyaachemmone” iye.

¹⁰ Ebichi naboona Aasi yaaꞌechon kaarehe; oogichiꞌi bi ippetoyich, cuyee kexooch giijjiye. Ebiyooba Aasi ikkikke asheenaꞌon oogichiꞌi xuuxiihe.

Aasichi Taatee Yemeenee Ciiro

¹¹ Aasi shuuneti shuunoo batti battichoochee tiijjii ciireexooch beddaahaa, Yihudee taateenaꞌonaa Israꞌeelee taateenaꞌonochi kiinee macaafooch kooreetone.

¹² Aasi taateti shaashaa yiixiyinnee natooba, bi baatoo oogichii biijjiye. Bi biiyo qaaqqitaanona, aakumeenaꞌonani Doono Yeerichi gaachoon qaawaanoone.

¹³ Aasi bi taateti aabbaa ikkinnee natooba qitiꞌi bi qaabbechinaꞌo waan xaꞌeehe.

¹⁴ Shuunee ariyechinaꞌo qanniiti baribare gaawe cinnechi qimaamoon huuttiꞌi, Daawiti Katemooch bi qellich xaqqoon gooshiiꞌi bi shuuneti maashooch duukkiyeete. Bi oogoyichoo wodde mixon gutii qaaqqoon shookkiꞌi, oogichii eeppiyeete.