2 Kiinoo 15 - Kafa Linguistics Project

Taatoo Aasi Mooyinaꞌon Andiriyoo

¹ Doono Yeerichi Ayaano Odeedi bushoo Azariyaasi toommooch kindiye.

² Azariyaasi Aasina daneya hammiꞌi, “Aaso, Yihudee asheenaꞌonaa Biiniyaamee asheenaꞌonote, ta waanee ellebote. Ittoshi, Doono Yeerina tookkii ittoshi tunegaata, Doono Yeeriyoo ittoshina tookki tunemmone. Ittoshi qaawigaatoo ittoshich danemmone. Tunebaani biin ittoshi qayigaata, ittoshin qajjemmone.

³ Israꞌeeleenaꞌoo meeti yemeenoon ibere Nuggishaalloon, dojjechi qeeshaalloon, sheeraalloonoo beebee echeheete.

⁴ Tunebaani boonoshi iritee aabooba, Israꞌeeleenaꞌochi Nuggishoo Doono Yeer waan wotteꞌi biin qaawiyeete. Biyoo boonoshich danehe.

⁵ Showee toommooch beeto bulli oogeti keqqee toommooch bi beetoyich, ebiyoobee yemeenooch giyii kechii beetoyich diggoo aalloone.

⁶ Yeeri meeti iritoona boonoshin bi yexxitoyich, ikke aagetoo bare aagetoon, ikke katemoo bare katemoon kochii aallii beehe.

⁷ Tunebaani ittoshi shuunee gatiyoon danemmo ittoshi tunetoyich, kupphebote; ittoshi mochoo niraaye” iye.

⁸ Aasi Odeedi bushoo keemechi Azariyaasi keemmiti, ebi keemee qaaroon waayeꞌi goggehe. Yihudee showoochee, Biiniyaamee showoonaa geppechi Efreemee showoonoochee bi yechiti katemeenaꞌoochee ciigiiti shahalloon aalliihe. Doono Yeerichi yaafee kechi ciinooch beeti deejjee gudoon wochinnoon shuunehe.

⁹ Bi Nuggishoo Doono Yeeri biinna tookkii beemon beeggiꞌi, Israꞌeeleenaꞌoochee meeti asheenaꞌo bi waan waa kotetinaꞌone. Ebina Yihudee asheenaꞌon, Biiniyaamee asheenaꞌon, ebiyoommon wotta Efreemi yoodoochee, Minaasi yoodoonaa Simooni yoodoonoochee waaꞌi biinna tookkii beetinaꞌon kiciye.

¹⁰ Boonoshiyoo Aasi taateti aaraa uuchinnee natoobee keejjinnee agenooba, Yerusaalem kiceeheete.

¹¹ Arooba kecciꞌi boonoshi deebiti gijjoochee shabaatte balle gattoonaa shabaatte hume bagoonon Doono Yeerich deejjiyeete.

¹² Boonoshi qaabbechinaꞌochi Nuggishoo Doono Yeer waan ceeni boonoshi mulloona, ceeni boonoshi kashoonoo wottoyich wogoon giyiyeete.

¹³ “Israꞌeelee Nuggishoo Doono Yeerich goyinnee maddeyaani asho, bushoo woyee oogoo, anaamo woyee maachee bi tunetaa qitibe” iꞌi wogeheete.

¹⁴ Boonoshi qaaroon oogichiꞌi cookii ililiibee, tiroonaa shametoonon hugona Doono Yeerich wogoon giyiyeete.

¹⁵ Yihudee asheenaꞌo bulli ceeni boonoshi mulloona boonoshi wogetoyich, ceeni boonoshi gaboonoo bi waan boonoshi wottetoyich, biyoo boonoshina bi emiritoyich, ebi boonoshi wogeti wogoona emiriyeete. Doono Yeeriyoo boonoshi guudoona beetinaꞌo bulli waanee boonoshin kashiihe.

¹⁶ Taatoo Aasi bi nihoo indee Maꞌakin, ciigiiti nuggishee Asheeri misiloon bi neechitoyich, gennee abeeti tunoochee kindiihe. Aasi are misiloon tiichii yiikkehe; Qedirooni bamboochaanoo michiye.

¹⁷ Aasi guudi toommeexi goyinnee xaaꞌeenaꞌon Israꞌeelee showoochee ciroona aalliyoo bi qajjitaanona, kashoona bi beeti yemeeno bulliich Doono Yeerich gibeneetone.

¹⁸ Bi nihoonaa biinna kichiti qiicoon, ebiyoo aachoon, birewoonaa baribare qiicoonon deebiꞌi Yeerichi kexooch giijjiye.

¹⁹ Aasi taateti shaashaa uuchinnee natooch beddaahaa, bare koyo aalloone.