2 Kiinoo 14 - Kafa Linguistics Project

Yihudee Taatoo Aasi Topphiyee Asheenaꞌon Kochii Wochoo

¹ Abiyi qitiꞌi bi qaabbechinaꞌo waan xaꞌeehe. Biyoo Daawiti Katemooch duukkehe. Bi bushoo Aasi bi xaaꞌooch kereeꞌi taatehe. Bi yemeenooch showoo aashire naton kashehe.

² Aasi bi Nuggishoo Doono Yeeri aafooch gaawetonaa kaamoona tuneti mooyon tuniihe.

³ Biyoo dallaawe nuggisheenaꞌochi deejjee gudoonaa guudi toommeexi goyinnee xaaꞌeenaꞌonon aalliihe. Boonoshi goyinneebeeti xaqqee giimbeenaꞌon tiichiye. Boonoshi nuggishee Asheeri misileenaꞌon kuxxii dichiye.

⁴ Boonoshi qaabbechinaꞌochi Nuggishoo Doono Yeer waan boonoshi wottemmoyich, bi sheeroonaa bi getoonon boonoshi quyemmoyich, Yihudee asheenaꞌoyich gettiye.

⁵ Yihudee katemoo bulliichee guudi toommeexi goyinnee xaaꞌeenaꞌonaa ixaanee deejjee gudeenaꞌonon aalliihe. Bi taatee yemeenooch bi taatee showooch diggoo tunehe.

⁶ Showoo diggoon bi danetoyich, Yihudee showooch mishigechi katemeenaꞌon shuunehe. Doono Yeeri bi yemeenoon diggoo bi tuniitoyich, aroobee yemeenooch tiyiti koyo aalloone.

⁷ Aroochee Aasi Yihudee asheenaꞌoyich ishichiye: “Hini katemeenaꞌon shuunebone; boonoshi guudoonoo xaqqee uxereenaꞌon, dilaaleenaꞌon, shaaqqeenaꞌonaa boonoshi tuggeenaꞌonon gedone. No Nuggishoo Doono Yeer waan no wottetoyich, showoo noocho tunetone. Bi waan no wottetoyich, biyoo bulli gommona noon kashiitone” iye. Boonoshiyoo shuuneheete; boonoshichoo kaamehe.

⁸ Aasich ogooge gaachoonaa ginoonon yechiibeeti keejje balle hume Yihudee ginee naayinaꞌonaa gaachoon yechii maꞌoonoo awureebeeti gutte ballaa shinne hume Biiniyaamee ginee naayinaꞌona beetinaꞌone. Eboshi bulli ginee anaaminaꞌone.

⁹ Topphiyee asho Zaari ikke miliyoone ginee naayinaꞌonaa keejje balle gaarinon yechiꞌi boonoshin kocha Mareshi katemooch beddaahaa waahe.

¹⁰ Aasiyoo boonoshina koyeya hammiye. Mareshi gaꞌooch beeti Tsefatayi bamboochaa boonoshi koyee xaaꞌi xaaꞌoon yechiyeete.

¹¹ Aasi bi Nuggishoo Doono Yeer waan ishichiꞌi cookiye: “Doono Yeero, hakka guuteenaꞌon hakkechinaꞌo waanee gaacheebeeto neenoommo koniyoona aalloone. No Nuggishoo Doono Yeero, neen no gibenetoyich, ne shigoona hini mattiqutte ginee naayona koyemmo noone; noon gaachebe. Doono Yeero, no Nuggishoo neene; asho neen kochii wochoon hakkaache” iye.

¹² Doono Yeeriyoo Topphiyee asheenaꞌon Aasinaa Yihudee asheenaꞌonochi aafoochaa yexxiye. Topphiyee asheenaꞌoo wocee aalleheete.

¹³ Aasinaa biinna tookkii beeti asheenaꞌona boonoshin Geraara beddaahaa yookkiyeete. Topphiyee asheenaꞌo ciroona boonoshi aallemmi wottoon yexaa dihiyeete. Topphiyee asheenaꞌo Doono Yeerinaa bi ginee naayinaꞌonochi aafooch yexaa boonoshi dihitoyich, Yihudee asheenaꞌo wodde kecoon keccii daammiyeete.

¹⁴ Geraari katemee guudoona beeti katemeenaꞌo toommooch oogeti keqqoo Doono Yeer waanee bi kinditoyich, katemeenaꞌo bullin aalliiheete. Are katemeenaꞌooch wodde mooyo bi beetoyich keccii daammiyeete.

¹⁵ Qiddeenaꞌochi kaamboon kochiꞌi, meeti bageenaꞌon, emmisheenaꞌonaa gaaleenaꞌonon kecciyeete. Ebiyee gubb, Yerusaalem wotteheete.