2 Kiinoo 13 - Kafa Linguistics Project

Abiyinaa Yeroboꞌamina Koyo

¹ Taatoo Yeroboꞌami taateti aaraa shimittinnee natooba, Abiyi Yihudee showooch taatehe.

² Yerusaalem beechii keejje naton qeejjiye. Bi indee Mikaayi getteehan; biyoo Gibaahee asho Ureli busheene. Abiyinaa Yeroboꞌamina daggooch koyo koyee beehe.

³ Abiyi awudde balle hume aricheti ginee naayinaꞌon yechiꞌi koyooch hammiye. Yeroboꞌamiyoo shimitte balle hume aricheti ginee naayinaꞌon yaaroona neechiꞌi koyooch kechiye.

⁴ Abiyi geppechi Efreemee showooch beeti Tsemarayimi guudi toommooch neexeechii ishichiye: “Yeroboꞌaminaa Israꞌeeleenaꞌonote, waayebote.

⁵ Israꞌeelee Nuggishoo Doono Yeeri Daawitinaa bi yareenaꞌona Israꞌeeleenaꞌo toommooch bulli yemeenoon boonoshi taatemmoyich, kiikki wogoon bi gimon ariyaachote?

⁶ Daawiti bushoo Solomoonichi naayo tuneti Nebaaxi bushoo Yeroboꞌami tiyiꞌi, bi doono toommooch hukkoon shuunehe.

⁷ Gaacaalli gonde asheenaꞌoo bi waan kiceeheete. Solomooni bushoo Roboꞌami batt ariyaani bushoo tunee bi beehooba, boonoshin kochii wochoon hakkaani bi beehooba, bi toommooch tiyiyeete.

⁸ “Andoo ittoshi, Doono Yeeri Daawitichi yareenaꞌoyich immiti taatittinee toommooch tiya gabiibeeto ittoshine. Ebiyoo mattiqutte ginee naayo ittoshi tunoonaa ittoshi nuggisheenaꞌo boonoshi tunemmoyich Yeroboꞌami shuuneti maaminaꞌochi misiloon ittoshi yeshonoyichiye.

⁹ Harooni bushiisheenaꞌo tuneti Doono Yeerichi qeesheenaꞌonaa Leweenaꞌonon yookkito ittoshine. Bare showee asheenaꞌo tunii beetoommon, ittoshi qellich qeesheenaꞌon ukkiriito ittoshine. Ikke wuron woyee shabaatte bagee baaddoon yechiꞌi bi qelloon yaafiya waammo, ebi koote nuggisheenaꞌoyich qeeshoo tunoon hakkiye.

¹⁰ “Tunebaani nooch andoo Doono Yeeri, no Nuggishoone. No biin qayaano noone. Doono Yeerichi maddechinaꞌo, eboshiyoo Haroonichi yareenaꞌo tuneti qeesheenaꞌonaa Leweenaꞌona shuunee toommooch noonna tookkii beetinaꞌone.

¹¹ Maaddi maaddoonaa womikki womikkoona Doono Yeerich, micciibeeti deejjoonaa cinnechi ixaanoonon giddii beetinaꞌone. Yaaree koshonoo xalle madellooch kotii beetinaꞌone. Xum xumoon boonoshi aaxxemmoyich aachee ceechee kotoon qannii beetinaꞌone. No, no Nuggishoo Doono Yeerichi getoon quyaabeeto noone; tunebaani ittoshi qajjito ittoshine.

¹² Yeeri noonna tookkiiniye; noonoo yaabii beetone. Qeesheenaꞌoo boonoshi ginee tiroon hugi ittoshi toommooch timoyich noonna tookkii beetinaꞌone. Israꞌeeleenaꞌote, ittoshi qaabbechinaꞌochi Nuggishoo Doono Yeerina tookki koyeyaahote; ittoshich kaameyaachemmone” iye.

¹³ Areegaata, Yeroboꞌami bi ginee naayinaꞌoochee qatinaꞌon Yihudee ginee naayinaꞌochi gubbaa boonoshi ottemmoyich daachiitone. Echeenaꞌonoo biinna tookki Yihudee ginee naayinaꞌona aafaa boonoshi koyemmoyich tuniihe.

¹⁴ Yihudee asheenaꞌo boonoshi guudoona ciinnii, aafinaa gubbinon giicheetinaꞌo boonoshi tunoon beeggiꞌi, Doono Yeer waan cookiyeete; qeesheenaꞌoo tiroon huggiyeete.

¹⁵ Yihudee asheenaꞌoo kokkoriibee Abiyin dabbii koyeheete. Yeeriyoo Yeroboꞌaminaa Israꞌeelee asheenaꞌonon yexxiye.

¹⁶ Israꞌeeleenaꞌoo Yihudee asheenaꞌo aafoochee woceheete. Yeeriyoo Israꞌeeleenaꞌon boonoshi kishooch beshiiꞌi immiye.

¹⁷ Abiyinaa bi asheenaꞌona gonde yexon boonoshin yexxiyeete. Israꞌeeleenaꞌo daggoochee uuche balle hume aricheti ginee naayinaꞌon wuxiyeete.

¹⁸ Ebiyooba Israꞌeeleenaꞌo ceeqiyeete. Yihudee asheenaꞌo boonoshi qaabbechinaꞌochi Nuggishoo Doono Yeerin boonoshi gibenetoyich, boonoshin kochii wochiyeete.

¹⁹ Abiyiyoo Yeroboꞌamin yookkiichii, Beeteelin, Yeshanaahinaa Efirooninon boonoshi gafeenaꞌona tookkii deqqiye.

²⁰ Yeroboꞌami ebiyee gubb, Abiyichi yemeenooch wochinnoon qaalloon hakkaanoone. Biyoo Doono Yeeri naxetaa qitiye.

²¹ Tunebaani Abiyi kupphee kupphee hammiye. Aaraa awudde mecheenaꞌon shaaggiꞌi, hiyaa gutte anaami bushiishoonaa aaraa shiritte maache bushiishoonon shiyihe.

²² Abiyi shuuneti eche shuunoo, bi tuniiti mooyonaa bi gettiti mooyona keemechi Iidichi kiinee macaafooch kooreetone.