2 Kiinoo 12 - Kafa Linguistics Project

Yihudee Asheenaꞌon Gibitsee Asheenaꞌo Koyo

¹ Roboꞌami bi taatittino manjaa kupphe taatoo tuneechii, biinnaa Israꞌeelee asho bullina Doono Yeerichi sheeroon quyoon qajjiyeete.

² Doono Yeerich gibeneyoo boonoshi qajjitoyich, Roboꞌami taateti uuchinnee natooba, Gibitsee taatoo Shishaaqi waaꞌi Yerusaalemin kochiye.

³ Biyoo humaa gutte balle gaarinaa shiche hume hareshechinaꞌonon yechiꞌi waahe. Biinna tookkii Gibitsee waati asheenaꞌo mattiqutteenaꞌone. Eboshiyoo Liibiyeenaꞌo, Sukeenaꞌonaa Topphiyee asheenaꞌonane.

⁴ Yihudee showooch beeti mishigechi katemeenaꞌon kochii yechiye; Yerusaalem beddaahaanoo waahe.

⁵ Aroochee keemechi Shemayaahi Shishaaqin shattiꞌi, Yerusaalem kiceeti, Roboꞌaminaa Yihudee iraasheenaꞌona waan waaꞌi, boonoshich, “Doono Yeeri ishichiye: ‘Taan ittoshi qajjitoyich, tawoo ittoshin Shishaaqichi kishooch duppehoye’ itone” iye.

⁶ Aroochee taatoonaa Israꞌeelee woraaferasheenaꞌona boonoshi qelloon giishiiheete; boonoshiyoo “Doono Yeeri tuniibeeto tatoone” iyeete.

⁷ Doono Yeeriyoo boonoshi qelloon boonoshi giishiyoon beeggiꞌi, Shemayaahi, “Boonoshi qelloon giishiitinaꞌone. Ebich boonoshin aalliyaachemmo taane; boonoshin wodiyemmo taane. Ta kaaro bullin Shishaaqichi kishoona Yerusaalemi toommooch kindiyaachemmo taane.

⁸ Tunebaani taach hajjeyoonaa showee taateenaꞌoyich hajjeyoonochi daggooch beeti barbarittinoon boonoshi ariyemmoyich, biich hajjeyemminaꞌone” iye.

⁹ Ebina Gibitsee taatoo Shishaaqi waa Yerusaalemin kochiꞌi, Doono Yeerichi yaafee kexonaa taatee kexonooch beeti aaxxi qiico bullin daammiye. Solomooni shuuneti aachee gaacheenaꞌooch beddaahaa bulli mooyon daammiye.

¹⁰ Taatoo Roboꞌami eboshi keroon gooshee gaacheenaꞌon shuuniiꞌi, taatee kechi kelloon quyeebeeti kellechinaꞌochi ukkireenaꞌo quyemmoyich tuniihe.

¹¹ Doono Yeerichi yaafee kexooch taatoo hammimmi aabo bulliich, kellechinaꞌo ebi gaachoon yechiꞌi biin deennii beeheete; aroochee wochiꞌi kellechinaꞌo kexooch kotii beeheete.

¹² Roboꞌami bi qelloon bi giishiitoyich, Doono Yeeri kaaro bi waanee wottehe. Ciroona biin aalliyaanoone. Yihudee showoo bulliichoo wochinnoon mooyo mashaamiye.

Qaminona Giddeti Roboꞌamichi Taatee Yemeeno

¹³ Taatoo Roboꞌami Yerusaalemaa bi taatittinoon manjiiꞌi taatehe. Roboꞌami bi taatehooba, bi eeno aabbaa ikke natone. Bi shigo arooch beeyemmoyich, Israꞌeelee showoo bulli daggoochee Doono Yeeri kaacciti Yerusaalem beechii aaraa shabaatte naton qeejjiye. Bi indee Naꞌaami getteehan. Biyoo Amoonee asheene.

¹⁴ Roboꞌami Doono Yeer waan wottoyich bi mulloon kaachee qayona gonde mooyon tuniihe.

¹⁵ Roboꞌami shuuneti shuunoo batti battichoochee tiijjii ciireexooch beddaahaa, wotta bi kechi asheenaꞌochi mooyoo keemechi Shemayaahinaa yaaꞌechi Iidinochi kiinee macaafooch kooreetone. Roboꞌaminaa Yeroboꞌamina kuxeyaani koyoon koyee beeheete.

¹⁶ Roboꞌami qitii bi qaabbechinaꞌo waan xaꞌeeꞌi Daawiti Katemooch duukkehe. Bi bushoo Abiyi bi xaaꞌooch kereeꞌi taatehe.