2 Kiinoo 11 - Kafa Linguistics Project

Shemayaahi Keemmiti Keemo

¹ Roboꞌami Yerusaalem waachii, Israꞌeeleenaꞌon koyiree taatittinoon biich boonoshi wochemmoyich, Yihudinaa Biiniyaaminochi yoodoochee aricheti balli shinne hume ginee naayinaꞌon kiciye.

² Tunebaani Yeer asho Shemayaahich Doono Yeeri ishichiye:

³ “Solomooni bushoo, Yihudee taatoo Roboꞌamich, Yihudee asheenaꞌonaa Biiniyaamee asheenaꞌona tuneti Israꞌeeleenaꞌo bullich ishichibe:

⁴ Doono Yeeri ishichiye: ‘Ebi mooyo ta waanee bi tunetoyich, ittoshi maneenaꞌon koyoyich hammaahote; asho bi ikkikkoona bi kexi kexooch wottebe’ itone gete” iye. Ebina Doono Yeerichi qaaroon waayeꞌi, Yeroboꞌamin koyoyich hamon qajjii wotteheete.

Roboꞌami Katemeenaꞌooch Mishigoon Shuuniyoo

⁵ Roboꞌami Yerusaalem beechii Yihudee showooch beeti katemeenaꞌooch mishigoon shuuniihe.

⁶ Eboshiyoo, Beetilehemi, Exaami, Teqoꞌi,

⁷ Beet Suuri, Sokoohi, Adulaami,

⁸ Gaati, Mareshi, Ziifi,

⁹ Adorayimi, Lakishi, Azeqi,

¹⁰ Tsoriꞌi, Ayalooninaa Kebirooninane. Ebi Yihudee showoonaa Biiniyaamee showoonooch beeti katemeenaꞌooch kupphe mishigoon shuuniihe.

¹¹ Manje katemeenaꞌon shuuniichii, ginee iraasheenaꞌon arooch kotiihe. Aroochoo maayoon, zayitoonaa woyinoonon kiciihe.

¹² Bulli katemeenaꞌooch gaachoonaa ginoonon kotiihe. Katemeenaꞌonoo manjiihe; ebiyoommon Yihudee showoonaa Biiniyaamee showoonon hajjiye.

Qeesheenaꞌonaa Leweenaꞌona Womo

¹³ Israꞌeelee showoo bulliich beeti, qeesheenaꞌonaa Leweenaꞌona boonoshi woraafi woraafoochee Roboꞌam waan waaheete.

¹⁴ Leweenaꞌo boonoshi showoonaa boonoshi yaaphoonon duppiichii Yihudee showoonaa Yerusaaleminooch boonoshi waato, Doono Yeerichi qeesheenaꞌo tuneree boonoshi maddaachemmoyich Yeroboꞌaminaa bi shiijjereenaꞌona bajjitoyichiye.

¹⁵ Yeroboꞌami, guudi toommeexi goyinnee xaaꞌeenaꞌoochaa, bi shuuneti emmisheenaꞌonaa maaminaꞌonochi misileenaꞌoyich maddemmi, bi hajjee qeesheenaꞌon ukkiriitone.

¹⁶ Wotta Israꞌeelee yoodo bulliichee mulloochee tiijjiꞌi Israꞌeelee Nuggishoo Doono Yeerich maddeya qaawitinaꞌo bulli, boonoshi qaabbechinaꞌochi Nuggishoo Doono Yeerich deejjoon giddiyoyich, Leweenaꞌon dabbiꞌi Yerusaalem waatinaꞌone.

¹⁷ Daawitinaa Solomooninochi gommon dabboona keejje naton Yihudee taatittinoon kupphiiheete. Solomooni bushoo Roboꞌaminoo gaacheheete.

Roboꞌami Kechi Asheenaꞌo Mooyo

¹⁸ Roboꞌami Mahalaatin shaaggiye. Mahalaati Daawiti bushoo Yerimooti busheene; bi indeyoo Iseyi bushoo Eliyaabi bushee Abihayiline.

¹⁹ Mahalaatiyoo biich Yehuushi, Shemaariyinaa Zahaamina getteebeeti anaami bushiishoon shiyahan.

²⁰ Aree hillooch, Abisoloomi bushee Maꞌakin shaaggiye. Maꞌakiyoo Abiyi, Ataayi, Zizaahinaa Shelomitina getteebeeti anaami bushiishoon shiyahan.

²¹ Roboꞌami bi mecheenaꞌonaa bi naamacheenaꞌona bulliyee beshoon Abisoloomi bushee Maꞌakin shunniye. Biichoo aaraa shimitte mecheenaꞌonaa shiche naamacheenaꞌona beetinaꞌone. Hiyaa shimitte anaami bushiisheenaꞌonaa shiche maache bushiisheenaꞌononoo shiyitone.

²² Roboꞌami, Maꞌaki bushoo Abiyin taatiiya bi qaawitoyich, bi maneenaꞌo toommooch iraashiihe.

²³ Roboꞌami acona bi anaami bushiishoochee qatinaꞌon Yihudee showoonaa Biiniyaamee showoonooch beeti woraafo bullinaa manje katemoo bullinooch shacciye; boonoshichoo wodde mooyon immiye; meeti mecheenaꞌonoo boonoshich shaakkiihe.