2 Kiinoo 10 - Kafa Linguistics Project

Israꞌeelee Yoodeenaꞌo Roboꞌami Toommooch Hukkoon Tiijjoo

¹ Israꞌeeleenaꞌo bulli biin taatiiya Shekeem boonoshi kiceetoyich, Roboꞌami arooch hammiye.

² Taatoo Solomooni aafoochee Gibits maxxeti, Nebaaxi bushoo Yeroboꞌami ebi mooyon waayeꞌi, Gibitsee wottee waahe.

³ Israꞌeeleenaꞌo bi waan wochoon daachiiꞌi biin ceekkiiheete. Aroochee Yeroboꞌaminaa Israꞌeeleenaꞌo bullina Roboꞌam waan waaꞌi, biich ishichiyeete:

⁴ “Ne nihoo magge waanjoon no toommooch minjitone. And illa, ne nihoo no toommooch maggiiti shuunoonaa no toommooch bi minjiti magge waanjoonon nooch ne kettiigaata, neech maddemmo noone” iyeete.

⁵ Biyoo boonoshich, “Eke hanaachi keejj ta waan wotteree wobote” iye. Ebina asheenaꞌo wotteꞌi hammiyeete.

⁶ Aroochee taatoo Roboꞌami, “Ebi asheenaꞌoyich ama getiree wochibote?” iꞌi bi nihoo Solomooni kashoona beehooba, bi nihoyich maddeebee echeti, geeneenaꞌon echehe.

⁷ Boonoshiyoo, “Hini asheenaꞌoyich deꞌe mooyon ne tuniigaata, boonoshin ne emirikkigaata, shiimoona boonoshich ne yibbaategaata, boonoshiyoo bulli yemeenoon neech hajjeeyeemminaꞌone” iꞌi wochiyeete.

⁸ Tunebaani Roboꞌami geeneenaꞌo ciicciti ciicoon qajjiichii, biinna tookkii dicciti, wotta bi aafooch neexee maddeebeeti gurimaasheenaꞌona tookkii koceehe.

⁹ Biyoo boonoshich, “ ‘Ne nihoo no toommooch minjiti waanjoon nooch kettiibe’ ii beeti asheenaꞌoyich ta wochemmoyich taach ittoshi ciiccemmo, amooniye?” iye.

¹⁰ Biinna tookkii dicciti gurimaasheenaꞌo biich, “ ‘Ne nihoo no toommooch magge waanjoon minjitone. Ne, nooch kettiibe’ ii beeti asheenaꞌoyich ‘Ta qeexxe ta nihoochi shimetoyee beshe uureene.

¹¹ Ta nihoo magge waanjoon ittoshi toommooch minjitone; tunebaani ta, aroyee beshoon ittoshich maggiyemmo taane. Ta nihoo arengoona ittoshin xoobbitone; tunebaani ta, barahee machoona ittoshin xoobbemmo taane’ gete” iyeete.

¹² Taatoo, “Hanaachi keejj ta waan wotteree wobote” bi itoyich, Yeroboꞌaminaa asheenaꞌo bullina keejjinnee qemooba wotteꞌi waaheete.

¹³ Taatoo geeneenaꞌochi ciicoon qajjiichii, asheenaꞌoyich magge mooyon yibbaatehe.

¹⁴ Taatoo Roboꞌami gurimaasheenaꞌochi ciicoon waayeꞌi, “Ta nihoo magge waanjoon ittoshi toommooch minjitone; tunebaani ta, aroyee beshoon ittoshich maggiyemmo taane. Ta nihoo arengoona ittoshin xoobbitone; tunebaani ta, barahee machoona ittoshin xoobbemmo taane” iye.

¹⁵ Doono Yeeri Shiloohee asho Akiyina, Nebaaxi bushoo Yeroboꞌamichon bi gettiti qaaroon ceechoyich, bi waanaa maacheto bi tunetoyich, taatoo asheenaꞌo mooyon waayeyaanoone.

¹⁶ Israꞌeeleenaꞌo bulli taatoo boonoshi mooyon waayee qayon beeggiꞌi, taatoyich ishichii wochiyeete: “Daawit waanee no danemmi mooyo amoone? Iseyi bushoo waanee no woraashemmi mooyo, aalloone. Israꞌeeleenaꞌote, ittoshi ikkikkoona, ittoshi duukkaani duukkaanooch wottebote. Daawito, and ne hajjee kexon quyebe” iyeete. Ebina Israꞌeeleenaꞌo bulli boonoshi duukkaani duukkaanooch wotteheete.

¹⁷ Tunebaani Roboꞌami Yihudee katemeenaꞌooch koteti Israꞌeeleenaꞌo toommooch taatehe.

¹⁸ Aroochee taatoo Roboꞌami maddechinaꞌochi ukkiroo tuneti Adoraamin Israꞌeeleenaꞌo waan daachiihe; tunebaani Israꞌeeleenaꞌo xaqqoona yexxiꞌi biin wuxiyeete. Taatoo Roboꞌamiyoo afaafinoona gaariich kechiꞌi, muriccii Yerusaalem hammiye.

¹⁹ Ebina Israꞌeeleenaꞌo hanaach beddaahaa Daawitichi yareenaꞌo toommooch hukkoon shuuneheete.