2 Kiinoo 1 - Kafa Linguistics Project

Ariyoon Danoyich Doono Yeer Waan Solomooni Corootoo

¹ Daawiti bushoo Solomooni, bi Nuggishoo Doono Yeeri biinna tookkii tuneꞌi oogeton aricheton biin bi tuniitoyich, bi taatittinoon manjiihe.

^2-3 Solomooniyoo Gibeꞌoon boonoshi hammemmoyich Israꞌeelee asho bullich, humee iraasheenaꞌoyich, ballee iraasheenaꞌoyich, nallechinaꞌoyich, Israꞌeelee showoo bulliich beeti woraaferasheenaꞌonaa qaabbechi yaree ukkireenaꞌonoyich gettiye. Doono Yeerichi guuno Muusi barahoochaa shuuneti, Yeerichi danee duukkaanoo beeto Gibeꞌoon bi tunetoyich, arooch beeti guudi toommeexi goyinnee xaaꞌooch Solomooninaa biinna tookkii beeti iitoo bullina hammiyeete.

⁴ Tunebaani Daawiti Doono Yeerichi taabootoon Qiriyaat Yeꞌariimi katemoochee deebiꞌi, Yerusaalem, taabootoyich bi qanniiti duukkaanooch kotiitone.

⁵ Huuri bushoo, Uriyi bushoo, Betsaleeli shuuneti gooshee deejjee gudo Doono Yeerichi yaafee duukkaanee ciinooch, Gibeꞌoon bi beetoyich Solomooninaa iitoo bullina ebi aroochaa Doono Yeerich goyinneheete.

⁶ Solomooni Doono Yeeri aafooch, danee duukkaanee gaꞌooch beeti gooshee deejjee gudooch hammiye. Aree toommooch hume gijjoon giddiiꞌi micciibeeti deejjoon deejjiye.

⁷ Aroobee xum Doono Yeeri Solomoonina daneꞌi, “Neech ta immemmoyich ne qaawaabeeto amoon gaata, taach gete” iye.

⁸ Solomooniyoo Yeerich ishichiye: “Ta nihoo Daawitich ooge ne shoodoon bekkiito neene. Bi xaaꞌoochoo keraꞌa taan taatiito neene.

⁹ Nuggishoo Doono Yeero, ta nihoo Daawitich ne gibenikkiti gibenoon ceechibe. Showee toommeexi qacoochoommon woddeti asheenaꞌo toommooch taan taatiito neene.

¹⁰ Hini asheenaꞌon qeejjoo ta hakkemmoyich shalligoonaa ariyoonon taach imbe. Ebi tuno qayigaata, ebi shaahe ne asheenaꞌon nallii qeejjoon hakkemmo konine?” iye.

¹¹ Yeeriyoo biich ishichiye: “Ne mullee qaatoo ebi bi tunetoyich, gaannoon, gijjoon, oogoon, ne etteenaꞌochi kashoon woyee ne eeno genjoon qolleyaanoon, boonoshi toommooch neen ta taatiiti, ta asheenaꞌon nallii qeejjoyich shalligoonaa ariyoonon ne qolletoyich,

¹² ebi ne qolleti shalligoonaa ariyoonon neech immemmo taane. Neyee aaf taateti taateenaꞌoochee konichona aalli, neyee gubb taatemmi taateenaꞌoochee koniyoona daneyaachemmi gaannoon, gijjoonaa oogoonon neech immemmo taane” iye.

Taatoo Solomoonichi Taatittinoonaa Gaannoona

¹³ Aroochee Solomooni Doono Yeerichi danee duukkaanoo beeti, Gibeꞌooni guudi toommeexi goyinnee xaaꞌoochee Yerusaalem waahe. Israꞌeeleenaꞌo toommoochoo taatehe.

¹⁴ Solomooni, gaarinaꞌonaa hareshechinaꞌonon kiciye. Ikke humaa awudde balle gaarinaꞌonaa aaraa gutte hume hareshechinaꞌona biich beetinaꞌone. Eboshinoo gaarinaꞌochi katemoonaa bi beeti Yerusaaleminooch boonoshi beeyemmon tuniihe.

¹⁵ Taatoo, aachoonaa birewoona xaqqoochoommon Yerusaalem bi meettemmon tuniihe. Yigee mixonoo Shefeeli worebe showooch colleebeeti caaroochoommon bi woddemmoyich tuniihe.

¹⁶ Solomooniyoo haresheenaꞌo Gibitsee showoonaa Quwee showoonoochee kemetaa boonoshi woyemmoyich tuniihe. Taatoochi giixechinaꞌo haresheenaꞌon Quwee showoochee kemeꞌi deebii beeheete.

¹⁷ Gibitsee ikke gaarich shiritte balle sheqeelee birewoon, ikke hareshoyich balli aache sheqeelee birewoon qocciꞌi deebii beeheete. Boonoshiyoo wochiꞌi Hitee taateenaꞌonaa Sooriyee taateenaꞌonoyich kemmii beeheete.