1 Yowannisi 5 - Kafa Linguistics Project

Hini Alemoon Kochii Wochoo

¹ Yesuusi aroo Kiristoosi bi tunoon iberiiꞌi bi mulloon bi toommooch tooꞌiito bulli Yeer waanee shiijjetone. Nihoon shunniibeeto bulli bi bushoon wotta shunnii beetone.

² Yeerin shunnaꞌa bi geton no ceechigaata Yeerichi bushiishoon no shunon ebina ariibeeto noone.

^3-4 Yeerin no shunnaa beetoyich, bi getoon ceechaabeeto noone; Yeer waanee shiijjeto bulli hini alemoon kochii wochii bi beetoyich, bi geto maggoo toonoone. Hini alemoon kochaa no wochaabeeto bi toommooch no mullee tooꞌiyoonane.

⁵ Yesuusi Yeerichi Bushoo bi tunoon iberii beetoyee damba, hini alemoon kochii wochiibeeto, konine?

Yeerichi Bushoochon Miixeebeeti Miixeenaꞌo

⁶ Aachi malletoonaa damee malletoona waati Yesuus Kiristoosi hinine. Biyoo aachi malletoonaa damee malletoonalli, aachi malletoona baach waataanoone. Ayaano iberoo bi tunetoyich, miixeebeeto Ayaanoone.

⁷ Miixee beetinaꞌo keeminaꞌone;

⁸ boonoshiyoo Ayaano, aaconaa damoonane. Ebi keeminaꞌo miixeti miixo ikkoone.

⁹ Ashi miixoon iberiibeeto noone; tunetaa Yeerichi miixo beshoone. Hini miixo Yeeri bi Bushoochon bi miixeti miixoone;

¹⁰ mulloon Yeeri Bushoo toommooch tooꞌii beetoyich Yeerichi miixo bi mullooch beetone; Yeerichon iberiyaano Yeeri bi Bushoochon miixeton bi iberiyoo qajjitoyich, Yeerin kootiitone.

¹¹ Yeeriyoo bulli yemeenee kashoon nooch immitone; hini are kashoo bi Bushoona beetone; miixeeto ebine.

¹² Yeerichi Bushoo biich beeto, kashechone; Yeerichi Bushoo biich aalloyich kashoo aalloone.

Yeerichi Bushiisheenaꞌoyich Icheti Ciireexi Shalligichoo

¹³ Kasho, aroo bulli yemeenee kasho, ittoshich bi beemon ittoshi ariyemmoyich, ittoshi mulloon Yeeri Bushoo toommooch tooꞌiiti ittoshich hini wochoon koorito taane.

¹⁴ Yeeri aafooch no shataani naboo, amee mooyonona bi daaggoona no qollegaata, no qolloon bi waayee beetoyichiye.

¹⁵ No qolleton Yeeri waayoon no arii beetoyich, no qolleti qolloon bi waanee no danoon ariibeeto noone.

¹⁶ Wotta koniyoona ikke bi manoo qitooch biin bechaachemmi axaaxoon bi shuunee beetaa bi beegigaata, corootibe; arooba Yeeri ebi qitooch biin bechaachemmi axaaxoon shuuneebeeti uroyich kashoon immemmone. Ashoon qitooch bechiibeeti axaaxoo beetone; ebiyoommi axaaxoyich qollebe getaache.

¹⁷ Asho shuuneebeeti gonde mooyo bulli axaaxoone; wotta ashi toommooch qitoon bechaachemmi axaaxoo beetone.

¹⁸ Illa Yeer waanee shiijjeto bulli axaaxoon bi shuunee qayon ariibeeto noone. Yeerichi Bushoo biin bi quyee beetoyich, gondoochi nihoo bi achooch shagaachemmone.

¹⁹ No Yeericho no tunoon, wotta hini alemeexinaꞌo bulli, gondoochi nihoyich boonoshi hajjeyoonoo ariibeeto noone.

²⁰ Wotta Yeerichi Bushoo womonaa iberoo tuneti Yeerin no ariibeeti mulloon nooch bi imonon ariibeeto noone. Iberoo tuneti Yeerina tookkii nooch ikkittino beetone; wotta bi Bushoo Yesuus Kiristoosina tookkii nooch ikkittino beetone. Biyoo ibere Nuggishoonaa bulli yemeenee kashoonane.

²¹ Ta shuni bushiisheenaꞌote! Shahalloyich goyinnoochee ittoshi qelloon quyebote!