1 Yowannisi 4 - Kafa Linguistics Project

Iberee Ayaanoonaa Kootee Ayaanoonon Bariiꞌi Ariyoo

¹ Ta shunechinaꞌote! Meeti koote keemechinaꞌo showee toommooch boonoshi kechitoyich, ayaaneenaꞌo Yeer waanee boonoshi tunoonaa tunee qayonon xiishiree ariibotalli, ayaano bullin iberiyaahote.

² Yeerichi Ayaanoon ittoshi ariyemmo ebinane: Yesuus Kiristoosi meenona bi womon miixeebeeti ayaano bulli Yeer magechone.

³ Wotta Yesuus Kiristoosi meenona bi womon nookkeebeeti ayaano bulli Yeer magecho toonoone. Ebiyoo Kiristoosina koyechi ayaanoone. Aroo woyemmone getaa waayeto ittoshine; andolla hini showee toommooch beetone.

⁴ Ta shuni bushiisheenaꞌote! Ittoshi Yeer magecho ittoshine; hini alemeexi asheenaꞌona tookkii beetoyee, ittoshina tookkii beeto besho bi tunetoyich, are koote keemechinaꞌon kochii wochito ittoshine.

⁵ Boonoshiyoo hini alemeexinaꞌone; ebich alemeexon gettii beetinaꞌone; wotta boonoshi getaa hini alemeexinaꞌo waayee beetinaꞌone.

⁶ Tunebaani no Yeer magecho noone; ebich Yeerin ariibeeto bulli noochon waayee beetone; Yeer waanee tuneyaano bulli wotta noochon waayeyaanoone. Ebina iberee Ayaanoonaa kootee ayaanoonon bariiꞌa ariibeeto noone.

Noonnaa Noonna Shuno

⁷ Ta shunechinaꞌote! Shuno Yeer waanee bi tunetoyich, noonnaa noonna shunebone. Ashoon shunniibeeto bulli Yeer waanee shiijjetone; wotta Yeerinoo arii beetone.

⁸ Yeeri shunoone; ebich ashoon shunaano Yeerin ariyaanoone.

⁹ Yeeri ikke bi Bushoon hini alemooch bi deejjito, bi Bushoo waanaa kashoon no danemmoyichiye. Ebina Yeeri noon bi shunon beeggeto noone.

¹⁰ Shuno getoo ebine: No Yeerin no shunnetoyich tuneyaanoon, Yeeri bi qelloona noon shunniꞌi, no axaaxoon bi maaremmi deejjoo bi tunemmoyich, bi Bushoon bi deejjoone.

¹¹ Illa ta shunechinaꞌote! Yeeri eechiꞌi noon bi shunnitoyee, noonnaa noonna shuno nooch qaawiihe.

¹² Bi aafoona Yeerin beeggito koniyoona aalloone; tunebaani noonnaa noonna no shunegaata, Yeeri noonna tookki beeyemmone; wotta bi shuno noonna ceeno tunemmone.

¹³ Yeeri bi Ayaanoon nooch bi immitoyich, biinna tookkii ikkittinoona no beemonaa biyoo noonna tookkii bi beemonon ariibeeto noone.

¹⁴ Nihoo Yeeri bi Bushoon hini alemooch beetinaꞌon Wodiyecho bi tunemmoyich wochee bi deejjoon beeggeto noone; ebich miixaabeeto noone.

¹⁵ Asho koniyoona “Yesuusi Yeerichi Bushoone” iꞌi bi miixegaata, Yeeri biinna tookkii beetone; biichoo Yeerina tookkii ikkittino beetone.

¹⁶ Ebina Yeeri noon bi shunon ariito noone; iberiitoo noone. Yeeri shunoone; ebich shunoona beeto, Yeerina tookki beeyemmone; Yeeriyoo biinna tookki beeyemmone.

¹⁷ Kiristoosi beemoommon, no wotta hini alemooch beeto noone. Ebich nallaa gallooba aafee kuppho nooch bi beeyemmoyich, shuno ebina no daggoochaa ceeno tunetone.

¹⁸ Ebiyoommi shunoyich shato aalloone; ceeni shuno shaton kichi duppemmone; shattiibeeti ashoon shato sheerii beetone. Ebich asho bi shatigaata, are asho Yeeri biin bi shunon batt xiishii ariyaanoone.

¹⁹ Yeeri shiichii noon bi shunnitoyich, no biin shunnaabeeto noone; noonnaa noonnoo shunaabeeto noone.

²⁰ Koniyoona “Yeerin shunnaabeeto taane” iibee bi manoon bi shixigaata, koottitone; bi beeggiti bi manoon shunaano, bi beegaani Yeerin shunon aabichiree hakkehe?

²¹ “Taan shunniibeeto bi manoon wotta shune” iꞌi Yeeri nooch gettitone.