1 Yowannisi 3 - Kafa Linguistics Project

¹ “Yeerichi bushiishoo” getaa no ceekkemmoyich, Nihoo Yeeri aabichiꞌi noon bi shunnito gaata beegote! Iberoon Yeerichi bushiishoo noone. Ebich hini alemeexi asheenaꞌo Yeerin ariyoon boonoshi qajjitoyich, noon ariyaacheete.

² Ta shunechinaꞌote! And Yeerichi bushiishoo noone; gubbich amo no tunemmo gaata batt aricheyaanoone. Tunebaani Kiristoosi waataa xiishi ciinnemmo no tunetoyich, biin shaahemmo no tunoon ariibeeto noone.

³ Illa Kiristoosina ebi gibenoon geddiibeeto bulli, Kiristoosi xalloo bi tunoommon bi qelloon xallii beetone.

⁴ Axaaxee shuuno sheeroon shaaddo bi tunetoyich, axaaxoon shuuneebeeto bulli Yeerichi sheeroon shaaddee beetone.

⁵ Kiristoosi axaaxoon wokkiiya bi womon ariibeeto ittoshine; bi toommoochoo axaaxoo aalloone.

⁶ Ebich Kiristoosina tookkii biich beeti ikkittinoona manjiꞌi beeto axaaxoon shuuneyaache; axaaxoon shuuneebeeto bulli, biin beegaanoone; biin ariyaanoone.

⁷ Ta shuni bushiisheenaꞌote! Koniyoona ittoshin bi muriciyaachemmoyich, ittoshi qelloon ariibot! Kiristoosi cadiqo bi tunetoommon cadiqittinoon tuniibeeto cadiqoone.

⁸ Tunebaani axaaxoon shuuneebeeto daabiloosi magechone. Daabiloosi shiichoochee tiijjiꞌi axaaxoon shuunee beetone. Yeerichi Bushoo bi waato daabiloosichi shuunoon happoyichiye.

⁹ Yeer waanee shiijjeto bulli biin Yeerichi bushoo tuniiti yaroo bi waan bi beetoyich, axaaxoon shuuneyaache. Yeer waanee bi shiijjetoyich, axaaxoon shuunoon hakkaache.

¹⁰ Yeerichi bushiisheenaꞌonaa daabiloosichi bushiisheenaꞌona ebina bariꞌi arichee beetinaꞌone: Cadiqee shuunoon shuuneyaano, bi manoonoo shunaano, Yeerichi bushoo toonoone.

Yeerichi Bushiisheenaꞌochi Shuno

¹¹ Shiichoochee tiijjiꞌi ittoshi waayeti wocho “Noonnaa noonna shunebone” ii beetone.

¹² Qayeeliyoommon tunaayone; aroo gondoochi nihoo magechone; aroo bi hajjee manoon wuxiye. Amoyichiye bi wuxito? Bi hajjee shuunoo gondo, bi manoochi shuunoo cadiqo bi tunetoyichiye.

¹³ Illa ta maneenaꞌote! Alemee asheenaꞌo ittoshin boonoshi shixigaata, ebin mooch haddiyaahote.

¹⁴ No, no maneenaꞌon shunnaabeeto no tunetoyich, qitoochee kashee wodooch no kimon ariibeeto noone; bi manoon shunaano bi beeto, batt qitoochiye.

¹⁵ Bi manoon shixxiibeeto bulli ashoon wuxitoommone; ashoon wuxito bulli, bulli yemeenee kasho biich aallo bi tunoon ariibeeto ittoshine.

¹⁶ Kiristoosi no keroyich bi kashoon beshiiꞌi immitone; ebina ashoon shuno amo gaata beeggeto noone. Ebich, no maneenaꞌochi keroyich no kashoon beshiiꞌi imo nooch qaawiihe.

¹⁷ Tunebaani gijjecho koniyoona bi manoo biich qaawii beeton bi muccetaa beeggiibee ariqqeyaano bi tunegaata, aabichiree Yeerichi shuno bi waan beeyehe?

¹⁸ Ta shuni bushiisheenaꞌote! Ibere maacoona no shunoon shuunoona bekkiibonalli, qaaroona woyee yibbaatoona baach shunaayone.

^19-20 Ebina iberoo tuneti Yeer magecho no tunoon manjiyemmo noone; ebinoo “No mullo noon ittibatee beetone” iyaꞌa no shalligaabeeti mooyo bulliichee Yeeri aafooch kashemmo noone. Aroo no mulloyee beshoon oogoo bi tunetoyich, bullin arii beetone.

²¹ Ta shunechinaꞌote! No mullo noon ittibateyaano bi tunegaata, Yeer waan katinoyich kupphaabeeto noone.

²² Tuniibote bi ii beeton no shuunaa beetoyich, biin emirikkii beetonoo no tunii beetoyich, no qollaabeeto bullin bi waanee danaabeeto noone.

²³ Tuniibote bi ii beeto ebine: Bi Bushoo Yesuus Kiristoosi toommooch no mulloon no tooꞌiyemmoyich, wotta Kiristoosi nooch gettitoommon noonnaa noonna no shunemmoyichiye.

²⁴ Hini Yeeri gettiti mooyon tunii beetoyich Yeerina tookkii ikkittino beetone; Yeerichoo biinna tookkii ikkittino beetone. Noonna tookkii bi beemon nooch bi immiti bi Ayaanoona ariibeeto noone.