1 Yowannisi 2 - Kafa Linguistics Project

¹ Ta shuni bushiisheenaꞌote! Hinin ittoshich ta kooraabeeto, axaaxoon ittoshi shuuneyaachemmoyichiye; tunetaa no daggoochee koniyoona axaaxoon bi shuunegaata, no keroyich shoobbecho Nihoo Yeeri aafooch beetone; biyoo cadiqe Yesuus Kiristoosine.

² Biyoo Yeeri no axaaxoon nooch bi maariibeeti deejjoone; no axaaxoon baach tuneyaanoon ashoo bullichi axaaxoon bi maariibeeti deejjoone.

³ Yeerichi getoon ceechaabeeto no tunegaata, ebina biin ariito no tunoon xiishii ariibeeto noone.

⁴ “Yeerin ariibeeto taane” iibee Yeerichi getoon ceechaani asho bi beegaata, koottitone; iberoo bi mullooch aalloone.

^5-6 Tunetaa Yeerichi getoon ceechiibeeto bullina, Yeerichi shuno ceeno tunetone. “Yeerina tookkii beeto taane” ii beeti asho, bulli mooyona Kiristoosin shaahibe. Ebina biinna no beemon xiishii ariibeeto noone.

⁷ Ta shunechinaꞌote! Ittoshich ta kooraa beeti mooyo, bulliyee aaf Yeeri tuniibote iꞌi ittoshich bi gettiti mooyonalli, batt hanaach tuniibote iꞌi bi gettiibeeti mooyon toonoone. Bulliyee aaf bi gettiti mooyo ittoshi waayeti qaaroone.

⁸ Tunebaani andire mooyon ittoshich kooraabeeto taane; ebi are mooyo Kiristoosi shuuneti mooyonaa ittoshi shuuneebeeti mooyona iberoo bi tuno bekketone. Bi bekkeebeetoo, manderoo beshee beetonaa ibere bekko harii bekkee bi beetonoyichiye.

⁹ “Bekkooch beeto taane” iibee bi manoon shixxiibeeto, and beddaahaa manderoochiye bi beeto.

¹⁰ Bi manoon shunniibeeto bekkoochiye bi beeto; bi waan tephi dichemmi mooyo beetaachemmone.

¹¹ Tunebaani bi manoon shixxiibeeto bi beeto manderoochiye; manderoona shaꞌee beetone; manderoo bi aafoon bi dookkitoyich amooch bi hammiibeeto gaata ariyaache.

¹² Ta shuni bushiisheenaꞌote! Ittoshich ta kooraabeeto, Yesuusi naboona ittoshi axaaxoo maareetoyichiye.

¹³ Niheenaꞌote! Ittoshich ta kooraabeeto, shiichoochee tiijjiꞌi beeton ittoshi ariitoyichiye. Gurimaasheenaꞌote! Ittoshich ta kooraabeeto, gondoochi nihoon kochii ittoshi wochitoyichiye. Ta shuni bushiisheenaꞌote! Ittoshich ta kooraabeeto, Nihoo Yeerin ittoshi ariitoyichiye.

¹⁴ Niheenaꞌote! Ittoshich ta kooraabeeto, shiichoochee tiijjiꞌi beeton ittoshi ariitoyichiye. Gurimaasheenaꞌote! Ittoshich ta kooraabeeto, kuppho ittoshi tunetoyich, Yeerichi qaaroo ittoshi mullooch manjiꞌi bi beetoyich, gondoochi nihoonoo kochii ittoshi wochitoyichiye.

Alemoon Shunni Qayo

^15-16 Illa alemoonaa alemooch beeto bullinon hiriggiyaahote. Alemooch beeti mooyo bulli, aroo ashi meeno qaatiibeeti mooyo, bi aafoona ciinniꞌi bi dakiibeeti mooyonaa geecoona bi yebeneebeeti mooyonane; eboshi bulli alemeexinaꞌoani Nihoo Yeer waanee waa beetinaꞌo tooneenaꞌone. Ebich koniyoona alemooch beeton bi shunigaata, Nihoo Yeerin shunaanoone.

¹⁷ Alemoonaa asho qaatiibeeti alemeexi mooyo bullina beshee beetinaꞌone; tunebaani Yeerichi daaggoon tuniibeeto, bulli yemeenoon manjiree beeyemmone.

Kiristoosina Koyechinaꞌo Waanee Qelloon Quyo

¹⁸ Ta shuni bushiisheenaꞌote! Hini yemeenee ciiroone; ebich “Kiristoosina koyecho woyemmone” getaa ittoshi waayetoommon, andolla meeti Kiristoosina koyechinaꞌo tiyitinaꞌone. Ebina yemeenee ciiro bi tunoon ariibeeto noone.

¹⁹ Boonoshiyoo no daggeexinaꞌo tuno boonoshi qajjitoyich, no daggoochee kechiyeete. No magechinaꞌo boonoshi tuneto gaata, noonna tookki manjiree beeyeshinaꞌone. Ebina boonoshi bulli no magechinaꞌo boonoshi tunee qayo arichemmoyich, no waanee bariꞌi kechitinaꞌone.

²⁰ Tunetaa ittoshi Yaafoo waanee huutoon deqqito ittoshine; ebich ittoshi bulli iberoon ariibeeto ittoshine.

²¹ Iberoon ittoshi arii beetonaa ibere mooyoochee amee koote mooyolla danee bi qayon ittoshi arii beetonoyichalli, “Iberoon ariyaachote” iyaꞌa ittoshich kooraano taane.

²² “Aroo Kiristoosi toonoone” iꞌi Yesuusin nookkee beetoyee damba koottiibeeto, konine? Nihoo Yeerinaa Yeerichi Bushoonon nookkeebeeto aroo Kiristoosina koyechone.

²³ Yeerichi Bushoon nookkeebeeto bullich Nihoo Yeeri aalloone; “Yesuusi Yeerichi Bushoone” iꞌi miixee beetoyich Nihoo Yeeri wotta beetone.

²⁴ Ebich shiichoochee tiijjiꞌi ittoshi waayeti qaaro ittoshi mullooch manjiree beebe. Shiichoochee tiijjiꞌi ittoshi waayeti qaaro ittoshi mullooch bi beegaata, ittoshi wotta Nihoo Yeerinaa Yeerichi Bushoona tookkii ittoshich beeti ikkittinoona beeyemmo ittoshine.

²⁵ Kiristoosi nooch bi gibenikkiti hini gibeno, bulli yemeenee kashoone.

²⁶ Ittoshin muriciiya qaawiibeeti asheenaꞌochon ittoshich koorito taane.

²⁷ Tunebaani Kiristoos waanee ittoshi deqqiti huuto ittoshina tookkii beetone. Biyoo bulli mooyon ittoshich bi dojjii beetoyich, bare asho ittoshich dojjoo qaawiyaache. Aroo ittoshich bi dojjiibeeto iberoonalli kootoon toonoone. Illa bi ittoshich dojjitoommon Kiristoosina tookkii ittoshich beeti ikkittinoona manjiree beebote.

Yeerichi Bushiisheenaꞌoyich Beeti Gibeno

²⁸ Andoo ta shuni bushiisheenaꞌote! Kiristoosin no beegiyooba no shataachemmoyich, bi waahooba bi aafooch no yeelleyaachemmoyich, biinna tookkii ittoshich beeti ikkittinoona manjiree beebote.

²⁹ Cadiqo bi tunoon ariibeeto ittoshine; ebich cadiqoon shuuneebeeto bulli bi waanee bi shiijjoon ariibote.