1 Yowannisi 1 - Kafa Linguistics Project

Kashee Qaaro

¹ Kashee Qaareechon shiichoochee tiijjiꞌi beeton, no waayeton, no aafoona no beeggeton, xiishaa no ciinnetonaa no kishoona yechaꞌa no beeggetonon ittoshich kooraabeeto noone.

² Hini kashoo xalla bi bekketaa no beeggeton ittoshich miixaabeeto noone; ebiyee aaf Nihoo Yeer waan beeto, noochoo bekketi hini bulli yemeenee kashoon ittoshich arichiibeeto noone.

³ Wotta noonna tookki ikkittino ittoshich bi beeyemmoyich, no beeggetonaa no waayetonon ittoshich gettaabeeto noone. No ikkittinoo Nihoo Yeerinaa bi Bushoo Yesuus Kiristoosina tookkiiniye.

⁴ Ebin no kooraabeeto, no emiroo ceeni emiroo bi tunemmoyichiye.

Bekkoona Shaꞌo

⁵ Bi waanee no waayeto, andoo ittoshich no arichiibeeti wocho “Yeeri bekkoone; manderoo cir bi waan aalloone” ii beetone.

⁶ Ebich “Biinna tookkii ikkittino nooch beetone” iibee manderoona no shaꞌegaata, koottaabeeto noone getone; iberoonoo shuuneyaano noone.

⁷ Tunebaani aroo bekkooch bi beemoommon bekkoona no shaꞌegaata, noonnaa noonna daggooch ikkittino beetone; wotta bi Bushoo Yesuus Kiristoosichi damoo axaaxoo bulliichee noon xallii beetone.

⁸ “Axaaxoo nooch aalloone” no getigaata, wochaa no qellooniye no dawushaa beeto; iberoo no mullooch aalloone.

⁹ Tunetaa no axaaxoon Yeerich no aannigaata, biyoo no axaaxoon maaroonaa no gondo bulliichee noon xalliyoonoyich, gibeneetonaa cadiqoonane.

¹⁰ “Axaaxoon shuuneyaano noone” no getigaata, biin kootiibeeto noone getone; bi qaaroo no mullooch aalloone.