1 Ximootiyoosi 6 - Kafa Linguistics Project

Guuninaꞌochon Icheti Ciico

¹ Yeerichi shigoonaa no dojjaabeeti bi qaaroona naakkeyaachemmoyich, guuchittinee qoqqaanooch beeti, kittinnoo tuneti guuninaꞌo bulla boonoshi dooninaꞌon “Bulli gommona oogoon dan beddiyeete” getiree gabibeete.

² Kittinneenaꞌo tuneti doonjechi guuninaꞌo, are dooninaꞌo boonoshich kittinnee maneenaꞌo boonoshi tunetoyich hoxaayeete; tunebaani boonoshi shuunoona gaacheebeeti boonoshi dooninaꞌo kittinneenaꞌonaa shuchetinaꞌona boonoshi tunetoyich, aafichoyee beshiiree maddebeete. And neech ta gettaabeeti mooyinaꞌon kaachi dojjibee ciice.

Koote Doyoonaa Ibere Gaannoona

³ No Doono Yesuus Kiristoosichi xalle qaaroonaa Yeerin oogiibeeti beemoyich tunemmi doyoonon shaahaani, bariti doyoon dojjiibeeti asho koniyoona bi beegaata,

⁴ geecoo biin nafiitone; amoonolla shalligaani tuushoone. Biiyechochoommon kittinnittinee doyoon qallayoyich taggoonaa hayoononiye bi qaatiibeeto. Ebi mooyinaꞌoochee qanaato, kaaro, naago, biinnaa biinna mateyoo,

⁵ kuxeyaani kaaree tiijjoo, eboshi kechemminaꞌone. Gaboon hakkaaneenaꞌo tuneꞌi dacheebee, “Yeerin oogiibeeti beemon beemo gaanniyemmone” ii gabiꞌi iberoon muccetinaꞌone.

⁶ Tunebaani asho “Taach beeto beddiye” bi getigaata, Yeerich diireeti kittinnee qocoona beemo biin ibere gaannechon tuniyemmone.

⁷ No shiijjehooba hini showooch amoonolla deebaano noone; ebiyoommon no qitiyooba wotta, amoonolla yeshiree hamaachemmo noone.

⁸ Ebich tahoonaa maayoona nooch beegaata, ebi nooch beddiye.

⁹ Tunebaani “Gaannechon tunebone” iꞌi gabii beetinaꞌo gondoochi nihoona dacheeree, bi shaachiti ollooch yeche dihemminaꞌone; yeche boonoshi dihemmi ollo, mulloon muccii beetonaa qaakkiibeeti meeti qaatoonane; ebi qaatoo keyo hakkeyaani aalloochiye bi shakkiyemmo.

¹⁰ Ebi gijjee shuno meeti gonde mooyon shuunooch bechemmone; ebiyoommon ikkikkeenaꞌo gijjoon qaatiibee, Kiristoosi toommooch mullee tooꞌiyoon qajjiꞌi shattii giiriiti ayinee daggooch boonoshi hajjee kishoona giyitinaꞌone.

Ximootiyoosich Phawuloosi Ciicciti Ciico

¹¹ Tunebaani haano Yeerichi ashoocho, ebi mooyo bulliichee wohe. Cadiqoon, Yeerin oogiibeeti beemon, Kiristoosi toommooch mullee tooꞌiyoona manjoon, maneenaꞌon shunon, haaꞌiyoon, shiimecho tunoonoo dabbiree yeshe.

¹² Kiristoosi toommooch mullee tooꞌiyoona koniyoona qiiccee dichaani kuppho tuneree, bulli yemeenee kashee wojjoon yeshe. Yeeri hini bulli yemeenee kashoon ne danemmoyich neen ceegaa, meeti miixeenaꞌo aafoochaa Kiristoosichon gaawichaꞌa miixeto neene.

¹³ Bulli mooyoyich kashoon immiibeeti Yeeri aafooch, Fantoosechi Phelaaxoosi aafoochaa iberoon miixeti Kiristoos Yesuusi aafooch,

¹⁴ “No Doono Yesuus Kiristoosi waammi wottoon kiinaalli, oonaalli beemona hini getteeti mooyinaꞌon ceechibe” iyaꞌa neech adereto taane.

¹⁵ Galleteya bede ikke mixxo tuneti Mawe Yeeri, taateenaꞌochi Taatoonaa dooninaꞌochi Doonona bi daaggiti aabooba are Doono Yesuus Kiristoosichi womon bekkiyemmone.

¹⁶ Bi ikkeeto baachiye qitaano; koniyoona shago hakkaani wacciibeeti bekkoochiye bi beeto; aafoona biin beeggito koniyoona aalloone; biin beego ashich hakkeyaache. Oogoonaa giidoona bulli yemeenoon biich tunebe. Ameena.

¹⁷ And hini yemeeneexi gaannechi kittinneenaꞌoyich ishichibe: “Qelloon yeepphaahote; bulli mooyon nooch ceechiꞌi bi imaa, ebina no emiremmoyich tuniibeeti Yeerin gibenebotalli, gibeneyaani gaannoon gibeniyaahote.

¹⁸ Gaawe shuunoon shuunebee, deꞌe shuunee gaannechon tunebote. Ittoshich beetoochee qoodoyich qannibote; kishoon maggiiree imbote.

¹⁹ Ebiyoommon ibere kashoon ittoshi yechemmoyich, woyemmi yemeenoochoo gaaweti dego ittoshich tunemmi gaannoon kicemmo ittoshine” getiree ciice.

²⁰ Ximootiyooso, Yeeri neech guudiiꞌi bi immiti mooyon quyebe. Yeerin oogiyaani moochaalli yibbaatoochee, kootoon ariyoo shaahiiꞌi wonaaxiyee yibbaatoochee wohe.

²¹ Ikkikkeenaꞌo “Ebi ariyoo nooch beetone” iibee, Kiristoosi toommooch mullee tooꞌiyoochee muriccitinaꞌone. Yeerichi wojjoo ittoshina tookki tunebe.