1 Ximootiyoosi 5 - Kafa Linguistics Project

Xuume Maacheenaꞌochon Icheti Ciico

¹ Geeneton ne nihoon tuniiree ciicalli noggeyaahine; gurimaashoon ne manoon tuniiree,

² geeneti maacheen ne indeen tuniiree, gurimaashe maacheen ne maneen tuniiree kiinaalli xallittinoona ciice.

³ Degaalli xuume maacheenaꞌon oogiibe.

⁴ Xuumee tuneti ureyich bushoo woyee bushaa bushiishoo beegaata, are bushiisheenaꞌo Yeerin boonoshi oogiyoon shiichiꞌi boonoshi kechi asheenaꞌoyich bekkiyoonaa boonoshi indeenaa nihoonoyich keree gaaconon doyibeete. Ebi Yeeri aafoochaa shucheti mooyone.

⁵ Degaalli xuumee tunaꞌa bi ikkeeti beeti maachechi gibeno Yeeri baachiye; ebich xumoonaa areddoonon Yeerin qolloonaa corootoona kupphaa beetine.

⁶ Tunebaani hini showee toommeexi emiroon qaawaabeeti xuumee kashoona beebee qititine.

⁷ Oonneyaanoon boonoshi beeyemmoyich, ebin boonoshich gete.

⁸ Tunebaani koniyoona bi xibeenaꞌon, ebiyee beshoon bi kechi asheenaꞌon degaano bi tunegaata, Kiristoosichi toommooch mullee tooꞌiyoon qajjiti, mulloon tooꞌiyaani ashoyee beshoon gonde uroone.

⁹ Xuumeenaꞌochi shigoon yechiibeeti mazgabooch bi shigoon kobereyemmi maachechi eeno shiche natoyee shappaaye; ebiyee wotta ikke kenoon baach shaaggeti tunebuye.

¹⁰ Gaaweti shuunoon shuunoona miixeeti tunebuye. Ebiyoo, bushiishoon gaawichiꞌi dichoo, iibbee iibbiyoo, kittinneenaꞌochi baatee machiyoo, iriteetinaꞌon degonaa gaaweti shuunoo bullin shuunoona miixeeti tunebuye.

¹¹ Tunebaani gurimaashe xuumeenaꞌon ebi xuumeenaꞌochi shigoon yechiibeeti mazgabooch kobereyaahine. Boonoshi ashittino qaatiyooba shaagon shunnemminaꞌone; ebich Yeerich boonoshi giyiti wogoon biishiree, Kiristoosichi hilloochee gubb wottemminaꞌone;

¹² shiichii boonoshi giyiti wogoon boonoshi biichitoyich, Yeerichi nalloo boonoshi toommooch kindemmone.

¹³ Ebichi toommooch gafee kelloon koyibee shuunee biishon doyemminaꞌone; shuunee biisho baach toonoone; tuneyaani mooyon yibbaatebee oonechinaꞌonaa ashi mooyooch giyechinaꞌona tunemminaꞌone.

¹⁴ Ebich kittinnee gurimaashe xuume maacheenaꞌo wochinnoon boonoshi shaagon, bushoonoo boonoshi shimon, boonoshi kexonoo gaawichiꞌi boonoshi yeshon, daaggiyoye; ebina noon shixxii beetinaꞌo naaggemmi kelloon muccemminaꞌone.

¹⁵ Ishichaa ta beeto, ebiyee aaf ikkikkeenaꞌo Sheexaanoon dabbiya Kiristoosichi hilloochee gubb boonoshi wottetoyichiye.

¹⁶ Kittinnee tuneti ikke ureyich xuumeenaꞌo tuneti maache xibeenaꞌo beegaata, ebi bi xibeenaꞌon degualli, are xuume bi xibeenaꞌo kittinnee guuphoyich shaago tunaayeete; ebina kittinnee guupho cir degaalli xuume maacheenaꞌon degon hakkemminaꞌone.

Yaabii Qeejjiibeeti Geeneenaꞌochon Icheti Ciico

¹⁷ Kittinnee guuphi asheenaꞌon gaawichiꞌi yaabii qeejjiibeeti geeneenaꞌon gutte kishoon oogiyoo bede mooyone; beshoonoo Yeerichi qaaroon getonaa dojjoona yullee beetinaꞌon oogiyoo qaawiihe.

¹⁸ Ebi mooyoyich Yaafe Macaafoochaa “Maayoon buchiibeeti gattoochi noonoon cuchaaye” getteetone; wotta “Shuunecho bi shuuneti shuunoyich shumaayoon dan beddiye” getteetone.

¹⁹ Gutte woyee keejje miixaalloon, geeneenaꞌo toommooch yaaqqemmi taggoon waayeyaahine.

²⁰ Bareenaꞌo wotta shattemmoyich, axaaxoon shuunetinaꞌon asho bulli aafoochaa kaare ciice.

²¹ “Hini ta getteti mooyinaꞌo daggoochee ikke mooyonona ikke badd dabiyaanoon, tachi nallibee quyebe” iyaꞌa Yeeri aafoochaa, Doono Kiristoos Yesuusinaa Yeeri kaacciti maraakeenaꞌonochi aafoochaanoo hini mooyon neech adereto taane.

²² Ne kishoon ashi toommooch kotiiree koninolla afaafinoona ukkiriyaahine. Bareenaꞌo shuuneebeeti axaaxooch giyiree guuphiyaahine; kiinaalli xallittinoona ne qelloon quyebe.

²³ Maacee biiyoonaa baribare biiyoona meeti aaboon neen bi biijjii beetoyich, atto neech bi tunemmoyich, giisheche woyinee uyoon uyalli, gubbich aacon baach uchaahine.

²⁴ Ikkikke asheenaꞌochi axaaxoo xallooch bekkee beetone; nalloo boonoshi toommooch kindemmo tunoon shiichiꞌi arichii beetone; tunebaani bareenaꞌochi axaaxoo bi aricheebeeto yagiꞌiniye.

²⁵ Ebiyoommon ikkikke asheenaꞌochi gaawe shuunoo wotta xallooch bekkee beetone; xallooch bekkeyaano bi tunetaanoona, aachaa echeyaachemmone.