1 Ximootiyoosi 4 - Kafa Linguistics Project

Koote Dojjechinaꞌo

¹ Yaafe Ayaano “Gubbi yemeenooch ikkikkeenaꞌo, ashoon muriciibeeti ayaaneenaꞌochi getoonaa yinneenaꞌochi doyoonon dabbibee, Kiristoosichi toommeexi mullee tooꞌiyoon qajjemminaꞌone” iꞌi xallayii gettitone.

² Ebiyoommi doyoo bi waa beeto, gaamiti xuuroona micciti ashittino dingiraatoommon, boonoshi mullo dingiraateti, maacaa xalloo shaahiibeeti kooteenaꞌo waaneeniye.

³ Eboshiyoo shaageyoon, wotta maayoochee ikkikkeenaꞌon mamon, bajjii beetinaꞌone; tunebaani boonoshi mulloon Kiristoosi toommooch tooꞌiiꞌi iberoon ariitinaꞌo Yeerin galleteechi boonoshi maayemmoyich, Yeeri are maayeenaꞌon hallitone.

^4-5 Yeeri hallito bulli gaawetone; Yeerichi qaaroonaa corootoona yaafeeto bi tunetoyich, Yeerin galleteechii ittoshi maagaata, duppeyemmi mooyo amolla aalloone.

Kiristoos Yesuusich Gaawe Maddechon Tuno

⁶ Hini neech ta getteti mooyinaꞌon kittinnee ne maneenaꞌoyich ne shalligichi gaata, Kiristoosi toommooch mulloon tooꞌiyee qaaroonaa and beddaahaa ne dabbaabeeti gaawe doyoona manjiree Kiristoos Yesuusichi gaawe maddechon tunemmo neene.

⁷ Wotta Yeerich oogoon imaani, gaacaalloonoo tuneti geene genneenaꞌochi tochoochee wohe; Yeerin oogiibeeti beemon beemoyich ne qelloon dojjibe.

⁸ Iiwittinoon danoyich ashittinoon kupphiyee dojjoo giisheche mooyoyich gaaccemmone; tunebaani Yeerich diireeti kittinnittinee qocoona beemoyich qellee dojjoo, and hini showee toommooch no beeti beemonaa gubbichoo shimaajji kexooch no beeyemmi beemonoyich gibenikkiibeeto bi tunetoyich, mooyo bullich gaaccemmone.

⁹ Ebi qaaro, asho bulli iberiiꞌi yech bede ibere mooyone.

¹⁰ Ebicha getona aajjaa maraataa beeto noone. Ebiyoo asho bullin, beshoonoo Kiristoosichi mishiraachee qaaroon iberii beetinaꞌo bullin, wodiibeeti beeyechi Nuggishoon no gibenaa beetoyichiye.

¹¹ Kittinneenaꞌoyich hini mooyinaꞌon dojjibee, ebi bullin tuniibote gete.

¹² Koniyoona ne bushittinoon hoxaaye; ne yibbaatoonaa ne qocoona, ashoon ne shunonaa Kiristoosi toommooch ne mullee tooꞌiyoona, ne xallittinoonoo, boonoshi mulloon Kiristoosi toommooch tooꞌii beetinaꞌoyich gaawe shaahiyoon tunebe.

¹³ Ne waan ta waammi wottoon, Yaafe Macaafoon ashich shemmoonaa ciicona, dojjoonoo kupphebe.

¹⁴ Yeeri gettiti mooyo keemmee beetaa, kittinnee guuphi geeneenaꞌo ne toommooch boonoshi kishoon kotiihooba, neech icheꞌi ne toommooch beeti Yeerichi wojjoona shuuneyaanoon qajjaahine.

¹⁵ Asho bulli ne dicon bi beeggemmoyich, ebi mooyinaꞌona kupphebe; ebi mooyinaꞌoyich ne qelloon hajjiibe.

¹⁶ Ne kittinnittinee qocoyich, ne dojjaabeeti doyoyichoo ne qelloon ariibe. Eboshi bullin tuniyoyich kupphebe. Ebin ne tuniigaata, neennaa ne waanee waayee beetinaꞌonon wodiyemmo neene.