1 Ximootiyoosi 3 - Kafa Linguistics Project

Kittinnee Guuphon Yaabii Qeejjiibeeti Geeneenaꞌo

¹ “Koniyoona kittinnee guuphon yaabii qeejjiibeeti geeno tunoon bi qaatigaata, gaaweti shuunoon qaatitone” ii beeti qaaro iberoone.

² Illa kittinnee guuphon yaabii qeejjiibeeti geeno tunemmi asho, gonde mooyona oonneyaano, ikke mechecho, dagg tato, bi qelloon quyecho, gaawe shuriyecho, iibboon iibbiibeeto, Yeerichi qaaroon dojjoon hakkito,

³ masheyaano, damoo gufeyaano, shiimecho, hayeyaano (nabeyaano), gijjoyich dakaano,

⁴ bi bushiishoo waanee ibbeyoonaa deꞌa getonon daneebeeto, bi kechi asheenaꞌonoo gaawichiꞌi qeejjiibeeti uro tunebe.

⁵ Asho bi kechi asheenaꞌon gaawichiꞌi qeejjoon bi mawiigaata, kittinnee guuphon aabichiree qeejjoon hakkehe?

⁶ Biyoo geeciree daabiloosi toommooch nalleetoommi nalloo bi toommooch bi nalleyaachemmoyich, kashaani kittinnoo tunaaye.

⁷ Wotta gonde mooyona oonneeree daabiloosi shaachiti ollooch bi yecheyaachemmoyich, Kiristoosi toommooch mulloon tooꞌiyaani asheenaꞌo waanaa gaawe mooyona naadeeto tunebe.

Daaquuneenaꞌo

⁸ Ebiyoommon wotta daaquuneenaꞌo asho bulli oogii beetinaꞌo, heciyoon shaddaaneenaꞌo, wodde woyinee uyoon wotaaneenaꞌo, gijjoyich dakaaneenaꞌo,

⁹ axaaxoon tiyaareebeeti xalle mullechinaꞌo, Kiristoosi toommooch ceeni mullee tooꞌiyoonaa Yeeri gaxxiti iberee ariyoona kupphetinaꞌo tunebeete.

¹⁰ Eboshiyoo wotta shiichiree xiishaa bekkebeete; ebichi hillooch oonneyaaneenaꞌo boonoshi tuno xiishee gaata, daaquuneenaꞌo tuneree Yeerich maddebeete.

¹¹ Ebiyoommon genneenaꞌo asho bulli oogii beetinaꞌo, oonaaneenaꞌo, dagg tate gaawe shuriyechinaꞌo, mooyo bullina gibeneetinaꞌo tunebeete.

¹² Daaquuneenaꞌo boonoshi ikkikkoona ikke mechechinaꞌo, boonoshi bushiisheenaꞌonaa kechi asheenaꞌonon gaawichiꞌi qeejjii beetinaꞌo tunebeete.

¹³ Yeerich gaawichii maddeebeeti daaquuneenaꞌo boonoshi qellich gaawe shigoonaa Kiristoos Yesuusi toommooch boonoshich beeti mullee tooꞌiyoona aafee kupphoon danemminaꞌone.

Yeeri Gaxxiti Maacee Mooyo

^14-15 Kaateree ne waan woya gibenaabeeto taane; tunebaani yagemmo ta tunegaata, asheenaꞌo Yeerichi kexooch aabichiree boonoshi beeyemmo gaata ne ariyemmoyich, hini mooyon neech kooraabeeto taane. Giimboonaa cangiyoona kexon tuuggiꞌi bi neechoommon, Yeerichi kechi asheenaꞌo iberee ariyoon tuuggiꞌi neechii beetinaꞌone; boonoshiyoo beeyechi Yeeri ceeggiti kittinnee guuphi asheenaꞌone.

¹⁶ Biich diireeti kittinnee qocoona beemichon Yeeri gaxxiti maacee mooyo worganikkiibeeti ooge mooyo bi tunoon koniyoona nookkeyaache; ebiyoo: Asho tuneꞌi bekketo, cadiqo bi tuno Yaafe Ayaanoona miixeeto, maraakeenaꞌoyich bekketo, aageteenaꞌo bulliich awaajjeeto, alemooch gibeneeto, oogee yiiroona shimaajj kechito, ii beetone.