1 Ximootiyoosi 2 - Kafa Linguistics Project

Kittinneenaꞌo Corootemmoyich Phawuloosi Boyo

^1-2 Illa bulliyee shiichiree, Yeerin oogiibee, yaafeeti keqqaalli beemon diggoona no beeyemmoyich, asho bullich, taateenaꞌoyich, iraasheenaꞌonaa ukkireenaꞌo bullinoyich Yeerin ittoshi qollemmonaa corootemmonoyich, ittoshi maaggemmonaa galletemmonoyich boyaabeeto taane.

^3-4 Ebiyoo asho bulli iberoon ariiree bi wodemmoyich shunniibeeti, noon Wodiyechi Yeeri aafoochaa gaawetonaa biin emirikkiibeeti mooyonane.

⁵ Ikke Yeeriyee damba bare nuggishoo aalloone; wotta Yeerinaa ashoonochi gutte daggooch beeti ikke shoobbechoyee damba bare shoobbecho aalloone; biyoo asho tuneti Kiristoos Yesuusine.

⁶ Asho bullin biisheree wodiiya bi kashoon deejjito biine. Ebiyoo tate yemeeno shagiyooba Yeerichi wodiyee shuunoon bekkiibeeti miixittinoone.

⁷ Ebi mooyo asho bullich bi getteyemmoyich, ceegee bechechonaa mishiraachechona, Aageteenaꞌoyichoo Kiristoos Yesuusi toommooch mullee tooꞌiyoonaa iberoonon xiishiibeeti dojjechoo ta tunemmoyich, Kiristoos Yesuusi taan kaaccii neechiye. Ebi ta gettaabeeto, iberoani kooto toonoone.

⁸ Illa doonjeenaꞌo bulli xaaꞌoochaa kaaroonaa hayoonon qayiichi, yaafeeti boonoshi kishoon damba tiijjiree boonoshi corootemmoyich daaggiyoye.

^9-10 “Genneenaꞌo wotta yeelliyaani tate tahoon tahebeete” iyaꞌa daaggiyoye. “Yeerich no qelloon diiriito noone” ii beeti genneenaꞌoyich tato bi tunetoommon gaawe shuunoon shuunoonalli, tatoyee besheti qellee shippoona woyee aachoonaa bare aaxxe mooyona woyee aaxxoo tuneti tahoona boonoshi ashittinee shashiyoon daaggaache.

¹¹ Genneenaꞌo boonoshi qelloon yeepphaayi cikkiree doyibeete;

¹² genneenaꞌo cikkiree beebeetani (udeetani) doonjeenaꞌon boonoshi dojjemmoyich woyee doonjeenaꞌo toommooch hakkoo boonoshich beeyemmoyich daaggaache.

¹³ Ebichi naboo, batti batt halleeto Addaami tunetoyichiye; aroochee Hewaani halleetine.

¹⁴ Wotta dacheeꞌa Yeerichi getoon shaaddeti, maachealli Addaami toonoone.

¹⁵ Tunebaani maachee bi mulloon Kiristoosi toommooch tooꞌiiꞌa, kittinneenaꞌon shunnaꞌa, dagg tate gaawe shuriyoona bi qelloon xallittinoona bi quyegaata, bushoon shimona wodemmine.