1 Ximootiyoosi 1 - Kafa Linguistics Project

Diggiyoo

¹ Noon Wodiyechi Yeerinaa no gibeno tuneti Kiristoos Yesuusina wocheeti, Kiristoos Yesuusichi mishiraachechi Phawuloosi waanee,

² Kiristoos Yesuusi toommooch mullee tooꞌiyoona ibere ta bushoo tuneti Ximootiyoosich: Nihoo Yeerinaa no Doono Kiristoos Yesuusina waanee wojjoo, ariqqoonaa diggoona neech tunebe.

Koote Dojjechinaꞌo Waanee Bi Qelloon Quyo

³ Makidoonee showooch ta hammehooba, neech adera ta itoommon, ikkikke asheenaꞌo koote doyoon boonoshi gamichaachemmoyich ne tuniyemmoyich are Efesoon kotebe.

⁴ Wotta tochee tochoonaa ciiraalli shiijjereenaꞌochi kiinoon haddoonooch boonoshi qelloon beshiiree boonoshi imaachemmoyich gete. Eboshiyoommi mooyinaꞌo hayoon tiijjeheetalli, gibenoona shuuneebeeti Yeerichi shuunoyich boonoshi gaaccemmi gaaco aalloone.

⁵ Ebin neech ta gettaabeeto, “Noonnaa noonna shunebone” getoyichiye. Ebi shuno bi danemmo xalle mulloonaa gaawe gaboona, Kiristoosi toommooch mulloon ibere tooꞌiyoonane.

⁶ Ikkikkeenaꞌo ebi mooyinaꞌon qajjiichii iberee gommoochee bara wotteꞌi duube hayooch giyitinaꞌone.

⁷ Boonoshiyoo Muusichi Sheeree dojjechinaꞌo tunoon shunniibee, boonoshi yibbaatee beeton woyee aafoon kuppheꞌi ashich boonoshi gettiibeeti mooyon shalligaaneenaꞌone.

⁸ Tunebaani asho tachii bi shuunegaata, Muusichi Sheeroo gaaweto bi tunoon ariihone.

^9-10 Yeeri hini sheeroon bi immito, sheeroon shaaddee beetinaꞌonaa hukkechinaꞌonoyich, Yeerin dabboochee wokkii beetinaꞌonaa axaaxechinaꞌonoyich, Yeerin oogiyaaneenaꞌonaa yaafe mooyon eeꞌii beetinaꞌonoyich, boonoshi indeenaa nihoonon wuxii beetinaꞌonaa ashi kashoon kichii beetinaꞌonoyich, shunimaayeenaꞌoyich, anaamona tookkii shuno maabeeti anaaminaꞌoyich, ashoon giidoona yechii kemmechinaꞌoyich, kooteenaꞌoyich, kootoon wogee beetinaꞌoyich, gaawe kittinnittinee doyoon shixxii beetinaꞌo bullichalli, cadiqeenaꞌoyich toonoone.

¹¹ Hini gaawe kittinnittinee doyoo bi daneebeeto, galleteya bede Yeeri taach aderoon bi immiti, oogee yiirechi mishiraachee qaaroocheeniye.

Bi Ariqqoyich Yeerin Galleto

¹² Biich ta maddemmoyich taan kaacciꞌi gibeneeto tunii taan hadditi, giidoon taach immiti no Doono Kiristoos Yesuusin galletehoye.

¹³ Ebiyee aaf, biin naaggeto, yookketonaa giishiitona ta tunetaanoona, ebin ta tuniito ariyaanoon, wotta bi toommooch mulloon tooꞌiyaanoon bi tunetoyich taan maariye.

¹⁴ No Doono Yeerichi wojjoo, Kiristoos Yesuusina noocho tuneti mullee tooꞌiyoonaa shunoona tookkii beshaa besho tuneꞌi taach ichehe.

¹⁵ “Axaaxechinaꞌon wodiyoyich Kiristoos Yesuusi hini alemooch waahe” ii beeti qaaro iberoone; asho bulliyoo iberiiꞌi yech bede mooyone. Axaaxechinaꞌo bulliyee beshe axaaxecho taane.

¹⁶ Tunebaani maaroon danehoye; maaroon ta daneto, Yesuus Kiristoosi ciyaani ooge bi haaꞌiyoon beshe axaaxechi taach bi bekkiyoo, boonoshi mulloon Kiristoosi toommooch tooꞌiiree bulli yemeenee kashoon danemminaꞌoyich shaahiyoo bi tunemmoyichiye.

¹⁷ Bulli yemeenee Taatoo, aalleyaano, bekkeyaano, bi ikkeeto baach tuneti Nuggishoyich galletoonaa oogee yiiroona bulli yemeenoon tunebe. Ameena.

¹⁸ Ta bushoo Ximootiyooso, ebiyee aaf neechon keemoona bi getteetoommon, hini wochoon neech adereto taane. Are keemoon shalligibee, kuppheree gaaweti koyoon koyebe.

¹⁹ Kiristoosi toommooch mullee tooꞌiyoonaa axaaxoon tiyaareebeeti xalle mulloonon manjiiree yeshe. Ikkikkeenaꞌo boonoshi mulloona “Axaaxoon tiyaareyaachone” iꞌi, markabo xaqqoona qicceꞌi aacona qoochee bi aalloommon, Yesuusichi toommeexi boonoshi mullee tooꞌiyoon aalliitinaꞌone.

²⁰ Hemanoosinaa Iskindiroosina eboshichi daggeexinaꞌone; Yeerichi shigoon naagoochee boonoshi cuuqqemmoyich, “Sheexaanoo boonoshin sheeribe” iyaꞌa biich beshii boonoshin immeto taane.