1 Tasaloonqi 5 - Kafa Linguistics Project

Doono Yesuusichi Wottee Womon Qanniꞌi Quyo

¹ Illa no maneenaꞌote! Ebi mooyo tunemmi yemeenoonaa aaboonochon ebine iꞌi ittoshich amoonolla kooroo qaawiyaache.

² Doonochi aabo bi woyemmo, gaayo xumoona bi womoommon tunoon manjiiꞌi ariibeeto ittoshine.

³ Asheenaꞌo “Diggoone, wodoone” boonoshi ii beetaa, yeqqefechi maacheen maaxoo mamoommon arooba aallo diqqoona boonoshi toommooch shaggemmone; ciroona muriccii wodoon hakkaachemminaꞌone.

⁴ Tunebaani no maneenaꞌote! Ebi are aabo gaayo xumoona womoommon diqq shagiree ittoshin bi keqqichaachemmoyich, ittoshi manderee asho toono ittoshine;

⁵ ittoshi bulli bekkee asho, areddee ashoo ittoshine; no, xumee asho woyee manderee asho toono noone.

⁶ Illa qaalliree no qelloon quyoona beebonalli, bareenaꞌochoommon tokketaayone.

⁷ Tokketee beetinaꞌo xumoonane boonoshi tokketeebeeto; mashee beetinaꞌoo xumoonane boonoshi masheebeeto.

⁸ Tunebaani areddee asho no tunetoyich, mullee tooꞌiyoonaa shunoonon getee ginee tahoochoommon gediree, “Yeeri noon wodiyemmone” imi gibenoon xuuree ukoochoommon ukeree no qelloon quyoona beebone.

⁹ Yeeri noon bi kaaccito, no Doono Yesuus Kiristoos waanaa wodoon no danemmoyichalli, bi kaaree shiixxoon no toommooch kindiyoyich toonoone.

¹⁰ Kashoona no beetaa woyee no qititaa, biinna tookki kashoona no beeyemmoyich Kiristoosi noocha iꞌi qitiye.

¹¹ Ebich and ittoshi wotta tunii beetoommon, ittoshinaa ittoshina ikkoo baroon goggiibe; ikkoo baroon eenniibe.

Ciireexi Ciicoonaa Diggiyoona

^12-13 No maneenaꞌote! Ittoshi daggooch beechii aajjii shuunee beetinaꞌon, Doono Yesuusichi gommona ittoshin yaabii beetinaꞌon, ittoshin kaaree ciiccii beetinaꞌonoo ittoshi ariyemmoyich, boonoshi shuuneebeeti shuunoo bullich shunoona beshaa beshiiree boonoshin ittoshi oogiyemmoyich ittoshin qollaabeeto noone. Ittoshinaa ittoshinoo diggoona beebote.

¹⁴ Wotta no maneenaꞌote! Ittoshin ciiccaabeeto noone; shuuna biisheenaꞌon kaare ciicote; aafi shateenaꞌon kupphiibote; kuppheyaaneenaꞌon gaachebote; asho bullin haaꞌiibote.

¹⁵ Ittoshi daggoochee koniyoona baroyich gondoochi qoodoon gondoona bi wochaachemmoyich bayote. Tunebaani bulli aaboon ittoshinaa ittoshina, wotta asho bullich gaaweton tuniyoyich qiiccebote.

¹⁶ Bulli aaboon emiribote;

¹⁷ kuxaanoonoo corootibote;

¹⁸ amee mooyolla ittoshi toommooch bi shaggitaa, Yeerin galletebote. Ebi Kiristoos Yesuusina ittoshich Yeerichi daaggoo bi tunetoyichiye.

¹⁹ Yaafe Ayaano shuunemmoyich gommon bajjaahote.

²⁰ Keemoon qallayiyaahote.

²¹ Bulli mooyon phire boshebote; gaaweto tuneton yeshote.

²² Gonde mooyo bulliichee wohote.

²³ Diggee Nuggishoo bi qelloona ittoshi hullimalloon yaafibe; ittoshi ayaano, ittoshi kashoonaa meenona no Doono Yesuus Kiristoosi wottee waahooba ikke bachaallo tune quyeeree beebe.

²⁴ Ittoshin ceeggiti Yeeri gibeneetone; biyoo ebin ittoshich ceechemmone.

²⁵ No maneenaꞌote! Nooch [wotta] corootibote.

²⁶ Kittinnee maneenaꞌo bullin yaafeeti gommona shumona ittoshinaa ittoshina ikkoo baroon diggiibe.

²⁷ Hini wochoon kittinnee maneenaꞌo bullich ittoshi shemmemmoyich, Doono Yesuusina ittoshin callaabeeto taane.

²⁸ No Doono Yesuus Kiristoosichi wojjoo ittoshina tookki tunebe.