1 Tasaloonqi 4 - Kafa Linguistics Project

Yeerin Emirikkiibeeti Qocoona Beemo

¹ Illa ciiroochaa no maneenaꞌote! Yeerin emirikkoyich gaawe qocoona ittoshi beemo ittoshi tuniiya bede mooyo bi tunoon ittoshich no dojjaa waayeto ittoshine; andoo ebiyoommi gaawe qocoona beeto ittoshine; tunebaani wotta ebiyee beshoon ittoshi tuniyemmoyich no Doono Yesuusina ittoshin qollaabeeto noone; ciiccaanoo beeto noone.

² Doono Yesuusina wocheeꞌa, “Ebin tuniibote” iyaꞌa ittoshich no getteti mooyon ariibeeto ittoshine.

³ Yeerichi daaggoo shunee mamo bulliichee wokkiꞌi yaafittinoona ittoshi beemone.

^4-5 Biin ariyaani Aageteenaꞌochoommon cakkii qaatoona tuneyaanoon, ittoshi bulli ittoshi qelli qelloona ittoshi ashittinoon yaafittinoonaa oogiyoona quyee yeshon ittoshi doyooniye;

⁶ wotta shiichaꞌa ittoshich manjii gettaa no shalligichitoommon, ebi mooyo bullin Doono Yeeri wochi gaaccemmo bi tunetoyich, koniyoona ebi mooyon shaaddaaye; biinoommi bi manoonoo xuqqaaye.

⁷ Yeeri noon bi ceeggito, yaafittinoona no beeyemmoyichalli, eeꞌe mooyon no shuunemmoyich toonoone.

⁸ Illa ebi no dojjiti mooyon shixxiibeeti asho, bi shixxiibeeto, ittoshich bi Yaafe Ayaanoon immiibeeti Yeerinalli, ashoon toonoone.

⁹ Ittoshinaa ittoshina shuneechon ittoshi qelloona Yeer waanee ariito ittoshine; ebich manaamanoochoommon ittoshi shunemmoyich koniyoona ittoshich koorii arichiyoo qaawiyaache.

¹⁰ Ebiyoommon Makidoonee showoo bulliich beeti kittinnee maneenaꞌon shunniibeeto ittoshine. Illa ta maneenaꞌote! Ittoshin no qollaabeeto, aafichoyee beshoon ebin ittoshi tuniyemmonaa

¹¹ diggoona beemon manjiiree ittoshi qaawemmonoyich, bare ashi mooyooch gimoochee ittoshi qelloon ittoshi quyemmonaa shiichaꞌa ittoshich no dojjitoommon ittoshi kishoona ittoshi shuunemmonoyichiye.

¹² Ebin ittoshi tuniigaata, Kiristoosi toommooch mulloon tooꞌiyaani asheenaꞌo aafooch naadeeto tunemmo ittoshine; ittoshichoo qaawiibeeti amee mooyoyichona bare ashoona degeyaachemmo ittoshine.

Doono Yesuusichi Wottee Womo

¹³ Andoo no maneenaꞌote! Gibenaalli bare asheenaꞌochoommon ittoshi ayinaachemmoyich, qititi asheenaꞌochon ittoshi ariyemmoyich shunnoye.

¹⁴ Yesuusi qitoonaa qitoochee bi timonon iberiito noone; ebiyoommon wotta boonoshi mulloon Kiristoosi toommooch tooꞌiichii qititinaꞌon Yeeri Yesuusina tookki bi waan daammemmo bi tunoon iberiibeeto noone.

¹⁵ And no gettaabeeti, Doono dojjiti mooyo ebine: Doono waammi wottoon batt kashoona beeti no, qititi asheenaꞌon shiichaachemmo noone.

¹⁶ Yeerichi getee qaaro, maraakeenaꞌochi ukkiroo qaaro, Yeerichi tiree qaaroo waayeyemmone; arooba Doono Yesuusi bi qelloona shimaayoochee kindemmone; Kiristoosina tuneechii qititinaꞌo shiichiree tiyemminaꞌone.

¹⁷ Aroyee gubb batt kashoona beeti no, yongee toommoochaa Doono Yesuusina danoyich, boonoshina tookki tiijjaa quboona hammemmo noone; ebiyoommon bulli aaboon Doono Yesuusina tookki beeyemmo noone.

¹⁸ Ebich ittoshinaa ittoshina ebi qaaroona ikkoo baroon goggii kupphiibe.