1 Tasaloonqi 3 - Kafa Linguistics Project

¹ Ebich haaꞌiyoo nooch hakkeyoo bi qajjitoyich, Ateeni katemooch no ikkeeto echaachaa,

^2-3 Kiristoosichi mishiraachee qaaroon gettiibee noonna tookkii Yeerich shuuneebeeti no manoo Ximootiyoosin ittoshi waan wochaa daachiito noone; ebi ittoshi toommooch shaggiti duꞌoona koniyoona Kiristoosi toommooch mullee tooꞌiyoochee bi shuuraachemmoyich ittoshin ciici bi goggiyemmoyichiye wochaa no daachiito. Ebi duꞌo no toommooch shago Yeerichi daaggoo bi tunoon ittoshiyoo ariibeeto ittoshine.

⁴ Duꞌo no toommooch shagga ii beeto bi tunoon ittoshina tookkaa beebee shiichaꞌa getteto noone; no gettetoommon wotta tunetone; ebinoo ittoshi ariibeeto ittoshine.

⁵ Ebich wotta haaꞌiyoo taach hakkeyoo bi qajjitoyich, “Daabiloosi diqqich ittoshin dawushi dichi beeyemmone; no aayo duubo tuno qayaache” iyaꞌa Kiristoosi toommooch ittoshich beeti mullee tooꞌiyoona am shaahoon ittoshi manjito gaata ariyoyich wochaa daachiito taane.

⁶ Tunebaani and Ximootiyoosi ittoshi waanee no waan wotteꞌi Kiristoosi toommooch ittoshich beeti mullee tooꞌiyee kupphoonaa ittoshinaa ittoshinoyich beeti shunoonon mishiraacha iꞌi gettitone. Bulli aaboon nooch gaawe gaboo ittoshich beemon, wotta ittoshin beegoyich no sharaataa beetoommon, ittoshiyoo wotta noon beegoyich sharaateebeeto ittoshi tunoon gettitone.

⁷ Ebich ta maneenaꞌote! Meeti iritoonaa xuuxoonochi toommooch no beetaanona, ittoshi naboona goggeto noone; no goggetoo, Kiristoosi toommooch ittoshich beeti mullee tooꞌiyee kupphoyichiye.

⁸ Doono Yesuusina manjiꞌi ittoshi neexegaata, andoo emiribee kashoona beeyemmo noone.

^9-10 Ittoshi aafoon beegoyich, Kiristoosi toommooch ittoshich beeti mullee tooꞌiyooch shappiti mooyo bi beegaata ceechoyich, xumoonaa areddoonon oogichaa corootaabee, ittoshi naboyich no Nuggishoo aafooch no daneti emiroo bullich Yeerich am shaahe galletooniye no giddiyemmo?

¹¹ No Nuggishoonaa no Nihoona tuneti Yeeri bi qelloona, no Doono Yesuusiyoo ittoshi waan no hammemmoyich no gommon nooch kaachibe.

¹² No wotta ittoshin no shunoommon, ittoshinaa ittoshina daggooch beeti shunoonaa bare asheenaꞌo bullich ittoshich beeti shunoonon Doono Yesuusi ittoshich daakkibe; woddiishoo gete.

¹³ No Doono Yesuusi bi yaafeenaꞌo bullina tookkii wottee bi waahooba, no Nuggishoonaa no Nihoonochi aafoochaa yaafeetonaa bachaalloonon tuneree ittoshi neexemmoyich ittoshi mulloon manjiibe.