1 Tasaloonqi 2 - Kafa Linguistics Project

Tasaloonqaa Phawuloosi Shuuneti Shuunoo

¹ No maneenaꞌote! Ittoshi waan no womo duubo tunee bi qayon ittoshi qelloona ittoshi ariibeeto ittoshine.

² Ittoshi waan no womoyee shiichaꞌa Filipphisiyoosaa wodde xuuxoon no beegonaa no naakkeyoonon ariibeeto ittoshine; kupphe qiicco no toommooch bi shaggitaanona, Yeeri immiti mishiraachoon ittoshich no gettemmoyich no Nuggishoo no waanee shaton bi wokkiitaa aafoon kuppheto noone.

³ No gettaabeeti wochoon ittoshi waayemmoyich ittoshin no qollaa beegaata, kootoona woyee gonde gaboona woyee dawushoona toonoone.

⁴ Tunebaani Yeeri mishiraachee qaaree getti shuunoon nooch guudii bi immemmoyich gibeneeto tunaꞌa no danetoyich, arooniye no gettaabeeto; no gettaa beegaata emirikkoyich no qaawaabeeto, no mulleexi gaboon maqqiꞌi ariibeeti Yeerinalli, ashoon toonoone.

⁵ Maree yibbaatoon no yibbaatee qayon woyee gijjoon hiriggoona no getti qayon arii beeto ittoshine; ebichoo Yeeri miixoone.

^6-7 Kiristoosichi mishiraachecho no tunetoyich, baribare mooyon ittoshi tuniyemmoyich echo nooch hakkee beetone; tunebaani ittoshi waanee tuneba bareenaꞌo waanee tuneba koni waaneenona oogoon qaawaano noone; indee bi hajjee bushoon bi shiimoommon, no wotta ittoshi daggooch no beehooba ittoshin shiimehone.

⁸ Ebiyoommon ittoshin oogichaa no shunnetoyich, Yeerichi mishiraachee qaaroon geto ikkeeto baach tuneyaanoon, no hajjee kashoonolla wotta ittoshich no qoodemmoyich mulloochee tiijjaꞌa daaggito noone; nooch oogichii shucheto tuneꞌi bekketo ittoshine.

⁹ No maneenaꞌote! No aayonaa no yulloona ittoshich batteyaanoone; ikke amee mooyonona ittoshi toommooch shaagoon tuneyaanoon, xumoonaa areddoonon shuunaabee Yeerichi mishiraachee qaaroon ittoshich gettehone.

¹⁰ Kittinnoo ittoshi daggooch am shaahe yaafittinoonaa cadiqittinoona, ikke bachaalli beemonoo no beemon ittoshinaa Yeerina miixoo ittoshine.

^11-12 Bi taatittinoonaa bi oogee yiiroonoochee ittoshi qoodeyemmoyich ittoshin ceeggiti Yeerin emirikkiibeeti beemona ittoshi beeyemmoyich, ittoshin ciiccaabee, kupphiibee, xalla gettaabee, nihoo bi bushiishoyich tunii beetoommon, ittoshi ikkikkoyich no tuniyoon ariibeeto ittoshine.

¹³ Wotta kuxaanoon Yeerin no galletaabeeti bare mooyo beete: No waanee ittoshi waayeti Yeerichi qaaroon ittoshi iberiihooba, ittoshi mulloon Yesuusi toommooch tooꞌiiti ittoshi waanaa shuuneebeeti ebi qaaroon ittoshi iberiito, Yeerichi qaaroommonalli ashi qaaroommon toonoone; iberoochaa Yeerichi qaaroone.

¹⁴ No maneenaꞌote! Kiristoos Yesuusicho tuneti, Yihudee showooch beeti Yeerichi kittinnee guuphi asheenaꞌo toommooch shaggitoommo ittoshi toommooch shaggitone; ebiyoo Ayihudeenaꞌo boonoshin xuuxiitaa xuuxoon boonoshi beegoommon, ittoshiyoo wotta ittoshi showee asheenaꞌo ittoshin xuuxiitaa, xuuxoon beeggito ittoshine.

¹⁵ Ebi are Ayihudeenaꞌo Doono Yesuusin, keemechinaꞌonoo wuxitinaꞌone; noonoo duꞌiitinaꞌone; Yeerinoo emirikkiton shuuneyaaneenaꞌone; wotta asho bullin shixxii beetinaꞌone.

¹⁶ Aageteenaꞌo waayeree wodemmi Yeerichi qaaroon no getaachemmoyich bajja qiicceheete. Ebin tuniyoona bulli aaboon boonoshi shuuneebeeti axaaxee toommooch wotta hinin daakkiyeete. And ciiroochaa Yeerichi kaaree shiixxoo boonoshi toommooch shaggitone.

Wochinnoon Boonoshin Beegga Phawuloosi Sharaato

¹⁷ Illa no maneenaꞌote! Mulloona baroo no qajjetaanona, meenona ittoshiyee giisheche aaboon no baritoyee gubb oogeti sharaatoona no beetoyich wochinnoon ittoshin aafoona ciinoyich woddoon qiicceto noone.

¹⁸ Ittoshi waan womoyich qaawito noone. Phawuloosi ta, ta qelloona womoyich gutte keejje wottoon qiicceto taane; tunebaani Sheexaanoo gommon hicciye.

¹⁹ No Doono Yesuus Kiristoosi wottee waahooba, bi aafoochaa no gibeno woyee no emiroo woyee no geecee naboo konine? Ittoshi toone?

²⁰ Iberoone, no geecee naboonaa no emiroona geto ittoshine.