1 Tasaloonqi 1 - Kafa Linguistics Project

Diggiyoo

¹ Phawuloosi, Sillaasinaa Ximootiyoosina waanee, Nihoo Yeerichonaa Doono Yesuus Kiristoosichona tuneti, Tasaloonqi kittinnee guuphoyich: Yeerichi wojjoonaa diggoona ittoshich tunebe.

Tasaloonqi Kittinneenaꞌochi Mullee Tooꞌiyoo

² No corootaa beegaata, kuxaanoon ittoshin gabaabee, ittoshi bullichi naboyich bulli aaboon Yeerin galletaabeeto noone.

³ Kiristoosi toommooch beeti ittoshi mullee tooꞌiyoon shuunee toommooch ittoshi heechiyoon, shunoochee tiyitona aajjii ittoshi shuunoon, no Doono Yesuus Kiristoosi gibenikkiti gibenoon haaꞌiyoona ittoshi quyonoo no Nuggishoonaa no Nihoona tuneti Yeeri aafooch shalligaabeeto noone.

⁴ Yeerina shucheti no maneenaꞌote! Biicho ittoshi tunemmoyich Yeeri ittoshin bi kaacon ariito noone.

⁵ Ittoshi waan no waahooba mishiraachee qaaroon ittoshich no getteto, xiishaꞌa no iberiyoon bekkiyoonaa Yaafe Ayaanee giidoona no shuunoonalli, noonoona baach toonoone. Ittoshina tookkaa no beehooba, ittoshich gabaabee aabichaꞌa no beeto gaata ariibeeto ittoshine.

⁶ Wotta wodde iritoo ittoshi toommooch bi shaggitaanona, Yaafe Ayaano ittoshich immiti emiroona mishiraachee qaaroon iberiiꞌi, noonnaa Doono Yesuus Kiristoosinochi qocoon dabbito ittoshine;

⁷ ebich Makidoonee showoonaa Akaayee showoonooch beeti kittinneenaꞌo bullich gaawe shaahiyoo tuneto ittoshine.

⁸ Doono Yesuusichi mishiraachee qaaro ittoshi waanee tiyiꞌi bi shaggito, Makidoonee showoonaa Akaayee showoonooch baach tuneyaanoon, Yeeri toommooch ittoshi mullee tooꞌiyoo bi waayeeto bulli xaaꞌooch beeti asheenaꞌoyichiye. Ebich ittoshichon no gettemmi bare mooyo amolla aalloone.

^9-10 Ittoshi waan no waahooba, aabichiꞌi noon ittoshi iibbiito gaata hini are asheenaꞌo bulli gettii beetinaꞌone; wotta beeyechonaa ibere Nuggishoonoyich ittoshi maddemmoyich, qitoochee bi tiijjiti bi Bushoo, aroo woyemmi kaaree shiixxoochee noon wodiyemmi Yesuusi, shimaayoochee bi womon ittoshi quyemmoyich, shahalloyich goyinnoochee Yeer waan aabichiꞌi ittoshi wotteto gaata gettii beetinaꞌone.