1 Taateenaꞌo 9 - Kafa Linguistics Project

Solomoonich Wochinnoon Doono Yeeri Bekko

¹ Solomooni Doono Yeerichi yaafee kexonaa bi taatee kexonon, bi qaawiti kexo bullinoo haggii bi ciichitoyee gubb,

² Doono Yeeri Gibeꞌoonaa Solomoonich bi bekketoommon, wochinnoon biich bekkehe.

³ Doono Yeeriyoo biich ishichiye: “Ta aafooch ne giddiiti corootoonaa qolloonon waayeto taane. Ta shigo arooch bulli yemeenoon bi beeyemmoyich ne shuuneti hini kexon yaafito taane. Ta mulloonaa ta aafoona bulli yemeenoon arooch tunemmone.

⁴ “Newoo, ne nihoo Daawitichoommon, ta getoon ne waayegaata, xalle mulloonaa kaamittinoona taach ne maddegaata, neech ta getteto bullin ceechaa ne tuniigaata, ta qociyoonaa ta doyoonon ne quyegaatoo,

⁵ ne nihoo Daawitich ‘Israꞌeelee taatee qeenooch kotemmi asho ne yaroochee mucceyaachemmone’ iyaꞌa ta gettetoommon, ne taatee qeenon Israꞌeeleenaꞌo toommooch bulli yemeenoon manjiyemmo taane.

⁶ “Tunebaani ittoshi woyee ittoshi bushiisheenaꞌo taan dabboochee wottegaata, ittoshich ta immeti ta getoonaa ta doyoonon quyo ittoshi qayigaata, hammiꞌi bare nuggisheenaꞌoyich ittoshi maddegaata, boonoshich ittoshi goyinnegaatoo,

⁷ Israꞌeeleenaꞌon boonoshich ta immeti showoochee aalliyemmo taane; ta shigo arooch bi beeyemmoyich ta yaafiti, hini yaafee kexon duppemmo taane; Israꞌeeleenaꞌo asho bulli daggooch cooqqiree tocheyemminaꞌone.

⁸ Hini yaafee kexo happeeree xaqqee gutoo tunemmone. Aroona beshee beetinaꞌo bulli worganemminaꞌone; cooqqiribee, ‘Doono Yeeri hini showoonaa hini yaafee kexonochi toommooch ebiyoommi mooyon bi tuniito, amoyich tunehe?’ gettemminaꞌone.

⁹ Boonoshiyoo wochiree, ‘Gibitsee boonoshi qaabbechinaꞌon kichiti boonoshi Nuggishoo Doono Yeerin qajjiichii, bare nuggisheenaꞌon boonoshi dabbitoyich, boonoshi goyinnee maddetoyich, Doono Yeeri ebi gonde mooyo bullin boonoshi toommooch deebiye’ gettemminaꞌone” iye.

Kiraami Shuuneti Deꞌe Mooyoyich Kaalloon Solomooni Gaaco

¹⁰ Solomooni gutte kexinaꞌon, ebi geto yaafee kexonaa bi taatee kexonon, haggii bi qanniiti hiye nati ciirooch,

¹¹ taatoo Solomooni Galiilee showooch beeti hiye katemeenaꞌon Xiroosee taatoo Kiraamich immiye. Ebin bi tuniito, yigee mixon, ciidee mixonaa aachoonon Xiroosee taatoo Kiraami Solomoonich bi qaawiti wottoon bi immitoyichiye.

¹² Kiraamiyoo Solomooni biich immiti katemeenaꞌon beegga Xiroosee tiyii hammiye; tunebaani hammii beeggiꞌi emiraanoone.

¹³ Biyoo “Ta manoocho, ebi amee katemooniye taach ne immeto?” iye. Eboshinoo Kaabulee Showoo iye. Hanaach beddaahaa, ebi shigoona ceekkee beetinaꞌone.

¹⁴ Kiraami taatoyich awudde hume kiilo giraam bede aachoon deejjitone.

Solomooni Shuuneti Bare Shuuneenaꞌo

¹⁵ Taatoo Solomooni Doono Yeerichi yaafee kexonaa bi taatee kexonon, Miiloo getteebeeti xaaꞌoon, Yerusaalemi xaqqee uxeroon, Hatsoori, Megidinaa Gezeerina getteebeeti katemoonoo shuunoyich, maddechinaꞌon kaaccitone.

¹⁶ Aroyee aaf Gibitsee taatoo Farooni damba kechii hammii, Gezeerin kochii yechiꞌi, qaaqqoona michitone; katemooch beeti Kanaanee asheenaꞌonoo wuxiꞌi, ebi katemoon Solomooni mechee tuneti bi busheyich magaayoo immitone.

¹⁷ Solomooniyoo Gezeerin wochinnoon shuunehe. Ebiyoommon wotta Deshi Beet Horoonin,

¹⁸ Baalaatinaa Yihudee barahooch beeti Tadimoorina getteebeeti katemeenaꞌon wochinnoon shuunehe.

¹⁹ Solomooni biich beeti, maayoonaa baribare mooyona kiceyemmi katemeenaꞌo bullin, gaari katemeenaꞌonaa hareshechinaꞌochi katemeenaꞌonon shuunehe; shuuno bi qaawito bullin Yerusaalem, Libanoosee showoonaa bi taatee showoo bullinooch shuunehe.

^20-21 Israꞌeeleenaꞌo tuneyaani asheenaꞌon, eboshiyoo Israꞌeeleenaꞌo boonoshin aalliyoon mawiiti, boonoshi showoochoo echeti, Amooreenaꞌochi, Hiteenaꞌochi, Ferizeenaꞌochi, Hiweenaꞌonaa Yebuseenaꞌonochi shiijjereenaꞌon Solomooni maddee maddechinaꞌo tuniihe; boonoshiyoo hanaach beddaahaa guuninaꞌone.

²² Tunebaani Solomooni Israꞌeeleenaꞌo daggoochee koninolla guuno tuniyaanoone. Boonoshiyoo bi ginee naayinaꞌo, bi ukkiriiti ukkireenaꞌo, bi ginee iraasheenaꞌo, wulleenaꞌo, bi gaarichi ukkireenaꞌonaa bi hareshechinaꞌonane.

²³ Wotta Solomooni haggiibeeti kexon shuuneebeeti shuunechinaꞌon ciinnii shuuniibeeti ukkireenaꞌo uuche ballaa aacheenaꞌone.

²⁴ Farooni bushee Daawiti Katemoochee, Solomooni biich shuuniiti taatee kexooch damba waahan. Ebiyee gubb, Solomooni Miiloo getteebeeti xaaꞌoon shuunehe.

²⁵ Solomooni natooch keejje wottoon micciibeeti deejjoonaa ikkittinee deejjoonon Doono Yeerich bi shuuneti deejjee gudooch deejjiye; Doono Yeeri aafoochoo ixaanoon shookkiye. Ebina yaafee kexon haggii qanniihe.

²⁶ Taatoo Solomooni Edoomee showooch Ceelle baharee gashooch, Elaati gaꞌooch beeti Etsiyoon Geberi katemoochaa markabeenaꞌon shuunehe.

²⁷ Kiraamiyoo ebi markabeenaꞌona Solomoonichi asheenaꞌona tookkii baharee yawechinaꞌo tuneti, bi asheenaꞌon daachiihe.

²⁸ Boonoshiyoo Ofiiree showooch hammiꞌi, aroochee aaraa awudde hume kiilo giraam bede aachoon taatoo Solomoonich deebiyeete.