1 Taateenaꞌo 8 - Kafa Linguistics Project

Yaafee Kexooch Taabooto Gimo

¹ Aroochee taatoo Solomooni Doono Yeerichi wogee taabootoon Daawiti Katemoo Tsiyoonee boonoshi deebemmoyich, Israꞌeelee geeneenaꞌon, yoodee ukkireenaꞌo bullinaa Israꞌeelee asheenaꞌochi yaree ukkireenaꞌonon bi beeti Yerusaalem ceeggiye.

² Ebina Israꞌeeleenaꞌo bulli Etaniimi getteebeeti shabaattinnee agenooch baareebeeti baarooba taatoo Solomoon waan kiceeheete.

³ Israꞌeelee geeneenaꞌo bulli waammona, qeesheenaꞌo taabootoon tiijjiyeete.

⁴ Doono Yeerichi taabootoon, danee duukkaanoon, danee duukkaanee daggooch beeti yaafeeti qiico bullinoo deebiyeete. Ebi qiiceenaꞌon deebitinaꞌo qeesheenaꞌonaa Leweenaꞌonane.

⁵ Taatoo Solomooninaa biinna tookkii kiceeti Israꞌeelee iitoo bullina taabootee aafooch tuneechii, boonoshi meetoochee tiyitona, haddaa ciyaani bageenaꞌonaa wurinaꞌonon deejjiyeete.

⁶ Qeesheenaꞌo Doono Yeerichi wogee taabootoon yaafee kexooch beeti bi xaaꞌooch, Yaafe Xaaꞌeexi Yaafooch giijjiꞌi, kiruubeenaꞌochi qoshee dechiich kotiiheete.

⁷ Kiruubeenaꞌoo taabootee toommooch boonoshi qoshoon yaggiꞌi, taabootoonaa bi yareenaꞌonon qerii beeheete.

⁸ Ebi yareenaꞌo genjeenaꞌo boonoshi tunetoyich, Yaafe Xaaꞌeexi Yaafoyee aaf beeti, Yaafe Xaaꞌoochaa bekkee beeheete; tunebaani yaafee kexoyee maachaa bekkeyaaneenaꞌone. Ebi yareenaꞌo hanaach beddaaha arooch beetinaꞌone.

⁹ Israꞌeeleenaꞌo Gibitsee boonoshi keyiyooba, Doono Yeeriyoo boonoshina tookkii wogoon bi giyiyooba, Kooreebi guudoochaa Muusi kotiiti gutte yalle xaqqeenaꞌoyee besh taabootee maacooch amolla aalloone.

¹⁰ Qeesheenaꞌo yaafee kexoochee boonoshi kechaahaa, qubo Doono Yeerichi yaafee kexooch ceenniye.

¹¹ Doono Yeerichi oogo yaafee kexooch bi ceennitoyich, qeesheenaꞌo qubee naboona, neexeꞌi maddoon hakkaaneenaꞌone.

¹² Aroochee Solomooni ishichiye: “Doono Yeero, dunne manderooch beeyemmo ne tunoon getteto neene.

¹³ Tawoo bulli yemeenoon ne beeyemmi, worganikkiti yaafee kexon neech haggeto taane” iye.

Solomooni Asheenaꞌoyich Gettiti Qaaro

¹⁴ Israꞌeelee iitoo bulli neexeꞌi beetaa, taatoo boonoshi waan wotteechii, boonoshi bullin diiriye.

^15-16 Ishichiinoo iye: “Israꞌeelee Nuggishoo Doono Yeeri galleteebe! Biyoo ‘Ta asheenaꞌo tuneti Israꞌeeleenaꞌon Gibitsee kichaa ta deebeti aaboochee tiijjaꞌa, ta shigo arooch beeyemmi yaafee kexo hakkemmoyich, Israꞌeelee yoodo bulli daggoochee katemoo aabinona kaacaano taane; tunebaani ta asheenaꞌo tuneti Israꞌeeleenaꞌo toommooch ukkiroo bi tunemmoyich, Daawitin kaacceto taane’ iꞌi, ta nihoo Daawitich bi gibenikkiti gibenoon ceechitone.

¹⁷ “Ta nihoo Daawiti Israꞌeelee Nuggishoo Doono Yeerichi shigoyich kexon hagoyich bi mulloona gabiye.

¹⁸ Doono Yeeriyoo ta nihoo Daawitich ishichiye: ‘Ta shigoyich kexon hagga ne mulloona gabito neene; ebin ne gaboo gaawe mooyone.

¹⁹ Tunebaani ta shigoyich kexon haggemmo, ne gutenoochee kechemmi ne bushoani, ne toono neene’ itone.

²⁰ “Andoo Doono Yeeri bi gibenikkiti gibenoon ceechitone. Doono Yeeri bi gibenikkitoommon, ta nihoo Daawitichi xaaꞌooch kereeto taane; Israꞌeelee taatee qeenooch koteto taane; Israꞌeelee Nuggishoo Doono Yeerichi shigoyichoo kexon haggeto taane.

²¹ Doono Yeeri no qaabbechinaꞌon Gibitsee bi kichiyooba, boonoshina tookkii bi giyiti wogo kooreeti xaqqoo arooch beeti taabootoyich, are kexooch xaaꞌoon qanniito taane” iye.

Solomooni Corootiti Corooto

²² Israꞌeelee iitoo bulli ciinnii beetaa, Solomooni Doono Yeerichi deejjee gudee aafooch neexehe; bi kishoon shimaayooch yaggiichii,

²³ ishichiye: “Israꞌeelee Nuggishoo Doono Yeero, damba shimaayooch tuneba desh showooch neenoommi Nuggishoo aalloone. Boonoshi ceeni mulloona neen dabbiibeeti ne guuninaꞌoyich ne giyeti wogoon ceechaabeeti, shoodechi Nuggishoo neene.

²⁴ Ne guuno tuneti, ta nihoo Daawitich ne gibenikkiti gibenoon quyeto neene; ne gibenikkiti gibeno bullin hanaach ceechito neene.

²⁵ “Andoo Israꞌeelee Nuggishoo Doono Yeero, ne guuno tuneti, ta nihoo Daawitich ‘Ta getoon ne waayoommon, ne bushiisheenaꞌo baach ta getoon waayebeetani, ta aafooch, Israꞌeelee taatee qeenooch kotemmi asho ne shiijjeroochee mucceyaachemmone’ iyaꞌa ne gibenikkiti gibenoon ceechibe.

²⁶ Israꞌeelee Nuggishoo Yeero, ne guuno ta nihoo Daawitich ne gibenikkiti gibenoon ne ceechemmoyich neen qollehoye.

²⁷ “Tunebaani Yeero, iberoon hini showee toommooch beeyenne? Ebiyoche, shimaayoo, shimaayoyee dambee shimaayolla, neen yeshon hakkaache. Ishigaata, ta haggeti hini kexo am beddehe?

²⁸ Ta Nuggishoo Doono Yeero, ne guuno ta corootaabeeti corootoon, ta qolloonoo waayebe; hanaach ne guuno ne aafooch ta giddiyaabeeti qolloonaa cookoonon ellebe.

²⁹ ‘Arooch ta shigo beeyemmone’ ne iti, hini kexon xumoonaa areddoonon manjii ciine; ne guuno ta hini xaaꞌoochaa ta corootaabeeti corootoon elle waayebe.

³⁰ Ne guuno taannaa ne asheenaꞌo tuneti Israꞌeeleenaꞌona, hini xaaꞌoo waan wottaachaa, no corootaabeeti corootoon waayebe; ne beeyi xaaꞌoo tuneti shimaayoochaa waayeree noon maaribe.

³¹ “Ikke asho, ashoon xuqqitone getaa taggeeꞌi, wogo biich qaawiitaa, waaꞌi hini yaafee kexeexi deejjee gudee aafoochaa bi wogegaata,

³² ebin shimaayoochaa waayeree nallibe; ne guuninaꞌo daggooch nallecho tunebe; bi shuunoon biich shuuneree xuqqito toommooch nallibe; xalloonoo wodiibe; bi xallittinoommonoo biich qoce.

³³ “Ne asheenaꞌo tuneti Israꞌeeleenaꞌo axaaxoon shuuneꞌi neen boonoshi xuqqitoyich, boonoshi etteenaꞌo boonoshin kochii wochaa, ne waan wotteꞌi, ne shigoon boonoshi ceegigaata, hini yaafee kexooch waaꞌi, ne waan boonoshi corootigaata, neen boonoshi qollegaatoo,

³⁴ shimaayooch beechi waayebe; ne asheenaꞌo tuneti Israꞌeeleenaꞌochi axaaxoon maaribe; boonoshi qaabbechinaꞌoyich ne immeti showooch wochiree, boonoshin giijjibe.

³⁵ “Ne asheenaꞌo axaaxoon shuuneꞌi neen boonoshi xuqqitoyich, shimaayoon hiccaꞌa amiyo dihaachemmoyich ne tuniitaa, hini xaaꞌoo waan wotteechii boonoshi corootigaata, ne shigoon boonoshi ceegigaata, boonoshin ne xuuxiitoyich boonoshi xuꞌoochee boonoshi wottegaatoo

³⁶ shimaayoochaa waayebe; ne guuninaꞌochi axaaxoon, ne asheenaꞌo tuneti Israꞌeeleenaꞌochi axaaxoon maaribe; boonoshi hammemmi kaame ne gommon boonoshich dojjibe; boonoshi iristo tuniyaꞌa ne asheenaꞌoyich ne immeti showooch amiyon dichibe.

³⁷ “Showee toommooch shaacoo woyee qeqqichiibeeti biiyo giyaa, woyee wooqoo, woyee cindoo, woyee gechoo, woyee hipperoo maayoon aalliitaa, woyee boonoshi katemoo aabiichaanona etto boonoshin giichii yeshaa, woyee naxo woyee biiyo amolla boonoshi toommooch waataa,

³⁸ ne asheenaꞌo tuneti Israꞌeeleenaꞌo bulliichee asho koniyoona bi toommooch shaggiti mooyona xuuxeꞌi, bi kishoon hini yaafee kexo waan yaggiꞌi corootii bi qollegaata,

³⁹ ne beeyi xaaꞌoo tuneti shimaayoochaa waayebe; maarishoo gete. Asho bullichi mulloon ariyaabeeto ne baach ne tunetoyich, bi mulloon ne ariibeeti asho bullich bi shuuni shuunoommon qoce.

⁴⁰ Ebiyoo no qaabbechinaꞌoyich ne immeti showooch kashoona boonoshi beemmi aabo bulliich, neen boonoshi shattemmoyichiye.

⁴¹ “Wotta Israꞌeelo tuneyaani ashi showee asho ne mooyon waayeꞌi, wohi showoochee bi waagaata,

⁴² wohi showoochee bi waato, ooge ne shigoon, kupphe ne kishoonaa giidechi ne mochoona ne tuniiti mooyon waayeꞌi bi tunetoyich, waaꞌi, hini kexo waan bi aafoon wochiichii, bi corootigaata,

⁴³ ne beeyi xaaꞌoo tuneti shimaayoochaa waayebe; neen bi qolleto bullin biich tuniibe. Ebiyoo showee toommeexi asheenaꞌo bulli ne shigoon ariiree, ne asheenaꞌo tuneti Israꞌeeleenaꞌo neech boonoshi shatoommon, neech boonoshi shattemmonaa ta haggeti hini kexooch ne shigo beemon boonoshi ariyemmonoyichiye.

⁴⁴ “Ne asheenaꞌo boonoshi etteenaꞌon kochemmoyich ne daachiitaa, gino aabiichona hammiichii, ne kaacceti katemoonaa neech ta haggeti kexona waan wotteechii Doono Yeeri ne waan boonoshi corootigaata,

⁴⁵ boonoshi corootoonaa boonoshi qolloonon shimaayoochaa waayebe; boonoshi gommonoo kaachibe.

⁴⁶ “Axaaxoon shuuneyaani asho aallo bi tunetoyich, ne asheenaꞌo axaaxoon shuunoona neen boonoshi xuꞌaa, newoo boonoshin kaaraꞌa etteenaꞌoyich beshiyaa ne imaa, boonoshiyoo wohi woyee katini showooch keccii daamaa,

⁴⁷ kecceꞌi boonoshi beeti showooch beechii, ‘Axaaxoon shuuneto noone; xuqqeto noone; gondeto noone’ iibee boonoshi axaaxoon aannii, gondoochee wotteꞌi, neen boonoshi qollegaata,

⁴⁸ boonoshin keccii daammiti etteenaꞌo showooch beechii, ceeni boonoshi mulloonaa ceeni boonoshi gaboona ne waan boonoshi wottegaata, boonoshi qaabbechinaꞌoyich ne immeti boonoshi showoo waan, ne kaacceti katemoo waan, neech ta haggeti kexo waan wotteechii boonoshi corootigaata,

⁴⁹ boonoshi corootoonaa boonoshi qolloonon ne beeyi xaaꞌoo tuneti shimaayoochaa waayebe; boonoshi gommonoo kaachibe.

⁵⁰ Ne toommooch boonoshi shuuneti axaaxoyich, neen boonoshi xuqqiti xuꞌoyichoo ne asheenaꞌon maaribe; boonoshin keccitinaꞌo boonoshich ariqqemmoyich tuniibe.

⁵¹ Xuuroon wociibeeti qaaqqee sheelloommi Gibitsee ne kichiti ne hajjee asheenaꞌone.

⁵² “Andoo ne guuno taannaa ne asheenaꞌo tuneti Israꞌeeleenaꞌona qollaabeeti qollo waan ne aafoon wochibe; ne waan boonoshi cookimmi aabo bulliich boonoshi cookoon waayebe.

⁵³ Nuggishoo Doono Yeero, no qaabbechinaꞌon Gibitsee ne kichiyooba, ne guuno Muusina ne gettetoommon, ne hajjee asheenaꞌo boonoshi tunemmoyich, showee toommeexi aagetoo bulliyee boonoshin bariito neene” iye.

Solomoonichi Corootee Taco

⁵⁴ Solomooni ebi bulli corootoonaa qolloonon Doono Yeerich giddii bi ciichitoyee gubb, bi kishoon shimaayooch yaggiꞌi bi guteneti, Doono Yeerichi deejjee gudee aafoochee tiyiye.

⁵⁵ Aroochee neexeechii, Israꞌeelee iitoo bullin ooge qaaroona ishichiꞌi diiriye:

⁵⁶ “Bi gibenikkiti gibenoommon bi asheenaꞌo tuneti Israꞌeeleenaꞌon kashiiti Doono Yeeri galleteebe. Bi guuno Muusina bi gibenikkiti gaawe gibeno bulliichee ikke qaaroonona shappayaanoone.

⁵⁷ No Nuggishoo Doono Yeeri no qaabbechinaꞌona tookkii bi tunoommon, noonna tookki tunebe. Noon qajjaaye; noon duppaaye.

⁵⁸ Bi gommo bullina no hammemmoyich, no qaabbechinaꞌoyich bi gettiti getoon, qociyoonaa doyoonon no quyemmoyich, no mulloon bi waan wochibe.

⁵⁹ Bi guuno taannaa bi asheenaꞌo tuneti Israꞌeeleenaꞌonon qemi qemona qaawiibeeti mooyo bullina bi gaachemmoyich, hini Doono Yeer waan ta giddiiti ta qollo xumoonaa areddoonon Doono Yeeri aafoochaa gabeebe.

⁶⁰ Ebiyoo showee toommeexi aagetoo bulli Doono Yeeri baach Nuggishoo bi tunoonaa biyee damba bare nuggishoo aallo bi tunoonon bi ariyemmoyichiye.

⁶¹ Hanaachichoommon bi qociyoona ittoshi hammemmonaa bi getoon ittoshi quyemmonoyich, ceeni ittoshi mulloona no Nuggishoo Doono Yeerich gibeneeto tunebote” iye.

Yaafee Kexo Diireyoo

⁶² Aroochee taatoo Solomooninaa biinna tookkii beeti Israꞌeelee asho bullina Doono Yeeri aafooch deejjoon deejjiyeete.

⁶³ Solomooniyoo ikkittinee deejjoyich hiyaa gutte hume wuronaa balli hiye hume bagoonon Doono Yeerich deejjiye. Ebiyoommon taatoonaa Israꞌeeleenaꞌo bullina Doono Yeerichi yaafee kexon yaafiyeete.

⁶⁴ Arooba taatoo, Doono Yeerichi yaafee kechi ciinooch beeti, addibaabee daggeexi xaaꞌoon yaafiye. Aroochaa micciibeeti deejjoon, maayi buuroonaa ikkittinee deejjee awuyonon giddiihe. Ebin bi tuniitoo, Doono Yeerichi yaafee kechi aafooch beeti gooshee deejjee gudo bi giishee naboona, micciibeeti deejjoon, maayi buuroonaa ikkittinee deejjee awuyonon yeshon hakkoo bi qajjitoyichiye.

⁶⁵ Arooba Solomooni biinna tookkii beeti Israꞌeeleenaꞌo bullina tookkii, ebiyoo Hamaati katemooch beshe kaattoochee tiijjii Gibitsee aacooch beddaahaa beeti showoochee kiceeti ooge iitoona tookkii, no Nuggishoo Doono Yeeri aafooch shabaatte qemi baaroon baariye.

⁶⁶ Shimittinnee qemooba, asheenaꞌon wochii daachiihe. Boonoshiyoo taatoon diiriyeete. Doono Yeeriyoo bi guuno Daawitinaa bi asheenaꞌo tuneti Israꞌeeleenaꞌonoyich bi tuniiti gaawe mooyo bullich, oogichii emiriibee boonoshi kexi kexooch wotteheete.