1 Taateenaꞌo 6 - Kafa Linguistics Project

Solomooni Yaafee Kexon Shuuno

¹ Israꞌeeleenaꞌo Gibitsee boonoshi kechiti awudde ballaa shinne natooba, ebiyoo Israꞌeeleenaꞌo toommooch bi taateti awuddinnee natooba, Ziibi getteebeeti guttinnee agenooch, Solomooni Doono Yeerichi yaafee kexon wonniye.

² Taatoo Solomooni Doono Yeerich shuuneti yaafee kexo, bi gidoo shiche hiroo, bi maaco hiye hiroo, bi neexo shaashe hiroone.

³ Are kechi kelli waan beeti gaaddaafee gidoo kechi maacoona tate hiye hiroone; ebiyoo kexoyee maach aashire hiroone.

⁴ Kexoyichoo maachaa xebboo maacaa gamino tuneti mallee kello beetone.

⁵ Yaafee kechi guudoona, ebiyoo Yaafe Xaaꞌoonaa Yaafe Xaaꞌeexi Yaafoonochi duuhi guudoona, bare yeshe gishiishi kexinaꞌon shuunehe.

⁶ Ebi kechi dechi kexinaꞌochi maaco uuchi uuche hiroo, daggeexi kexinaꞌochi maaco shiritti shiritte hiroo, toommeexi kexinaꞌochi maaco shabaatti shabaatte hiroone. Maammeenaꞌo yaafee kechi daabbee maac boonoshi giyaachemmoyich, yaafee kechi daabboyee maachi daabboona tookkii yesheti tuugeenaꞌon shuunehe.

⁷ Yaafee kexo shuuneeto, iiyaa bi kechiti xaaꞌoochaa qanniti xaqqoona bi tunetoyich, bi shuunee beehooba, modooshee, qofichi, woyee bare xuuree qaaro yaafee kexoochee ciroona waayeyaanoone.

⁸ Dechi kechi kello beeto, yaafee kexoochaa deshi-waaniye. Aroochoo kechi toommeexi, daggi kexonaa bi toommeexi keejjinnee kexonooch kichiibeeti daqqello beetone.

⁹ Kexonoo ebiyoommon shuunee ciichiye. Kexoochoo yigee mixona maammoon maammehe; yigee shaaqqoonoo qeriye.

¹⁰ Yaafee kechi maachaa tuggiiꞌi, boonoshi neexo uuchi uuche hiroo tuneti kexon shuunehe; eboshinoo yaafee kexona tookkii yigee michi maammoona yeshiihe.

¹¹ Doono Yeeri Solomoonich ishichiye:

¹² “Ta qociyoona ne hamigaata, ta doyoyich deꞌa ne getigaata, ta geto bullin ne quyegaata, ne tuniigaatoo, ebi ne shuunaabeeti kexichon ne nihoo Daawitich ta gibenikkiti gibenoon neenna ceechemmo taane.

¹³ Israꞌeeleenaꞌo daggooch beeyemmo taane; ta asheenaꞌo tuneti Israꞌeeleenaꞌon dufaachemmo taane” iye.

¹⁴ Solomooniyoo yaafee kexon haggii qanniihe.

Yaafee Kechi Maaci Shuunoo

¹⁵ Yaafee kechi daabboon maac waanaa, yigee shaaqqoona tajjiye; kechi godoochee tiijjii, damba maammeenaꞌooch beddaahaa, shaaqqoona qeriye; wotta maaci godoochoo ciidee mixon tajjiye.

¹⁶ Yaafe Xaaꞌeexi Yaafoo tuneti maaci gatoon yaafee kechi daggooch gubb waanaa shuunehe; bi gidoo hiye hiroone; godoochee tiijjii maammeenaꞌooch beddaahaa, yigee shaaqqoona qoodii kuxxiꞌi shuunehe.

¹⁷ Yaafe Xaaꞌeexi Yaafee ciinooch beeti yaafee kechi gidoo aabbe hiroone.

¹⁸ Yaafee kechi maaco botoonaa aapphiti mocee bungoonochi shaahiyoona shacheeti yigee shaaqqoona tajjeetone. Bulliyona yigee shaaqqoani, xaqqo bekkeyaanoone.

¹⁹ Arooch Doono Yeerichi wogee taabootoon kotiyoyich, yaafee kechi maac, gubb waanaa Yaafe Xaaꞌeexi Yaafoon shuunehe.

²⁰ Ebi Yaafe Xaaꞌeexi Yaafee gidoo hiye hiroo, bi maaco hiye hiroo, bi neexo hiye hiroone; ebinoo xalle aachoona dikkehe; wotta yigee mixoochee shuuneeti deejjee gudoon aachoona dikkehe.

²¹ Solomooniyoo yaafee kechi maacoon xalle aachoona dikkehe; aachoona dikkeeti Yaafe Xaaꞌeexi Yaafee ciinoochoo aachee sansalatoon geddiye.

²² Yaafee kechi maaco bullin aachoona dikkehe; maaci Yaafe Xaaꞌeexi Yaafee ciinooch beeti deejjee gudee achoo bullinoo aachoona dikkehe.

²³ Yaafe Xaaꞌeexi Yaafee daggooch, bi ikkikkoona aashiri aashire hiroo tuneti gutte kiruubeenaꞌon zayitee mixoochee shuunehe.

²⁴ Kiruubee ikke qoshoo uuche hiroo, baroo wotta uuche hiroone; ikkoochi cilloochee baroochi cillooch beddaahaa, aashire hiroone.

²⁵ Guttinnee kiruubee gutte qoshoo wotta aashire hiroone; gutte kiruubeenaꞌolla tateenaꞌone; wotta malletoonoo shaaheenaꞌone.

²⁶ Kiruubeenaꞌo boonoshi ikkikkoona boonoshi neexo aashiri aashire hiroone.

²⁷ Kiruubeenaꞌon daammii, Yaafe Xaaꞌeexi Yaafooch, gubb waanaa kotiihe; kiruubeenaꞌochi qoshoo yaggeetone; ikke kiruubee qoshoo ikke baddi daabbooch tuggee beehe; bare kiruubee qoshoo bare baddi daabbooch tuggee beehe; gutte kiruubeenaꞌochi qoshoo Yaafe Xaaꞌeexi Yaafee daggoochaa biinnaa biinna danee beehe.

²⁸ Kiruubeenaꞌonoo aachoona dikkehe.

²⁹ Yaafee kechi daabbo bulliich, ebiyoo yaafe xaaꞌee daabboonaa Yaafe Xaaꞌeexi Yaafee daabboonooch, kiruubeenaꞌon, yeebbee mixinaꞌonaa aapphiti mocee bungeenaꞌonochi shaahiyoon shachiye.

³⁰ Yaafee kechi godoon gatinaa kellinon aachoona dikkehe.

³¹ Yaafe Xaaꞌeexi Yaafee kella giyeebeeti kellee shaaqqeenaꞌon zayitee mixoochee shuunehe; eboshichi qoomeenaꞌonaa shageenaꞌonon uuche shuutechinaꞌon tuniihe.

³² Zayitee mixoochee shuuneeti gutte kellee shaaqqeenaꞌo toommooch kiruubeenaꞌon, yeebbee mixinaꞌonaa aapphiti mocee bungeenaꞌonochi qecaaqecoon shachiye; shaaqqeenaꞌon, shacheeti kiruubeenaꞌonaa yeebbee mixinaꞌonon aachoona dikkehe.

³³ Ebiyoommon wotta yaafee kechi kella giyeebeeti kellooch zayitee mixoochee shuuneeti, awudde shuutechi qoomoon geddiye.

³⁴ Boonoshi ikkikkoona maaxaafoona yesheti, qoddeebeeti, gutti gutte kellee shaaqqeenaꞌon ciidee mixoochee shuunehe.

³⁵ Eboshi toommooch kiruubeenaꞌon, yeebbee mixinaꞌonaa aapphiti mocee bungeenaꞌonochi shaahiyoon shachiye; gaawichiꞌi aachoona dikkehe.

³⁶ Maaci addibaaboon, keejje yaaroon xareeti xaqqoona ikke yaaroon yigee shaaqqoona shuunehe.

³⁷ Doono Yeerichi yaafee kechi dechi heco Solomooni taateti awuddinnee natooba, Ziibi getteebeeti guttinnee agenooba, hecceehe.

³⁸ Solomooni taateti aaraa ikkinnee natooba, Buuli getteebeeti shimittinnee agenooba, bi gabeetoommon bi kuxi kuxona qanniye. Solomooni yaafee kexon shuunee bi qanniito, shabaatte natonane.