1 Taateenaꞌo 5 - Kafa Linguistics Project

Solomooni Yaafee Kexon Shuunoyich Qannoo

¹ Xiroosi taatoo Kiraami bi yemeeno bulliich Daawitich shunecho bi tunetoyich, Solomooni bi nihoochi keroon taatoo tunoyich bi huutteyoon bi waayehooba, bi wocheyechinaꞌon Solomoon waan daachiihe.

² Solomooniyoo Kiraam waan ishichiꞌi wochoon daachiihe:

³ “Ta nihoo Daawiti, Doono Yeeri bi etteenaꞌon bi baatooch dichimmi wottoon, bi guudoona beeti showeexi bi etteenaꞌona koyeebee, kexon bi Nuggishoo Doono Yeerichi shigoyich hagon hakkee bi qayon ariyaabeeto neene.

⁴ Tunebaani and ta Nuggishoo Doono Yeeri ta guudo bullina beetinaꞌo waanee taan kashiitone; etto tuneba, irite mooyo taach aalloone.

⁵ Ebiyoche, Doono Yeeri ta nihoo Daawitich ‘Ne keroon, ne taatee qeenooch ta kotiyemmi ne bushoo ta shigoyich kexon haggemmone’ iꞌi bi gettitoommon, ta Nuggishoo Doono Yeerich kexon hagoyich gabito taane.

⁶ “Andoo ta asheenaꞌoochee Sidoonee asheenaꞌochoommon mixo kuxon ariibeeto aallo bi tunoon ariyaabeeto neene. Libanoosi guudinaꞌoochee yigee mixon taach boonoshi kuxxemmoyich, ne asheenaꞌoyich gete; ta asheenaꞌoo ne asheenaꞌona tookki shuunebeete. Ne asheenaꞌochi shumaayoon ne gettetoommon qoccemmo taane” iye.

⁷ Kiraamiyoo Solomoonichi wochoon waayeꞌi oogichii emiriye. “Ebi shaahe aricheti aagetoon bi qeejjemmoyich, Daawitich ariyechi bushoon immiti Doono Yeeri hanaach galleteeto tunebe” iye.

⁸ Kiraamiyoo Solomoonich ishichiꞌi wochehe: “Taach ne deejjiti wochoon waayeto taane. Yigee mixonaa ciidee mixonon giddiyoon ciinnii beetona ne qaawimmo bullin tuniyoyich qannito taane.

⁹ Ta asheenaꞌo ebi mixon Libanoosi guudinaꞌoochee geechi, baharooch beddaahaa kindiyemminaꞌone; ikkochi cuyiree, baharee toommona deebi, ne getteti xaaꞌooch beddaahaa neech shakkiyemminaꞌone; aroochoo biichemminaꞌone. Ne asheenaꞌoo ebi aroochaa deqqemminaꞌone. Newoo ta kechi asheenaꞌoyich maayoon imona ta qaawaa beeton ceechemmo neene” iye.

¹⁰ Ebina Kiraami yigee mixonaa ciidee mixo bullinon bi qaawiti wottoon, Solomoonich immiye.

¹¹ Solomooniyoo Kiraami kechi asheenaꞌoyich hiye hume xaanee teepphoonaa zayitee michi aafoochee hiicheti, awudde balle hume neetiree zayitoonon immiye; ebinoo kuxaanoon nati natona Kiraamich immii beehe.

¹² Doono Yeeriyoo bi gibenikkitoommon Solomoonich ariyoon immiye. Kiraaminaa Solomoonina daggooch diggoo beetone. Boonoshi guttiyoo wogoon giyiyeete.

¹³ Solomooniyoo Israꞌeelee showoo bulliichee maddoon maddemmi shaashe hume asheenaꞌon kaacciye.

¹⁴ Eboshinoo aashiri aashire humoon ikkooch tuniiꞌi keejj beera qoodiye; ikke agenoon Libanoosi guudinaꞌooch boonoshi shuunemmoyich, gutte agenoon wotta boonoshi kexooch boonoshi kashemmoyich, kaalloon qociihe. Adoniraamiyoo ebi maddechinaꞌochi ukkiroone.

¹⁵ Solomoonich xaqqoon shaaggii qacciibeeti shabe hume asheenaꞌonaa xaqqoon xariibeeti shinne hume asheenaꞌona geppe showooch beetinaꞌone.

¹⁶ Ebiyee baroo wotta, shuunechinaꞌo toommooch ukkireti, shuunoon ciinnii shuuniibeeti keejje humaa keejje balle ukkireenaꞌo beetinaꞌone.

¹⁷ Boonoshiyoo taatoochi getoona yaafee kechi hecooch tunemmi, gaawi gaawe ogooge xaqqoon iijjii kichiiꞌi, xarii qanniiheete.

¹⁸ Kechi haggechi, Solomooninaa Kiraaminochi asheenaꞌonaa Gebaalee asheenaꞌona yaafee kechi shuunoyich qaawiibeeti mixon boorii xariꞌi, xaqqoonoo baddeꞌi qanniiheete.