1 Taateenaꞌo 4 - Kafa Linguistics Project

Solomooni Iraashiiti Iraasheenaꞌo

¹ Taatoo Solomooni Israꞌeelee showoo bulliich taatehe.

² Solomooni iraashiiti, aricheti bi iraasheenaꞌo eboshine: Sadooqi bushoo Azariyaasi qeeshoone;

³ Shiishi bushiisheenaꞌo Elihoreefinaa Akiyina koorechinaꞌone; Ahiluudi bushoo Yoshafaaxi kiinee koorechone;

⁴ Yoyaadi bushoo Beenayi ginee iraashoone; Sadooqinaa Abiyataarina qeesheenaꞌone;

⁵ Naataani bushoo Azariyaasi woraafee ukkireenaꞌochi iraashoone; Naataani bushoo Zabuudi qeeshoonaa taatoochi katini mikkirechonane;

⁶ Ahishaari taatee kechi ukkiroone. Abidahi bushoo Adoniraami maddoon maddiyechone.

⁷ Taatoonaa bi kechi asheenaꞌonoyich maayoon Israꞌeelee showoo bulliichee kiciibeeti, aaraa gutte iraasheenaꞌo Solomoonich beetinaꞌone. Eboshiyoo boonoshi ikkikkoona nati daggooch beeti agenee maayoon giddii beetinaꞌone.

⁸ Boonoshi shigoo: Geppechi Efreemee showooch, Been Huuri;

⁹ Makaazi, Shaꞌalibimi, Beet Shemeeshinaa Eloon Beet Hanaaninooch, Been Deqeeri;

¹⁰ Arubootinaa Sokoohinooch, Hefeeree showoo bulliichoo Been Heseedi;

¹¹ Dooree showoo bulliich, Been Abinadaabi; biyoo Solomooni bushee Xafaatin shaaggitone;

¹² Tanaaki, Megidi, Beet Sheꞌaani gaꞌooch beeti showoo bulliich, Tsaretaani gaꞌooch, Yezireelaa deshi-waan, Abeel Meholinaa Yokimeꞌaminooch beddaahaa beeti showoo bulliich, Ahiluudi bushoo Baꞌaani;

¹³ Gilaadee showooch beeti Ramoot, Gilaadee showooch Minaasi bushoo Yaꞌiirichi gafeenaꞌooch, wotta Bashaanee showooch beeti Arigobee showoonaa boonoshi tuggo gooshoo tuneti, xaqqee uxerechi shiche ogooge katemeenaꞌonooch Been Geberi;

¹⁴ Mahanayimee showooch, Iidi bushoo Ahinadaabi;

¹⁵ Nifitaalee showooch, Solomooni bushee Basematin shaaggiti Ahimaazi;

¹⁶ Aseeree showoonaa Beꞌalooti katemoonooch, Hushayi bushoo Baꞌaani;

¹⁷ Yisakooree showooch, Faruwaahi bushoo Yoshafaaxi;

¹⁸ Biiniyaamee showooch, Elaahi bushoo Shimeꞌinaa

¹⁹ Amooreenaꞌo taatoo Sihooninaa Bashaanee taatoo Oogina taateti Gilaadee showooch, Uriyi bushoo Geberinane; ebi showooch ukkiroo bi baachiye.

Solomoonich Qemi Qemona Giyiibeeti Maayo

²⁰ Yihudee asheenaꞌonaa Israꞌeeleenaꞌona baharee gasheexi qacoochoommon meettiyeete; maa uchiibee emiroona beeheete.

²¹ Solomooni qeejjiibeeto, Efiraaxisi aacoochee tiijjiꞌi Filsixeemee showooch beddaahaa, aroochee wotta Gibitsee daarooch beddaahaa beeti taatittinee showeenaꞌo bulliniye. Ebi showeenaꞌooch beeti asheenaꞌo Solomooni kashoona bi beeti yemeeno bulliich biich hajjeeꞌi, gibiroon deebii beeheete.

²² Solomoonich qemi qemona giyiibeeti maayo ebine: Shaashe xaanee qacini buddino, shiche xaanee qacichaa yiikkeyaani buddino,

²³ kexooch gedaa shiimeeti aashire gattoo, gadd gashetaa maabeeti hiye gattoo, balle bagoonaa emmishoona; eboshiyee baroo boyijjo, xiixxee, kubbi emmishoonaa aangechi baakkoonane.

²⁴ Tifisaahi katemoochee tiijjii Gaaza beddaahaa, Efiraaxisi aacoochaa aabi-gimo waan beeti showoo bulliich beeti taatoo bulli biich hajjeehe; bi guudoona beeti taatee showoo bullina tookkiinoo diggoona beehe.

²⁵ Solomooni kashoona bi beeti yemeeno bulliich, Daanee tiijjiꞌi Beershaab beddaahaa beeti Yihudee ashoonaa Israꞌeelee ashoona bi ikkikkoona bi woyinee yiiroonaa bi balaasee yiiroonooch diggoona kotee beehe.

²⁶ Gaarin geechiibeeti Solomoonichi haresheenaꞌoyich aabbe hume magedoonaa aaraa gutte hume yebbeebeeti haresheenaꞌona beetinaꞌone.

²⁷ Iraasheenaꞌo boonoshi kaalli kaallee agenooch taatoo Solomooninaa bi madoochee maabeeto bullinoyich maayoon giddii beeheete; amoonolla shappiiyaaneenaꞌone.

²⁸ Boonoshi ikkikkoyich qoceetoommon gaarin geechiibeeti haresheenaꞌonaa bare haresheenaꞌonoyich sheqoonaa buyoonon qaaweeti xaaꞌooch beddaahaa deebii beeheete.

Solomooni Ariyechonaa Shalligechona Tuno

²⁹ Yeeri Solomoonich wodde ariyoonaa shalligoonon, wotta baharee gasheexi qacoommi gamini gaboon immitone.

³⁰ Solomoonichi ariyoo aabi-keyo waan beeti asheenaꞌo bullichi ariyoonaa Gibitsee asheenaꞌo bullichi ariyoonoyee beshitone.

³¹ Biyoo ariyoona bare asheenaꞌo bulliyee beshitone; Iziree asho Etaaniyee, Mahooli bushiishoo Hemaani, Kalikolinaa Daridaahinoyee beshe ariyechon tunetone. Bi guudoona beeti aagetee showoo bulliich bi woroo waayeehe.

³² Biyoo keejje hume shaahiyoon gettiye; humaa uuche shoddoonoo kichiye.

³³ Libanoos beeti yigoochee tiijjii, xaqqee uxeree toommooch colleebeeti hisoophee michi waamooch beddaahaa, mixinaꞌochon gettitone; wotta cooxinaꞌochonaa gijjeenaꞌochonon, yoobbereenaꞌochon, yuummereenaꞌochonaa haasheenaꞌochonon gettitone.

³⁴ Solomoonichi ariyoon waayeti, showee toommo bulliich beeti taateenaꞌo waanee wocheyechinaꞌo bi ariyoon waayoyich waa beeheete.