1 Taateenaꞌo 3 - Kafa Linguistics Project

Solomooni Doono Yeer Waanee Shalligoon Qollo

¹ Solomooni Gibitsee taatoo Farooni busheen shaaggiꞌi, Faroonina naachehe. Bi kexon, Doono Yeerichi yaafee kexonaa Yerusaalemi guude uxeroonon shuunee bi qanniimmi wottoon, areen deebiꞌi, Daawiti Katemooch kotiihe.

² Ebiyooba kexo Doono Yeerichi shigoyich batt hakkeyaano bi tunetoyich, asheenaꞌo guudi toommeexi goyinnee xaaꞌeenaꞌoochaa deejjoon deejjii beeheete.

³ Solomooniyoo Doono Yeerin shunnii beetone. Bi nihoo Daawitichi qociyoona hammii beehe; tunebaani guudi toommeexi goyinnee xaaꞌeenaꞌoochaa deejjoon deejjii, ixaanoon shookkii beehe.

⁴ Bulliyee beshe goyinnee xaaꞌoo beeto, Gibeꞌoon bi tunetoyich, Yeerich deejjoon deejjoyich, taatoo arooch hammiye. Solomooni ebi deejjee gudee toommooch hume micciibeeti deejjoon deejjiye.

⁵ Gibeꞌoonaa Doono Yeeri Solomoonina xumi gumona danehe. Yeeriyoo “Neech ta immemmoyich ne qaawaabeeto amo gaata, taach gete” iye.

⁶ Solomooniyoo ishichiye: “Ne guuno ta nihoo Daawiti, ne aafooch gibeneeto, cadiqoonaa kaame mullechona bi tunetoyich, ooge ne shoodoon bekkiito neene. Ebi ooge ne shoodo bi kuxeyaachemmoyich tuniyaꞌa, bi taatee qeenooch kotemmi bushoon biich hanaach immeto neene.

⁷ “Andoo ta Nuggishoo Doono Yeero, ne guuno ta, ta nihoo Daawitichi xaaꞌooch kereeree ta taatemmoyich tuniito neene. Tunebaani ta batt giisheche bushoo taane; gimo keyon ariyaano taane.

⁸ Ne guuno ta beeto, neech ne kaacceti, bi meetoochee tiyitona haddaa ciyaani, dofee asheenaꞌo daggoochiye.

⁹ Ebich gondoonaa deꞌoonon bariiree, ne asheenaꞌon qeejjoo ta hakkemmoyich, ne guuno taach shalligechi mulloon imbe. Ebi tuno qayigaata, ebi shaahe ne asheenaꞌon nallii qeejjoon hakkemmo konine?” iye.

¹⁰ Solomooni ebi mooyon bi echo Doono Yeerin emirikkiye.

¹¹ Ebich Yeeri ishichiye: “Ne qellich eeni genjoon, woyee gaannoon, woyee ne etteenaꞌochi aalloon tuneyaanoon, dayinnetoona qeejjoyich shalligoon ne echetoyich,

¹² ne echetoommon tuniyemmo taane. Ebiyee aaf konichona aalli, wotta ebiyee gubb koniyoona daneyaachemmi ariyoonaa shalligechi mulloonon neech immemmo taane.

¹³ Wotta ne echeyaani gaannoonaa oogoonon neech immemmo taane. Ebich kashoona ne beemmi yemeeno bulliich neenna tatemmi taatoo beetaachemmone.

¹⁴ Ne nihoo Daawiti tuniitoommon, ta gommona ne hamigaata, ta qociyoonaa ta getoonon ne quyegaata, ne eenon genjiyemmo taane” iye.

¹⁵ Solomooniyoo tokketoochee tiyiꞌi, Yeeri gumona biich yibbaatoon ariihe. Aroochee Yerusaalem wotteꞌi hammiye; Doono Yeerichi wogee taabootee aafooch neexeechii micciibeeti deejjoonaa ikkittinee deejjoonon deejjiye; bi iraasheenaꞌo bullichoo gifiroon geddiye.

Solomooni Magge Mooyon Nalloo

¹⁶ Ikke areddoon yahechi gutte maacheenaꞌo waaꞌi, taatoo Solomooni aafooch neexeheete.

¹⁷ Boonoshi daggoochee ikkee ishichiyan: “Ta doonocho, hini ureenaa taanna ikke kexoochiye no beeto. Biinna tookkaa kexooch beebee, bushoon shiyoye.

¹⁸ Ta shiyeti keejjinnee qemooba, ebi ureyoo wotta shiyahane. Biinnaa taanna baachiye kexooch beeto. No guttoyee besh koniyoona are kexooch aalloone.

¹⁹ “Ebi ureechi bushoo kephaa bi getaa, xumoona qitiye.

²⁰ Ne gonnee ta, tokketooch ta beetaa, xumoona ta bushoon ta sheenoochee daammaa bi sheenooch tiqqahan; qititi bi bushoon deebaꞌa ta sheenooch tiqqiihan.

²¹ Ta bushoon xaachoyich yaaꞌoona ta tiyaahaa, ebiyoche, qititone. Tunebaani haree bekkooch ciinnaꞌa, ta shiyeti bushoo tunee bi qayon ariihoye” iyan.

²² Tunebaani ohe ure “Ebi toonoone; wodoo taachone; qititone neecho” iyan. Wondi ureyoo “Toonoone; qitito ne bushoone; wodoo ta bushoone” iyan. Ebiyoommon taatoo aafoochaa hayeheete.

²³ Aroochee taatoo ishichiye: “Hini, ‘Wodoo ta bushoone; qitito ne bushoone’ iyane. Ohi wotta ‘Toonoone; qitito ne bushoone; wodoo ta bushoone’ iyane” iye.

²⁴ Aroochee taatoo “Goraadoon taach deebote” iye. Goraadoon taatoyich deebiyeete.

²⁵ “Wode bushoon gutta kappheree, qaton ikkech, wotta qaton bareech imbote” iye.

²⁶ Wode bushoochi indee bi bushoyich bi maacee meeno qewetoyich, taatoyich “Ta doonocho, wodoon biich imballi, wuxiyaahine” iyan. Tunebaani ohi “Qoodeebani, neechoo taachoo tuneyaache” iyan.

²⁷ Aroochee taatoo wochiꞌi, “Ebi batti batti ureyich wode bushoon imbotani, wuxiyaahote; bushoochi indee biine” iye.

²⁸ Taatoo nalliti nalloon Israꞌeeleenaꞌo bulli waayeheete. Dayinnetoona nalloyich Yeerichi shalligoo biich beemon boonoshi beeggitoyich, taatoon shattiyeete.