1 Taateenaꞌo 22 - Kafa Linguistics Project

Akaabi Toommooch Mikiyaasi Keemmiti Keemo

¹ Sooriyeenaꞌonaa Israꞌeeleenaꞌona koyeyaanoon keejje naton koteheete.

² Keejjinnee natooba, Yihudee taatoo Yoshafaaxi Israꞌeelee taatoo waan hammiye.

³ Israꞌeelee taatoo bi naayinaꞌoyich, “Gilaadee showooch beeti Ramooti katemoo noocho tunoon, nowoo Sooriyee taatoo kishoochee deꞌaanoon cikkiyaa no qayon arii beetote?” iye.

⁴ Yoshafaaxichoo, “Gilaadee showooch beeti Ramootin no kochemmoyich, taanna tookki hammenne?” iye. Yoshafaaxiyoo Israꞌeelee taatoyich, “Tawoo neenoommo taane; ta ashoo ne ashoommone; ta haresheenaꞌoo ne haresheenaꞌoomminaꞌone” iye.

⁵ Yoshafaaxi daakkiꞌi, Israꞌeelee taatoyich, “Shiichiree Doono Yeerichi daaggoon echebe” iye.

⁶ Aroochee Israꞌeelee taatoo keemechi awudde balli bede asheenaꞌon ikkooch kiciꞌi, “Gilaadee showooch beeti Ramootin koyoyich hambote, qayote?” iꞌi boonoshin echehe. Boonoshiyoo, “Hambe; Yeeri ne kishooch beshiiree immemmone” iyeete.

⁷ Tunebaani Yoshafaaxi, “Biin no echemmi Doono Yeerichi keemecho baroo hiniich aalle?” iꞌi echehe.

⁸ Yoshafaaxich Israꞌeelee taatoo, “Biinna Doono Yeerin no echaabeeti ikke uro beetone; biyoo Imilaahi bushoo Mikiyaasine. Tunebaani taach bi keemmiibeeto gondoonani, deꞌoon tuno bi qajjitoyich, biin shixxoye” iye. Yoshafaaxiyoo, “Taatoo ishichaaye” iye.

⁹ Taatoo ikke bi naayon ceeggiꞌi, “Imilaahi bushoo Mikiyaasin kaate ceegi deebe” iye.

¹⁰ Israꞌeelee taatoonaa Yihudee taatoo Yoshafaaxina taatee tahoon taheꞌi, Shamaari uxeree kellee gaꞌooch beeti maayi buchi xaaꞌooch boonoshi taatee qeeni qeenooch kotee beeheete. Keemechinaꞌo bulliyoo boonoshi aafoochaa keemoon keemmii beeheete.

¹¹ Kenanaahi bushoo Sedeqiyaasi qaroommi mooyon xuuroochee shuuneꞌi, “Doono Yeeri ishichiye: ‘Sooriyeenaꞌon boonoshi aallemmi wottoon eboshina kochemmo neene’ itone” iye.

¹² Keemechinaꞌo bulli, “Gilaadee showooch beeti Ramoot hamiree koye; Doono Yeeri taatoo kishooch beshiiree immemmone” iibee biichoommon keemmii beeheete.

¹³ Mikiyaasin ceegga hammiti wocheyecho biich, “Keemechinaꞌo bulli qaaroon ikkochiꞌi, taatoyich gaaweton keemmii beetinaꞌone. Ne qaaroo boonoshi qaaroona tookki ikkoo bi tunemmoyich, gaaweton ne gettemmoyich, neen qollehoye” iye.

¹⁴ Tunebaani Mikiyaasi, “Beeyechi Doono Yeeri beege! Doono Yeeri taach gettimmon baach gettemmo taane” iye.

¹⁵ Taatoo waan bi waammona, taatoo biich, “Mikiyaaso, Gilaadee showooch beeti Ramootin koyooch hambona, qayona?” iye. Biyoo, “Hami koyi yeshe; Doono Yeeri taatoo kishooch beshiiree immemmone” iꞌi biich wochiye.

¹⁶ Tunebaani taatoo biich, “Iberoyee besh Doono Yeerichi shigoona koote mooyon taach ne getaachemmoyich, ambiche wottooniye neen ta wogii beeyemmo?” iye.

¹⁷ Mikiyaasiyoo, “Israꞌeelee asheenaꞌo bulli qiddaalli bagoochoommon guudinaꞌo toommooch boonoshi shacee beetaa beeggoye. Doono Yeeriyoo, ‘Eboshich qiddoo aalloone. Diggoona boonoshi kexi kexooch wottebeete’ itone” iye.

¹⁸ Yoshafaaxich Israꞌeelee taatoo, “Gondoonani, deꞌe mooyon taach kemaachemmo bi tunoon getaano taane?” iye.

¹⁹ Aroochee Mikiyaasi ishichiye: “And illa Doono Yeerichi qaaroon waayebe! Doono Yeeri bi taatee qeenooch koteꞌi, shimaajji maraakoo bulliyoo bi gaꞌooch, bi qanninaa bi yoochinooch neexeꞌi beeton beeggoye.

²⁰ Doono Yeeriyoo ‘Koni Gilaadee showooch beeti Ramoot hamiree Akaabin bi qitemmoyich muriciiba?’ iye. “Ikke maraakoo ikke mooyon, wotta bare maraakoo bare mooyon gettiye.

²¹ Aroochee ikke ayaano kechiꞌi, Doono Yeeri aafooch neexeechii, ‘Ta biin muriciyemmo taane’ iye.

²² “Doono Yeeriyoo biich, ‘Aabichireeshiye ne muriciyemmo?’ iye. “Biyoo, ‘Hamiree, bi keemechinaꞌo bulli kootoon keemmemmoyich tuniyemmo taane’ iye. “Doono Yeeriyoo, ‘Muriciyemmo neene; neechoo kaamemmone; hamiree, ebin tuniibe’ iye.

²³ “Andoo ebiyoche, Doono Yeeri ebi ne keemechinaꞌo bulli noonooch koote ayaanoon kotiitone. Doono Yeeri ne toommooch gondoon tuniyemmo bi tunoon gettitone” iye.

²⁴ Aroochee Kenanaahi bushoo Sedeqiyaasi Mikiyaas waan giddeꞌi, bi gaakkooch tappeechii, “Doono Yeerichi Ayaano neen bi yibbaatiito, ta waanee aabina besheꞌiniye?” iye.

²⁵ Mikiyaasiyoo, “Ebiyoche, arooba aasheya gatooch ne giyiyooba, beeggemmo neene” iye.

²⁶ Aroochee Israꞌeelee taatoo ishichiye: “Mikiyaasin yeshote; katemee iraashoo Amooninaa taatoochi bushoo Yoꞌaashina waan daambote.

²⁷ Aroochee, ‘Taatoo, “Diggoona ta wottemmi wottoon, ebi uroon cuyee kexooch gedote; dapphe koshonaa aaconoyee besh amoonolla biich immaahote” itone’ getote” iye.

²⁸ Mikiyaasiyoo, “Diggoona ne wottegaata, Doono Yeeri taanna getaanoone” iye. Aroochee, “Asheenaꞌote, ittoshi bulliyoo ebin waayebote” iye.

Akaabi Qitoo

²⁹ Ebina Israꞌeelee taatoonaa Yihudee taatoo Yoshafaaxina Gilaadee showooch beeti Ramootin kocha hammiyeete.

³⁰ Yoshafaaxich Israꞌeelee taatoo, “Ta aricheyaachemmoyich, koyooch ta giyemmo ta tahoon shaddireeshiye. Tunebaani ne, ne taatee tahoon tahebe” iye. Israꞌeelee taatoo taatee tahoon shaddiꞌi koyooch giyiye.

³¹ Sooriyee taatoo gaarinaꞌochi ukkireenaꞌo tuneti shaashaa gutte asheenaꞌoyich, “Israꞌeelee taatoyee besh, giisho tuneba oogoo koninolla tookki koyeyaahote” iꞌi gettitone.

³² Gaarinaꞌochi ukkireenaꞌoo Yoshafaaxin beeggiꞌi, “Iberoon hini Israꞌeelee taatoone” iꞌi gabiyeete. Ebich biin kocha bi waan guuddiyeete. Yoshafaaxiyoo cookiye.

³³ Gaarinaꞌochi ukkireenaꞌo Israꞌeelee taatoo tunee bi qayon beeggiꞌi, biin yoohoochee wotteheete.

³⁴ Tunebaani ikke uro diqqoona bi maꞌoona shangoon awureꞌi, Israꞌeelee taatoon, bi getee ginee tahee danoochaa kochiye. Aroochee taatoo bi gaarin gashee beetoyich, “Kochaa mayeto taane; gubb wochi gasheree koyee daggoochee taan kichibe” iye.

³⁵ Arooba koyo qeeccii hammiye. Taatoo Sooriyeenaꞌo waan bi aafoon wochii, bi gaari toommooch teeqqeꞌi beehe. Bi mayee damoo gaari maacooch ufee beehe; aroobee xumoo qitiye.

³⁶ Aabee gimooch Israꞌeelee ginee naayinaꞌo daggooch, “Asho bi ikkikkoona bi katemooch, bi ikkikkoona bi showooch wottebe” ii beeti cookoo cookeehe.

³⁷ Ebina taatoo qitiye; Shamaara deebiꞌi, arooch duukkiyeete.

³⁸ Aroochee Shamaara beeti kote aacona gaarin machiyeete. Doono Yeeri gettiti qaaroommon, bi damoon kunaaneenaꞌo nappheheete; yahechinaꞌo are aacona macheheete.

³⁹ Akaabi shuuneti eche shuunoo, bi tuniiti mooyo bulli, dangeyi gashoona bi mashaamiiti bi taatee kexochonaa bi shuuneti katemeenaꞌo bullichona Israꞌeelee taateenaꞌo kiinee macaafooch kooreetone.

⁴⁰ Akaabi qitiꞌi bi qaabbechinaꞌo waan xaꞌeehe. Bi bushoo Akaziyaasi bi xaaꞌooch kereeꞌi taatehe.

Yihudee Taatoo Yoshafaaxi Mooyo

⁴¹ Israꞌeelee taatoo Akaabi taateti awuddinnee natooba, Aasi bushoo Yoshafaaxi Yihudee showooch taatehe.

⁴² Yoshafaaxi bi taatehooba, bi eeno shaashaa uuche natone. Yerusaalem beechii hiyaa uuche naton qeejjiye. Bi indee Azuubi getteehan; biyoo Shilihi busheene.

⁴³ Yoshafaaxi bulli mooyona bi nihoo Aasichi gommon dabbiye; aroochee okk hach getaanoone. Doono Yeeri aafooch kaame mooyon tuniihe. Tunebaani guudi toommeexi goyinnee xaaꞌeenaꞌon aalliyaanoone. Asheenaꞌo andoo guudinaꞌo toommooch beeti goyinnee xaaꞌeenaꞌooch deejjoon deejjii, ixaanoonoo shookkii beeheete.

⁴⁴ Yoshafaaxiyoo Israꞌeelee taatoona tookkii shunoona beehe.

⁴⁵ Yoshafaaxi shuuneti eche shuunoo, oogeti giidecho bi tunoonaa bi koyeti koyoona Yihudee taateenaꞌo kiinee macaafooch kooreetone.

⁴⁶ Bi nihoo Aasi yemeenooba echeti, yaafee kechi yahechi anaaminaꞌon showoochee aalliihe.

⁴⁷ Ebiyooba Edoomee showooch taatoo aalloone; showoon qeejjiibeeto, Yihudee taatoo iraashiiti iraashoone.

⁴⁸ Yoshafaaxi aachoon deeboyich, Ofiir hammemmi, Tarisheshee markabeenaꞌon shuuniihe. Ebi markabeenaꞌo Etsiyoon Geberaa boonoshi tiishetoyich, hamaaneenaꞌone.

⁴⁹ Akaabi bushoo Akaziyaasi Yoshafaaxich, “Ta asheenaꞌo ne asheenaꞌona tookki markaboona hambeete” iye; tunebaani Yoshafaaxi qajjiye.

⁵⁰ Yoshafaaxi qitiꞌi bi qaabbechinaꞌo waan xaꞌeehe. Boonoshi duukketi, bi qaabbechi Daawiti Katemooch duukkehe. Bi bushoo Yehoraami bi xaaꞌooch kereeꞌi taatehe.

Israꞌeelee Taatoo Akaziyaasi Mooyo

⁵¹ Yihudee taatoo Yoshafaaxi taateti araa shabaattinnee natooba, Akaabi bushoo Akaziyaasi Shamaara beechii, Israꞌeeleenaꞌo toommooch taatehe; Israꞌeeleenaꞌon gutte naton qeejjiye.

⁵² Biyoo Doono Yeeri aafooch gonde mooyon shuunehe. Bi indeenaa bi nihoonochi, wotta Israꞌeeleenaꞌon axaaxoon shuuniiti, Nebaaxi bushoo Yeroboꞌaminochi gommon dabbiye.

⁵³ Baꞌaaloyich goyinnee maddehe; bi nihoochoommon, Israꞌeelee Nuggishoo Doono Yeerin ippiihe.