1 Taateenaꞌo 21 - Kafa Linguistics Project

Elizabeeli Nabootin Wuxiyoo

¹ Yezireelee asho Nabootich Shamaaree taatoo Akaabichi taatee kechi gaꞌooch woyinee budo beehe.

² Ikke areddoon Akaabi Nabootich, “Ne budo beeto, ta taatee kechi gaꞌooch bi tunetoyich, bechee michi xaaꞌoo ta tuniyemmoyich taach imbe. Ebichi keroon biyee beshe woyinee budon neech immemmo taane; woyee ne qaawigaata, bi gatiyee gijjoon qoccemmo taane” iye.

³ Tunebaani Nabooti Akaabich, “Ta qaabbechinaꞌo waanee ta woraashiti showoon neech imon Doono Yeeri ta waanee wokkiibe” iye.

⁴ Yezireelee asho Nabooti, “Ta qaabbechinaꞌo waanee ta woraashiti showoon neech imaache” bi itoyich, Akaabi ippee kaareꞌi bi kexooch hammiye; bi aafoon daabbo waan wochiꞌi, bi qeenooch teeqqehe; maayoonoo mahehe.

⁵ Bi mechee Elizabeeli bi waan waaꞌa, “Ebi shaahoon ne ippeto, maayoonoo ne maheto, amoyichiye?” iyan.

⁶ Biyoo areyich “Yezireelee asho Nabootin ‘Ne woyinee budon gijjoona taach kembe; woyee ne qaawigaata, bi keroon bare woyinee budon neech imbona’ iyo. Tunebaani bi, ‘Ta woyinee budon imaache’ iꞌi taach bajjiye” iye.

⁷ Bi mechee Elizabeeli biich, “Ebi neene, Israꞌeelee showoon qeejjemmo? Tiyiree maayoon mame; ne mulloo emiribe; Yezireelee asho Nabootichi woyinee budon ta, neech immemmi taane” iyan.

⁸ Biyoo Akaabichi shigoona koorichoon kooriyan; Akaabichi maatemoonoo dukkahan. Nabooti beeti katemooch biinna tookkii beeti geeneenaꞌonaa ogoogeenaꞌonoyich daachiihan.

⁹ Koorichoon ishichaꞌa kooriyan: “Coomee awaajjoon awaajjibote; Nabootichoo oogee xaaꞌoon imbote.

¹⁰ Gutte gaacaalli asheenaꞌon bi ciinooch ittoshi kotiitaa, ‘Yeerinaa taatoonon naaggitone’ geti bi toommooch miixebeete. Ebiyee gubb, biin katemoyee maach kichiree, xaqqoona yexi wuxibote” iyan.

¹¹ Ebina Yezireeli katemee asheenaꞌo, eboshiyoo geeneenaꞌonaa ogoogeenaꞌona, Elizabeeli koorichoon kooraꞌa boonoshich bi gettetoommon tuniiheete.

¹² Coomee awaajjoon awaajjiyeete; Nabootichoo oogee xaaꞌoon immiyeete.

¹³ Gutte gaacaalli asheenaꞌoo waaꞌi bi ciinooch koteheete. Ebi gaacaalli asheenaꞌo, asheenaꞌo aafoochaa, “Nabooti Yeerinaa taatoonon naaggitone” iꞌi bi toommooch miixeheete. Ebich asheenaꞌo biin katemoyee maach kichiꞌi, xaqqoona yexxii wuxiyeete.

¹⁴ Ebiyee gubb, Elizabeelich, “Nabooti xaqqoona yexaa qititone” iꞌi wochoon daachiiheete.

¹⁵ Elizabeeli Nabooti xaqqoona yexaa bi qitoon waayaꞌa, bekkech Akaabich, “Nabooti qititone; ‘Gijjoona kemaache’ iꞌi bi bajjiti, bi woyinee budon tiyi hamiree woraashibe” iyan.

¹⁶ Akaabiyoo Nabooti qitoon waayeꞌi, bekkech bi woyinee budon woraashoyich tiyii, desh hammiye.

¹⁷ Aroochee Doono Yeeri Tishibee asho Eliyaasich ishichiye:

¹⁸ “Shamaara beeti Israꞌeelee taatoo Akaabina danoyich, tiyiree desh hambe. Ebiyoche, woraashiya bi hammiti, Nabootichi budooch beetone.

¹⁹ Newoo biich ‘Doono Yeeri ishichiye: “Wuxaachaa bi showoon woraashinne?” itone’ gete; wotta daakkiree biich, ‘Doono Yeeri ishichiye: “Kunaaneenaꞌo Nabootichi damoon nappheti xaaꞌoochaa ne damoon ebiyoommon napphemminaꞌone” itone’ gete” iye.

²⁰ Akaabi Eliyaasin beeggiꞌi, “Ta ettoocho, batt taan danenne?” iye. Eliyaasiyoo biich wochiꞌi ishichiye: “Eeha, Doono Yeeri aafooch gonde shuunoon shuunoyich ne qelloon kemmeto ne tunetoyich, neen daneto taane.

²¹ Ebich Doono Yeeri ishichiye: ‘Gonde mooyon ne toommooch deebemmo taane. Neen ciroona hidi aalliyemmo taane. Akaabi yaroochee guuno tuneba doono, anaamo bullin Israꞌeelee showoochee aalliyemmo taane.

²² Taan ne ippiitonaa Israꞌeeleenaꞌon axaaxoon ne shuuniitonoyich, ne kechi asheenaꞌon Nebaaxi bushoo Yeroboꞌami kechi asheenaꞌonaa Akiyi bushoo Baꞌaashi kechi asheenaꞌonochoommon tuniyemmo taane’ itone.

²³ “Wotta Doono Yeeri Elizabeelichon ishichii beetone: ‘Yezireeli katemee xaqqee uxeree gaꞌoochaa Elizabeelin kunaaneenaꞌo maayemminaꞌone’ itone.

²⁴ “Akaabi yaroochee katemoochaa qitimmon kunaaneenaꞌo maayemminaꞌone; gaddoochaa qitimmonoo shimaajji gaceenaꞌo maayemminaꞌone” iye.

²⁵ Bi mechee Elizabeeli biin shuurikkaa, Doono Yeeri aafooch gonde mooyon shuunoyich bi qelloon kemmiti, Akaabiyoommi asho aalloone.

²⁶ Doono Yeeri Israꞌeeleenaꞌo aafoochee yookkii kichiti Amooree asheenaꞌo tuniitoommon, biyoo shahalloyich goyinnee maddoona oogichii ciigiiti shuunoon shuunehe.

²⁷ Akaabi ebi qaaroon waayeꞌi, bi tahoon keexxiye; dookoon taheꞌi coomiye; dookoochoo qeyiye. Qumittimiꞌinoo hammii beehe.

²⁸ Aroochee Doono Yeeri Tishibee asho Eliyaasich ishichiye:

²⁹ “Akaabi bi qelloon ta aafooch aabichiꞌi bi giishiito gaata beeggaa beetine? Bi qelloon ta aafooch bi giishiitoyich, gonde mooyon bi yemeenooch deebaachemmo taane. Tunebaani bi bushoochi yemeenooch gonde mooyon bi kexooch deebemmo taane” iye.