1 Taateenaꞌo 20 - Kafa Linguistics Project

Sooriyeenaꞌo Israꞌeeleenaꞌon Koyo

¹ Sooriyee taatoo Been Hadaadi bi ginee naayinaꞌo bullin ikkooch kiciye. Biinna tookkii shaashaa gutte taateenaꞌo boonoshi haresheenaꞌonaa gaarinaꞌona tookkii beetinaꞌone. Biyoo Shamaarin kechii giichii kochiye.

² Aroochee katemooch wocheyechinaꞌon daachiihe; wocheyechinaꞌoo Israꞌeelee taatoo Akaabich “Been Hadaadi ishichiye:

³ ‘Ne birewoonaa ne aachoona taachone. Gaawi gaawe ne mecheenaꞌonaa ne bushiisheenaꞌona taachinaꞌone’ itone” iyeete.

⁴ Israꞌeelee taatoo wocheyechinaꞌoyich wochiꞌi, “Taatoo ta doono Been Hadaadich, ‘Ne getteto tunebe; ta tunebon taach beeto bulli neechone’ itone getote” iye.

⁵ Aroochee wocheyechinaꞌo wochinnoon waaꞌi biich, “Been Hadaadi ishichii beetone: ‘Ne birewoonaa ne aachoonon, ne mecheenaꞌonaa ne bushiisheenaꞌonon taach ne immemmoyich, wochoon neech daachiito taane.

⁶ Tunebaani, ta ginee naayinaꞌon yaach ebi saatooch ne waan ta daachiitaa, ne kexonaa ne asheenaꞌo kexinaꞌonon boshemminaꞌone; aaxxoo tuneti mooyo bullin yeshi woyemminaꞌone’ itone” iyeete.

⁷ Israꞌeelee taatoo showee geeneenaꞌo bullin ceeggiꞌi, “Ebi uro aabichiꞌi kaaroon bi qaawiibeeto gaata beegote. Ta mecheenaꞌonaa ta bushiisheenaꞌonon, ta birewoonaa ta aachoonon ta immemmoyich wochoon bi deejjaa, deꞌa iyoye” iye.

⁸ Geeneenaꞌo bullinaa asheenaꞌo bullina, “Waayeyaahine; biich deꞌa gettaahine” iyeete.

⁹ Biyoo Been Hadaadichi wocheyechinaꞌoyich, “Taatoo ta doonoyich ‘Ne guuno ta, shiichaꞌa taach ne wocheto bullin tuniyemmo taane. Tunebaani hinin tuniyoon hakkaache’ itone getote” iye. Wocheyechinaꞌo wottee hammiꞌi, ebin gettiyeete.

¹⁰ Been Hadaadiyoo, “Taan dabbiibeeti asheenaꞌoyich Shamaaree butto kopp koppee ikki bi bedigaata, nuggisheenaꞌo ta toommooch ebin tuniibeete; ebinoo daakkibeete” iꞌi wochehe.

¹¹ Israꞌeelee taatoo wochiꞌi, “ ‘Koyooch cuyeꞌi kechiibeeti asho kochii wochitochoommon, gokkaaye’ getiree biich getote” iye.

¹² Been Hadaadi ebin bi waayeto, duukkaanoochaa taateenaꞌona tookkii uyoon uchiibeeniye. Bi ginee naayinaꞌoyich, “Koyoyich qannibote” iye. Boonoshiyoo katemoon koyoyich qanniyeete.

Akaabi Been Hadaadin Kochii Wochoo

¹³ Aroochee Israꞌeelee taatoo Akaab waan keemecho waaꞌi, “Doono Yeeri ‘Ebi mattiqutte ginee naayo bullin beeggaa beetine? And ne kishooch beshiiree immemmo taane. Ta, Doono Yeeri ta tunoonoo ariyemmo neene’ itone” iye.

¹⁴ Akaabiyoo, “Ebi bi tunemmo koninane?” iye. Keemechoo, “Doono Yeeri ‘Woraaferasheenaꞌochi gurimaashe ginee naayinaꞌonane’ itone” iye. Aroochee Akaabi, “Koyoon wonnemmo, konine?” iye. Biyoo, “Neene” iye.

¹⁵ Ebina Akaabi woraaferasheenaꞌochi gurimaashe ginee naayinaꞌon kiciye. Boonoshiyoo gutte ballaa shaashaa gutteenaꞌone. Boonoshi hillooch Israꞌeelee ginee naayinaꞌo bullin kiciye. Boonoshiyoo wotta shabaatte humeenaꞌone.

^16-17 Eboshi bulli showoo tukkehaa, woraaferasheenaꞌochi gurimaashe ginee naayinaꞌon aaf shiichiiꞌi, koyeya hammiyeete. Boonoshi hammito, Been Hadaadinaa bi gaacheenaꞌo tuneti shaashaa gutte taateenaꞌona duukkaanee daggoochaa uchii mashee boonoshi beetenane. Been Hadaadi wocheyechinaꞌon daachiihe. Boonoshiyoo wottee waaꞌi biich, “Asheenaꞌo Shamaaree waa beetinaꞌone” iyeete.

¹⁸ Biyoo, “Boonoshi waabeeto diggoyich tuneba, woyee ginee koyoyich, boonoshin kashoona yeshiree deebote” iye.

¹⁹ Woraafeenaꞌochi gurimaashe ginee iraasheenaꞌo Israꞌeelee ginee naayinaꞌon dabbiiꞌi, katemoochee kechiyeete.

²⁰ Bulliyona bi ikkikkoona bi aafi aafooch daneton wuxiye. Sooriyeenaꞌo woceheete. Israꞌeeleenaꞌoo boonoshin yoohooch giyiyeete. Tunebaani Sooriyee taatoo Been Hadaadi bi hareshoon yebbeꞌi, hareshechinaꞌona tookkii muricciye.

²¹ Israꞌeelee taatoo aaf xuqqii haresheenaꞌonaa gaarinaꞌonon yexxiye; Sooriyeenaꞌonoo oogeti koyona wuxiye.

²² Aroochee keemecho Israꞌeelee taatoo waan waaꞌi biich, “Waabeeti naawooch Sooriyee taatoo wochinnoon neenna koyemmo bi tunetoyich, kupphebe; amoon ne tuniyemmo gaata gabibe” iye.

Sooriyeenaꞌo Wochinnoon Israꞌeeleenaꞌon Koyo

²³ Aroochee Sooriyee taatoyich bi naayinaꞌo, “Boonoshi nuggisheenaꞌo guudi nuggisheenaꞌone. Noyee beshii boonoshi sharito ebichiye. Tunebaani yimaanoochaa boonoshina no koyegaata, iberoochaa boonoshiyee beshiree sharemmo noone.

²⁴ And ebin tuniibe; taateenaꞌon ginee iraashittinoochee kindiichi, boonoshi keroon bare ginee iraasheenaꞌon iraashiibe.

²⁵ Aalleti ne ginee naayoommi ginee naayon, hareshee keroon hareshoon, gaari keroon gaarin, kicibe. Yimaanoochaa boonoshina tookki koyemmo noone; iberoochaa boonoshiyee beshiree sharemmo noone” iyeete. Biyoo boonoshi ciicoon waayehe; boonoshi gettitoommonoo tuniihe.

²⁶ Gubbi naawooch Been Hadaadi Sooriyeenaꞌon kiciye; Israꞌeeleenaꞌon koyoyich Afeeqi katemooch kechiye.

²⁷ Israꞌeeleenaꞌoo kiceeheete; qaawiibeeti mooyo boonoshich ichetaa, koyeya kechiyeete. Israꞌeeleenaꞌo gishiishi, gutte emmishee gotochoommon tuneꞌi, boonoshi ciinooch koteheete. Tunebaani Sooriyeenaꞌo showoona mashiritinaꞌone.

²⁸ Yeer asho waaꞌi, Israꞌeelee taatoyich, “Doono Yeeri ishichiye: ‘Sooriyeenaꞌo, “Doono Yeeri guudi nuggishoani, bambee nuggishoo toonoone” boonoshi itoyich, ebi meeti ginee naayo bullin ne kishooch beshiiree immemmo taane. Ta, Doono Yeeri ta tunoon ariyemmo ittoshine’ itone” iye.

²⁹ Sooriyeenaꞌonaa Israꞌeeleenaꞌona ciinooch kaamboon geddiꞌi shabaatte qemon koteheete. Shabaattinnee qemooba yesheheete. Israꞌeeleenaꞌo balle hume Sooriyee ginee naayinaꞌon ikke qemooch wuxiyeete.

³⁰ Echeenaꞌo wocciꞌi Afeeq giyiyeete. Aroochaa hiyaa shabaatte humeenaꞌo toommooch xaqqee uxeroo dihiye. Been Hadaadiyoo are katemooch wocciꞌi kechi gatooch giyiye.

³¹ Bi naayinaꞌoo biich, “Israꞌeelee taateenaꞌo maarechinaꞌo boonoshi tunoon waayeto noone. No shimetooch dookoon marixxiree, no qettoochoo woderoon caaciree, Israꞌeelee taatoo waan hambone. Diqqich ne kasheen wodiyemmone” iyeete.

³² Ebina boonoshi shimetooch dookoon marixxii, boonoshi qettoochoo woderoon caaccii, Israꞌeelee taatoo waan waaꞌi, “Ne guuno Been Hadaadi: ‘Ta kasheen ne wodiyemmoyich neen qollehoye’ itone” iyeete. Aroochee taatoo, “And beddaahaa kashoona beete? Bi ta manoone” iye.

³³ Asheenaꞌo maaroon bekkiibeeti malletoon bi noonoochee waayeꞌi bekkech, “Eeh, Been Hadaadi ne manoone” iyeete. Aroochee taatoo boonoshich, “Hamiree biin deebote” iye. Been Hadaadiyoo bi waan waahe. Been Hadaadi gaari toommooch bi kechemmoyich taatoo tuniihe.

³⁴ Been Hadaadiyoo taatoyich, “Ne nihoo waanee ta nihoo deqqiti katemeenaꞌon neech wochemmo taane. Shamaara ta nihoo tuniitoommon, newoo Damaasiqa neech meeti gabiyoon neechoon hakkihine” iye. Akaabiyoo, “Ebi wogoona neen gawukkemmo taane” iye. Ebina biinna tookkii wogo giyiꞌi biin gawukkiye.

Akaabi Toommooch Ikke Keemecho Nalloo

³⁵ Keemechinaꞌo daggoochee ikkoo Doono Yeeri gettiti getoona biinoommi keemechon, “Taan yexe” iye. Tunebaani uro qajjiye.

³⁶ Ebich keemecho biich, “Doono Yeeri gettiti qaaroyich deꞌa geto ne qajjetoyich, ta waanee ne hammaahaa, bekkech daaheroo neen wuxemmone” iye. Bi waanee barii bi hammaahaa, bekkech daaheroo biinna daneꞌi biin wuxiye.

³⁷ Keemecho bare uroon daneꞌi, “Taan yexe” iye. Uroo biin yexxiye; biin yexxiꞌinoo mayiihe.

³⁸ Aroochee keemecho gommi gashooch neexeꞌi, taatoon quyehe. Koni bi gaata bi aricheyaachemmoyich, bi aafoon cariqqoona kaappiye.

³⁹ Taatoo beshemmona, bunneꞌi taatoyich, “Ne guuno ta, koyee daggooch hammoye. Aroochaa ikke ginee naayo ta waan ikke kecceti uroon deebiꞌi, ‘Ebi uroon quyebe; bi aallegaata, ne kashe bi kashee keroon qocceyemmine; woyee shaashaa awudde kiilo giraamee birewoon qoccemmo neene’ iye.

⁴⁰ Ne guuno taach shuunoo woddetaa, shaaweyaa ta beetaa, uro aallehe” iye. Israꞌeelee taatoo biich, “Ne, ne qelloona nallito neene; ne toommooch tunemmo ebi ne gettetoommone” iye.

⁴¹ Aroochee keemecho bekkech bi aafoochee cariqqoon gaxxiye. Israꞌeelee taatoo keemechinaꞌoochee ikkoo bi tunoon ariihe.

⁴² Are keemecho biich “Doono Yeeri ishichiye: ‘Qitibe iyaꞌa bi toommooch ta nalliti uroon ne kishoochee kichaa ne gawukkitoyich, ne kashe bi kashee xaaꞌooch kereyemmine; ne asheenaꞌo bi asheenaꞌo xaaꞌooch kereyemminaꞌone’ itone” iye.

⁴³ Aroochee Israꞌeelee taatoo ippee kaareꞌi Shamaara beeti bi kexooch wottee hammiye.