1 Taateenaꞌo 2 - Kafa Linguistics Project

Solomoonich Daawiti Immiti Qociyoo

¹ Daawiti qitemmi aabo katinee, bi bushoo Solomoonich ishichiꞌi gettiye:

² “Ebiyoche, ta qitemmi aabo katinnitone. Illa kupphebe; maac kuxe asho tunebe.

³ Ne Nuggishoo Doono Yeerichi getoon quyebe. Ne tuniyaabeeti mooyonaa ne hammaabeeti gommo bullina neech bi kaamemmoyich, bi gommona hambe; Muusichi Sheerooch bi kooreetoommon, bi doyeenaꞌon, bi geteenaꞌon, bi sheereenaꞌonaa bi qociyeenaꞌonon quyebe.

⁴ Ebin ne tuniigaata, Doono Yeeri taach ‘Ne yareenaꞌo ta getoon boonoshi waayegaata, ta aafooch ceeni boonoshi mulloonaa ceeni boonoshi kashoona gibeneeto tuneꞌi boonoshi giyii keyigaata, Israꞌeelee taatee qeenooch kotemmi asho ne yaroochee mucceyaachemmone’ bi iti qaaro ceennemmone.

⁵ “Newoo Tseruuyi bushoo Yoꞌaabi ta toommooch bi tuniiton, Israꞌeelee ginee naayinaꞌochi iraasheenaꞌo tuneti Neeri bushoo Abeneerinaa Yeteeri bushoo Amaasinochi toommooch bi shuuneton ariyaabeeto neene; ginoochaa ufeti damoyich nichoon kichoona diggee aaboona boonoshi damoon ukkitone. Ebi damoona bi shimetooch bi cuyeti shachoonaa bi baatooch bi gedditi caammoonon wooriitone.

⁶ Ebich tun bede mooyon ne ariyoona tuniibe; geene baayeree, diggoona maash bi hammemmoyich qajjaahine.

⁷ “Ne manoo Abisoloomi aafoochee maxxaꞌa ta hammehooba, gaawe mooyon taach boonoshi tuniitoyich, Gilaadee asho Barizilayi bushiisheenaꞌoyich gaawe mooyon tuniibe. Ne madoochee maabeeti asheenaꞌona tookki mameete.

⁸ “Mahanayim ta hammehooba, kupphiiꞌi taan uppiti, Bahuriim beeti Biiniyaamee asho, Geeri bushoo Shimeꞌi, ebiyoche, neenna tookkii beetone. Biyoo Yoordaanoosin ta kimiyooba, taanna daneya waahe. Tawoo ‘Goraadoona neen wuxaachemmo taane’ iyaꞌa Doono Yeerina biich wogeto taane.

⁹ Tunebaani ne, ariyechi asho ne tunetoyich, xuꞌaalli ashichoommon biin cikki qajjaahine; bi toommooch ne tuniyemmon ariyemmo neene; bi bukkoon damoona tookki maash gede” iye.

Daawiti Qitoo

¹⁰ Aroochee Daawiti qitii bi qaabbechinaꞌo waan xaꞌeeꞌi Daawiti Katemooch duukkehe.

¹¹ Daawiti Israꞌeeleenaꞌo toommooch bi taateti yemeeno aabbe natone. Kebiroon beechii, shabaatte naton, Yerusaalem beechii, shaashaa keejje naton taatehe.

¹² Solomooniyoo bi nihoo Daawitichi taatee qeenooch kotehe; bi taatittino oogichii manjiye.

Adoniyaasi Qitoo

¹³ Hagiiti bushoo Adoniyaasi Solomoonichi indee Baarshab waan hammiye. Baarshabiyoo “Ta waan ne waato, diggoochiye?” iyan. Biyoo “Diggoochiye” iye.

¹⁴ Aroochee “Ikke mooyon neech getane” iye. Biyoo “Gete” iyan.

¹⁵ Adoniyaasiyoo “Taatittino taacho bi tunoon, Israꞌeeleenaꞌo bulli taatoo ta tunemmoyich, boonoshi aafoon ta waan boonoshi wochoonoo ariyaabeeti neene. Tunebaani mooyo Doono Yeer waanaa bi maachetoyich, taatittino ta waanee besheꞌi ta manoyich tunetone.

¹⁶ Andoo ikke mooyon neen qollebona. Taan yeelliyaahine” iye. Areyoo “Gete” iyan.

¹⁷ Biyoo ishichiye: “Taatoo Solomooni neen yeelliyaachemmone. Shuneemee ashe Abishagin taach bi daaggaa ta shaaggemmoyich, biich ne gettemmoyich neen qollehoye” iye.

¹⁸ Baarshabiyoo “Gaawiye. Ebi ne mooyon taatoyich gettemmi taane” iyan.

¹⁹ Baarshabiyoo Adoniyaasichi mooyon getoyich, taatoo Solomoon waan hammahan. Taatoo taatee qeenoochee tiyii, biich yittiꞌi diggiihe; aroochee bi taatee qeenooch kotehe. Bi indeyichoo bare taatee qeeno woyemmoyich tuniihe. Areyoo bi qanne badd kotahan.

²⁰ Aroochee Baarshabi “Ikke giisheche mooyin neen qollebona. Taan yeelliyaahine” iyan. Taatoo “Ta indeene, neen yeelliyaachemmo taane; gete” iye.

²¹ Areyoo “Shuneemee ashe Abishagin ne manoo Adoniyaasi shaaggemmoyich daaggibe” iyan.

²² Taatoo Solomooniyoo bi indeyich ishichiye: “Amoyich Shuneemee ashe Abishagin baach Adoniyaasich echenne? Ta qaabbe manoo bi tunetoyich, taatittinoonoo biich echebani am! Biich baach tuneyaanoon, qeeshoo Abiyataarinaa Tseruuyi bushoo Yoꞌaabinoyichoo ebiyoommon echebe!” iye.

²³ Aroochee taatoo Solomooni Doono Yeerina ishichiꞌi wogehe: “Adoniyaasi ebin bi echetoyich, qitoo bi qayigaata, Yeeri ta toommooch ebin tuniibe; ebinoo daakkibe!

²⁴ Andoo taan manjiiti, ta nihoo Daawitichi taatee qeenooch taan kotiiti, bi gibenikkitoommon, kuxeyaani taatittinoon taannaa ta shiijjeroonoyich immiti, beeyechi Doono Yeeri beege! Adoniyaasi hanaach qitemmone” iye.

²⁵ Ebina Adoniyaasin bi wuxemmoyich, taatoo Solomooni Yoyaadi bushoo Beenayin daachiihe. Beenayiyoo hammii Adoniyaasin wuxiye.

Abiyataari Yeerichi Maddoochee Yookkoonaa Yoꞌaabi Qitoona

²⁶ Qeeshoo Abiyataarich taatoo ishichiye: “Qita bede asho neene. Tunebaani and neen wuxaachemmo taane. Ebiyoo Nuggishoo Doono Yeerichi taabootoon ta nihoo Daawiti aafoochaa ne shaaggetonaa ta nihoo Daawitichi iritoo bullin ne qoodeetonoyichiye. Anaatoot beeti ne goyooch hambe” iye.

²⁷ Aroochee Solomooni Abiyataarin qeeshittinoochee kichiye; ebina Doono Yeeri Shiloohaa Eeli kechi asheenaꞌochon bi gettiti qaaro ceenniye.

²⁸ Ebi woroo Yoꞌaabich shaggiyooba, Doono Yeerichi danee duukkaanooch wocciꞌi, deejjee gudee qareenaꞌon yechiye. Yoꞌaabi Abisoloomin dabboo bi qajjitaanona Adoniyaasin dabbitone.

²⁹ Yoꞌaabi Doono Yeerichi danee duukkaanooch wocciꞌi, deejjee gudee gaꞌooch bi tunoon taatoo Solomooni waayehe. Solomooniyoo Yoyaadi bushoo Beenayin “Hamiree biin wuxibe” iꞌi daachiihe.

³⁰ Beenayiyoo Doono Yeerichi danee duukkaanooch hammiꞌi, Yoꞌaabin “Taatoo neen ‘Aroochee keye’ itone” iye. Biyoo “Hiniichaanani ta qitemmo, keyaache” iye. Beenayi taatoo waan wotteꞌi, Yoꞌaabi biich gettiton gettiye.

³¹ Taatoo biich ishichiꞌi wochiye: “Bi gettitoommon tuniibe; biin wuxiree duuhe. Yoꞌaabi naboo aalloon ukkiti damoon taannaa ta nihoonochi kexoochee wokkiibe.

³² Biyee gaaweti gutte cadiqe asheenaꞌon, eboshiyoo Israꞌeelee ginee iraashoo Neeri bushoo Abeneerinaa Yihudee ginee iraashoo Yeteeri bushoo Amaasinon, ta nihoo Daawiti ariyaanoon, goraadoona bi wuxitoyich, Doono Yeeri bi shuuneti shuunoon bi toommooch wochemmone.

³³ Boonoshi damee hiishoo Yoꞌaabinaa bi yareenaꞌonochi toommooch bulli yemeenoon tunebe. Tunebaani Daawitinaa bi yaroonoyich, bi kexonaa bi taatee qeenonoyich bulli yemeenoon Doono Yeerichi diggoo tunebe” iye.

³⁴ Aroochee Yoyaadi bushoo Beenayi kechii hammiꞌi, Yoꞌaabin wuxiye. Biyoo barahooch beeti bi kechi gaꞌooch duukkehe.

³⁵ Taatoo Solomooni Yoꞌaabichi xaaꞌooch Yoyaadi bushoo Beenayin keriꞌi, bi ginee iraashoo tuniihe; Abiyataarichi xaaꞌoochoo qeeshoo Sadooqin keriye.

Shimeꞌi Qitoo

³⁶ Aroochee taatoo Solomooni Shimeꞌin ceeggiꞌi ishichiye: “Yerusaalem kexon hagiree, arooch kotebe; aroochee bara amee xaaꞌoochona, hammaahine.

³⁷ Tunebaani aroochee kechaꞌa, Qedirooni bamboon ne kimigaata, qitemmo ne tunoon ariibe; ne damoo ne toommoochiye bi tunemmo” iye.

³⁸ Shimeꞌiyoo taatoyich wochiꞌi, “Gaawiye; taatoo ta doono ne getteton ne guuno ta tuniyemmo taane” iye. Biyoo Yerusaalem meeti aaboon kotehe.

³⁹ Tunebaani keejje natoyee gubb, Shimeꞌichi guuninaꞌoochee gutteenaꞌo Gaati taatoo Maꞌaki bushoo Akiish waan aallee hammiyeete. Shimeꞌiyoo bi guuninaꞌo Gaat beemon waayehe.

⁴⁰ Biyoo tiyii bi kurooch koroon haxxiꞌi, bi guuninaꞌon qaawooch Gaat beeti Akiish waan hammiye; bi guuninaꞌonoo Gaatee wochii deebiye.

⁴¹ Shimeꞌi Yerusaalemee Gaat hammiꞌi bi wottoon Solomooni waayehe.

⁴² Shimeꞌin taatoo ceekkiiꞌi biich ishichiye: “ ‘Bare amee xaaꞌoochona hamma ne keyiyooba, qitemmo ne tunoon ariibe’ iyaꞌa Doono Yeerichi shigoona neen wogiyaꞌa, ‘Ne qelloon ariibe!’ getaano taane? Newoo ‘Deꞌa, ebi ne getteton ceechemmo taane’ iyaꞌa taach getaano neene?

⁴³ Ishigaata, Doono Yeerich ne wogeti wogoonaa neech ta getteti getoonon amoyich ceechaachine?” iye.

⁴⁴ Aroochee taatoo daakkiꞌi, Shimeꞌich ishichiye: “Ta nihoo Daawiti toommooch ne tuniiti gonde mooyo bullin ne mulloona ariyaabeeto neene. Ebich Doono Yeeri ne shuuneti gonde shuunoon ne toommooch wochemmone;

⁴⁵ tunebaani taan diiremmone; Daawitichi taatee qeenonoo bi aafooch bulli yemeenoon manjiyemmone” iye.

⁴⁶ Aroochee taatoo, Yoyaadi bushoo Beenayich getaa, biyoo hammiꞌi, Shimeꞌin wuxiye. Ebina taatittino Solomoonichi kishooch manjiye.